ଦୁବାଇ,୭।୧୧: ଟି -୨୦ ବିଶ୍ୱକପରେ ଟିମ ଇଣ୍ଡିଆର ପ୍ରଦର୍ଶନ ଅତ୍ୟନ୍ତ ଖରାପ ଥିଲା। ଭାରତ ସେମିଫାଇନାଲ ଦୌଡ଼ରୁ ମଧ୍ୟ ବାଦ୍ ପଡିଛି। ପ୍ରାରମ୍ଭରେ ଲଗାତାର ଦୁଇଟି ମ୍ୟାଚ ହାରିଯିବା ପରେ ତାଙ୍କର ଆଶା ଧୂଳୀସାତ୍ ହୋଇଥିଲା। ଟୁର୍ନାମେଣ୍ଟ ଆରମ୍ଭରୁ ଶକ୍ତିଶାଳୀ ପ୍ରତିଦ୍ୱନ୍ଦୀ ଭାବେ ବିବେଚିତ ଭାରତ କାହିଁକି ପ୍ରଥମ ରାଉଣ୍ଡରୁ ବିଦା ହେଲା ତାହାର ଅନେକ କାରଣ ରହିଛି। ଭାରତ ଟୁର୍ନାମେଣ୍ଟରୁ ବାଦ୍ ପଡିବାର ୫ ପ୍ରମୁଖ କାରଣ
-ଭାରତୀୟ କ୍ରିକେଟ ଦଳର ବ୍ୟାଟ୍ସମ୍ୟାନ୍ରେ ଟୁର୍ନାମେଣ୍ଟରେ ଭଲ ପ୍ରଦର୍ଶନ କରିପାରି ନ ଥିଲେ। ବିଶେଷ କରି ବଡ ମ୍ୟାଚ ଗୁଡିକରେ, ସେମାନେ ଉପହାର ସ୍ବରୂପ ନିଜ ଉଇକେଟ ଦେଇଥିବା ପରି ଲାଗୁଥିଲା। ବିରାଟ କୋହଲି, ରୋହିତ ଶର୍ମା, ରିଷଭ ପନ୍ତ, କେ.ଏଲ ରାହୁଲଙ୍କ ଭଳି ଷ୍ଟାର ବ୍ୟାଟ୍ସମ୍ୟାନ ପାକିସ୍ତାନ ଏବଂ ନ୍ୟୁଜିଲାଣ୍ଡ ବିପକ୍ଷରେ ଫ୍ଲପ ସାବ୍ୟସ୍ତ ହୋଇଥିଲେ। ବିରାଟ ପାକିସ୍ତାନ ବିପକ୍ଷରେ ଅର୍ଦ୍ଧଶତକ ହାସଲ କରିଥିଲେ ମଧ୍ୟ ରୋହିତ ଏବଂ ରାହୁଲ ଭଲ ଆରମ୍ଭ କରିବାରେ ସଫଳ ହୋଇପାରି ନ ଥିଲେ। ନ୍ୟୁଜିଲାଣ୍ଡ ବିପକ୍ଷ ଗୁରୁତ୍ୱପୂର୍ଣ୍ଣ ମ୍ୟାଚରେ ବ୍ୟାଟିଂ ଲାଇନ ଅପରେ ଅନେକ ପରିବର୍ତ୍ତନ କରାଯାଇଥିଲା ଏବଂ ରୋହିତ ଶର୍ମାଙ୍କ ବଦଳରେ ଇଶାନ କିଶନଙ୍କ ଦ୍ୱାରା ଓପନିଂ କରାଯାଇଥିଲା। ବ୍ୟାଟ୍ସମ୍ୟାନ୍ମାନେ ଆଫଗାନିସ୍ତାନ ଏବଂ ସ୍କଟଲ୍ୟାଣ୍ଡ ବିପକ୍ଷରେ ଭଲ ବ୍ୟାଟିଂ କରିଥିଲେ କିନ୍ତୁ ସେତେବେଳକୁ ବହୁତ ଡେରି ହୋଇଯାଇଥିଲା।