ନୂଆଦିଲ୍ଲୀ,୧୪।୧: ଉତ୍ତରପୂର୍ବ ଦିଲ୍ଲୀରେ ଲୁଟ ବେଳେ ୫୨ ବର୍ଷୀୟ ମହିଳାଙ୍କ ବେକକୁ କଇଁଚିରେ କାଟି ଦେଇଥିଲେ। ତା’ ପରେ ପୀଡ଼ିତାଙ୍କ ମୁଣ୍ଡକୁ ଇଟା ଆକ୍ରମଣ କରି ହତ୍ୟା କରିଥିଲେ। ଏହି ଘଟଣାରେ ସମ୍ପୃକ୍ତ ୪ ଅଭିଯୁକ୍ତଙ୍କୁ ଗିରଫ କରାଯାଇଥିବା ଗୁରୁବାର ପୋଲିସ ପକ୍ଷରୁ କୁହାଯାଇଛି।
ଗତ ୧୧ ତାରିଖରେ କରାଓ୍ବାଲ ନଗରରେ ହତ୍ୟାକାଣ୍ଡ ଘଟିଥିଲା। ପୀଡ଼ିତାଙ୍କୁ ତାରା ବୋଧ ଭାବେ ଚିହ୍ନଟ କରାଯାଇଥିବା ବେଳେ ଅପରାଧରେ ଜଡ଼ିତ ଥିବା ଅମନ, ଆକାଶ, ମନୀଶ ଓ ବୈଭବ ଜୈନଙ୍କୁ ଗିରଫ କରାଯାଇଛି। ସମସ୍ତ ଅଭିଯୁକ୍ତ ଉତ୍ତରପ୍ରଦେଶର ଲୋନି ଅଞ୍ଚଳର ବୋଲି ଉତ୍ତରପୂର୍ବ ଦିଲ୍ଲୀ ଡିସିପି ସଞ୍ଜୟ କୁମାର ସେନ କହିଛନ୍ତି।
ଅମନ ଓ ଆକାଶ ଲୋନି ଅଞ୍ଚଳରେ ଜଣେ ବୃଦ୍ଧଙ୍କୁ ହତ୍ୟା କରିଥିବା ସ୍ବୀକାର କରିଛନ୍ତି ପୋଲିସ ଆଗରେ। ନୂଆ ବ୍ୟବସାୟ ପାଇଁ ପୀଡ଼ିତାଙ୍କୁ ଯୋଗାଯୋଗ କରିଥିଲେ ଅମନ। ଘରେ ପ୍ରବଳ ଟଙ୍କା ଥିବା ଜାଣିବା ପରେ ଅମନ ସାଙ୍ଗଙ୍କ ସହ ମିଶି ଲୁଟ ଯୋଜନା କରିଥିଲେ। ଘଟଣା ଦିନ ଅଭିଯୁକ୍ତମାନେ ପୀଡ଼ିତଙ୍କ ଘରେ ପହଞ୍ଚି ପୀଡ଼ିତାଙ୍କୁ କଇଁଚି ଓ ଇଟାରେ ଆକ୍ରମଣ ହତ୍ୟା କରିଥିଲେ। ପରେ ତାଙ୍କର ସମସ୍ତ ସୁନାଗହଣା ଏବଂ ଟଙ୍କା ଲୁଟି ନେଇଥିଲେ।
