ଭୁବନେଶ୍ୱର,୧୬ା୧୧(ବ୍ୟୁରୋ): କେବିଏନ୍ ଗ୍ୟାଙ୍ଗ୍ର ୫ ସଦସ୍ୟଙ୍କ ୨ ଦିନିଆ ରିମାଣ୍ଡ ଅବଧି ସରିବା ପରେ କମିଶନରେଟ ପୋଲିସ ସୋମବାର ସେମାନଙ୍କୁ ପୁଣି ଜେଲ୍ ହାଜତକୁ ପଠାଇ ଦେଇଛି। ଆଉକିଛି ତଥ୍ୟ ଓଗାଳିବା ପାଇଁ ଅଭିଯୁକ୍ତ ରାହୁଲ ଜେନା, ରାଜେଶ ବେହେରା ଓରଫ ଚେଙ୍ଗ, ସୁମନ କୁମାର ପରିଡ଼ା, ସନାତନ ବେହେରା ଓରଫ ସନିଆ ଓ ନରେନ୍ଦ୍ର କୁମାର ଜେନାଙ୍କୁ ପୁଣିଥରେ ରିମାଣ୍ଡରେ ଆଣିବାକୁ ପୋଲିସ ପ୍ରସ୍ତୁତ ହେଉଥିବା ସୂଚନା ମିଳିଛି। ତେବେ ଅଭିଯୁକ୍ତଙ୍କୁ ଜେରାବେଳେ ପୋଲିସ ଏକ ନୂଆ ତଥ୍ୟ ପାଇଛି। ଗ୍ୟାଙ୍ଗର ସଦସ୍ୟମାନେ ଆପରାଧିକ କାଣ୍ଡ ଘଟାଇବାକୁ ଏକ ହ୍ବାଟ୍ସଆପ୍ ଗ୍ରୁପ୍ ଖୋଲିଥିଲେ। ସେହି ଗ୍ରୁପ୍ରେ ହିଁ ଅପରାଧ ଯୋଜନା ସମ୍ପର୍କରେ ଆଲୋଚନା କରୁଥିଲେ। ଅଭିଯୁକ୍ତ ସନାତନ ଓରଫ ସନିଆ ଏହି ଗ୍ରୁପର ଆଡ୍ମିନ୍ ଥିଲେ। ତେବେ ଗ୍ୟାଙ୍ଗର କଳା କାର୍ନାମା ପୋଲିସ ନଜରକୁ ଅସିବା ପରେ ଗ୍ରୁପ୍ରେ ଥିବା ସମସ୍ତ ସଦସ୍ୟ ଗୋଟିଏ ପରେ ଗୋଟିଏ ଲେଫ୍ଟ ହେବାରେ ଲାଗିଥିଲେ। ପୋଲିସ ସେମାନଙ୍କୁ ଚିହ୍ନଟ କରିଛି। ଗ୍ୟାଙ୍ଗର ମାଷ୍ଟର ମାଇଣ୍ଡ୍ ବୁବୁ ଜେନା ଧରାପଡିଲେ ଆଉକିଛି ତଥ୍ୟ ପଦାକୁ ଆସିବ ବୋଲି ପୋଲିସ ଆଶା ରଖିଛି।
ସୂଚନାଯୋଗ୍ୟ, ରାଜଧାନୀରେ କେବିଏନ୍ ଗ୍ୟାଙ୍ଗ ସଦସ୍ୟମାନେ ଆତଙ୍କ ଖେଳାଉଥିଲେ। ରାଜରାସ୍ତାରେ ଖଣ୍ଡା, ଭୁଜାଲି, ବନ୍ଧୁକ ଆଦି ମାରଣାସ୍ତ୍ର ଧରି କାର୍ରେ ଘୁରି ବୁଲୁଥିଲେ। ଲୋକଙ୍କୁ ଭୟଭୀତ କରିବା ସହ ଗ୍ୟାଙ୍ଗ୍ର ଉପସ୍ଥିତିକୁ ଲୋକଲୋଚନକୁ ଆଣିବାକୁ ମାରଣାସ୍ତ୍ର ଧରି ଫିଲ୍ମ ଷ୍ଟାଇଲ୍ରେ ଭିଡିଓ ଶୁଟ୍ କରି ସୋସିଆଲ ମିଡିଆରେ ଛାଡୁଥିଲେ। ଭିଡିଓ ଭାଇରାଲ ପରେ କମିଶନରେଟ ପୋଲିସର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଥିଲା। ସିଆର୍ପି ଛକ ସଂଘବଦ୍ଧ ଆକ୍ରମଣ ଘଟଣା ପରେ କେବିଏନ୍ ଗ୍ୟାଙ୍ଗର ସଦସ୍ୟମାନେ ଫେରାର ହୋଇଯାଇଥିଲେ। ତେବେ ଏୟାରପୋର୍ଟ ଥାନା ପୋଖରୀପୁଟ ଅଞ୍ଚଳରେ ଅଭିଯୁକ୍ତ ଚେଙ୍ଗ ରହୁଥିବା ଘରେ ପୋଲିସ ଚଢାଉ କରିବା ସହ ତାଙ୍କ ଘର ଭାଙ୍ଗି ଏକ ଖଣ୍ଡା ଜବତ କରିଥିଲା। ତା’ପର ଦିନ ବୁବୁଙ୍କ ଘରେ ମଧ୍ୟ ପୋଲିସ ଚଢାଉ କରିଥିଲା।
