କେପ୍ ଟାଉନ,୧୦।୧: ଗତ ଦୁଇ ବର୍ଷ ହେଲା ତିନି ସଂଖ୍ୟା ବିଶିଷ୍ଟ ସ୍କୋର ହାସଲ କରିବାରେ ବିଫଳ ହେବା ସହ ରନ୍ ସଂଗ୍ରହ ହାରରେ ମଧ୍ୟ ତଳ ମୁହଁା ହୋଇଛି। କିନ୍ତୁ ଏଥିଲାଗି ଚିନ୍ତିତ ନ ଥିବା ଏବଂ କାହାକୁ କିଛି ପ୍ରମାଣ କରିବାର ନ ଥିବା କହିଛନ୍ତି ଭାରତୀୟ ଟେଷ୍ଟ ଅଧିନାୟକ ବିରାଟ କୋହଲି।
ମଙ୍ଗଳବାରଠାରୁ ଆରମ୍ଭ ହେବାକୁ ଯାଉଥିବା କେପ୍ ଟାଉନ ଟେଷ୍ଟ ପୂର୍ବରୁ ଆୟୋଜିତ ଖବରଦାତା ସମ୍ମିଳନୀରେ କୋହଲି କହିଛନ୍ତି, ମୋ ଫର୍ମ ଉପରେ ଲୋକେ କଥା ହେଉଛନ୍ତି। ମୋ କ୍ୟାରିୟରରେ ଏହା ପ୍ରଥମ ଘଟଣା ନୁହେଁ। ଏଥିପୂର୍ବରୁ ମଧ୍ୟ ବହୁ ବାର ମୋ ଫର୍ମ ଉପରେ ପ୍ରଶ୍ନ ଉଠିଛି। ୨୦୧୪ରେ ଇଂଲଣ୍ଡ ବିପକ୍ଷ ସିରିଜ୍ରେ ବିଫଳ ହେବା ପରେ ମୋତେ ସମାନ ପରିସ୍ଥିତିର ସମ୍ମୁଖୀନ ହେବାକୁ ପଡ଼ିଥିଲା। ମୋ ଫର୍ମ ଉପରେ କିଏ କ’ଣ ଚିନ୍ତା କରୁଛନ୍ତି, ତାହାକୁ ମୁଁ କଦାପି ଖାତିର କରେ ନାହିଁ। ମୋ ପାଇଁ ମୁଁ ମାନଦଣ୍ଡ ସ୍ଥିର କରିଛି। ମୁଁ ସର୍ବଦା ଦଳ ପାଇଁ ଭଲ ପ୍ରଦର୍ଶନ କରିବାକୁ ଚାହେଁ। କିନ୍ତୁ ଖେଳରେ ସର୍ବଦା ସବୁକିଛି ତୁମ ସପକ୍ଷରେ ରହେ ନାହିଁ। ଜଣେ ଖେଳାଳି ଭାବେ ମୁଁ ଭାରତୀୟ ଦଳରେ ଅନେକ ଗୁରୁତ୍ୱପୂର୍ଣ୍ଣ ମ୍ୟାଚ୍ରେ ଜଡ଼ିତ ଥିଲି। ଦଳର ଆବଶ୍ୟକତା ବେଳେ ପ୍ରଦର୍ଶନ କରିପାରି ଥିବାରୁ ମୁଁ ଗର୍ବିତ।
ସର୍ବଦା ନମ୍ବରକୁ ଆଧାର କରି ନିଜକୁ ବିଚାର କରିବା ଉଚିତ ନୁହେଁ। ଯଦି ଏଭଳି ହୁଏ ତେବେ ମୋ ମତରେ ତୁମେ ଯାହା କରୁଛ ସେଥିରେ କଦାପି ସନ୍ତୁଷ୍ଟ ହେବ ନାହିଁ। ମୁଁ ଯେଉଁଭଳି ଖେଳୁଛି ଏବଂ ବିପରୀତ ପରିସ୍ଥିତିରେ ଦଳ ପାଇଁ ଯାହା କରିଛି, ସେଥିରେ ମୁଁ ଖୁସି ଅଛି। ଅନ୍ୟ କୌଣସି ବିଷୟକୁ ନେଇ ମୋତେ ଚିନ୍ତିତ ହେବାର ଆବଶ୍ୟକତା ନାହିଁ। ମୋତେ ଲାଗୁନି, ମୋର କାହାକୁ କିଛି ପ୍ରମାଣ କରିବାର ଅଛି।