—ଦଳରେ ଅଲରାଉଣ୍ଡରଙ୍କ ଅନୁପସ୍ଥିତି ଭାରତ ପାଇଁ କାଳ ହୋଇଥିଲା। ହାର୍ଦ୍ଦିକ ପାଣ୍ଡ୍ୟାଙ୍କୁ ଚୟନ କରାଯାଇଥିଲା କିନ୍ତୁ ସେ ମାତ୍ର ୨ ଟି ମ୍ୟାଚରେ ବୋଲିଂ କରିଥିଲେ ଯେଉଁଥିରେ ସେ କୌଣସି ଉଇକେଟ ନେଇପାରି ନ ଥିଲେ। ବରୁଣ ଚକ୍ରବର୍ତ୍ତୀ ମଧ୍ୟ ଫିଟନେସ ସମସ୍ୟା ସହ ସଂଘର୍ଷ କରୁଥିବା ଦେଖିବାକୁ ମିଳିଥିଲା। ଏହା ଦିନିକିଆ କିମ୍ବା ଟି୨୦ ହେଉ, ଦଳରେ ଅଲରାଉଣ୍ଡର ରହିବା ଅତ୍ୟନ୍ତ ଜରୁରୀ, ଯିଏ କଠିନ ସମୟରେ ଦଳକୁ ଉଦ୍ଧାର କରିପାରିବ। କିନ୍ତୁ ଚଳିତ ଟୁର୍ନାମେଣ୍ଡରେ ଭାରତକୁ ଏହା ମିଳି ନ ଥିଲା।
-ଭାରତୀୟ ଦଳର ବୋଲିଂ ବଡ ମ୍ୟାଚରେ ସମ୍ପୂର୍ଣ୍ଣ ପ୍ରଭାବହୀନ ବୋଲି ପ୍ରମାଣିତ ହୋଇଥିଲା। ଭାରତୀୟ ବୋଲରମାନେ ପାକିସ୍ତାନ ବିପକ୍ଷରେ କୌଣସି ଉଇକେଟ ନେଇପାରି ନ ଥିବାବେଳେ ନ୍ୟୁଜିଲାଣ୍ଡ ବିପକ୍ଷରେ ୨ଟିି ଉଇକେଟ ଥିଲା।
-ୟୁଏଇ ଦ୍ୱାରା ଆୟୋଜିତ ଏହି ବିଶ୍ୱକପରେ ଟସ ଗୁରୁତ୍ୱପୂର୍ଣ୍ଣ ପ୍ରମାଣିତ ହୋଇଥିଲା। ଭାରତୀୟ ଅଧିନାୟକ ବିରାଟ କୋହଲି ଉଭୟ ପ୍ରାରମ୍ଭିକ ମ୍ୟାଚ୍ରେ ଟସ ହାରିଥିଲେ। ପରେ ମ୍ୟାଚ୍ରେ ମଧ୍ୟ ପରାଜୟର ସମ୍ମୁଖୀନ ହେବାକୁ ପଡ଼ିଲା। ସ୍କଟଲାଣ୍ଡ ବିପକ୍ଷରେ ବିଜୟ ପରେ ବିରାଟ ନିଜେ ମଧ୍ୟ ଏହାକୁ ଗ୍ରହଣ କରିଥିଲେ। ସେ କହିଥିଲେ ଯେ ଏହି ପିଚରେ ଟସ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଅଟେ।
-ଭାରତୀୟ କ୍ରିକେଟରଙ୍କ ଖରାପ ପ୍ରଦର୍ଶନ ପାଇଁ ଥକ୍କାପଣ ମଧ୍ୟ ଏକ ଗୁରୁତ୍ୱପୂର୍ଣ୍ଣ କାରଣ ଥିଲା। ୟୁଏଇରେ ଆଇପିଏଲର ଦ୍ୱିତୀୟ ପର୍ଯ୍ୟାୟ ଖେଳାଯାଇଥିଲା। ଏଥିରୁ ଲାଭ ପାଇବା ପରିବର୍ତ୍ତେ ଖେଳାଳିମାନେ ପରାଜୟ ଦେଖିଥିଲେ। କ୍ରମାଗତ ମ୍ୟାଚ ଖେଳୁଥିବାରୁ ଖେଳାଳିମାନେ ଫିଟନେସ ସହିତ ସଂଘର୍ଷ କରୁଥିବା ମଧ୍ୟ ଦେଖିବାକୁ ମିଳିଥିଲା। ସମସ୍ତ ଭାରତୀୟ ଖେଳାଳି କ୍ରମାଗତ ଭାବରେ ଆଇପିଏଲରେ ଖେଳିଥିଲେ, କିନ୍ତୁ ଅନ୍ୟ ବିଦେଶୀ ଦଳ ସେମାନଙ୍କର କିଛି ଖେଳାଳିଙ୍କୁ ବିଶ୍ରାମ ଦେଇଥିଲେ ଏବଂ କେତେକ ଦ୍ୱିତୀୟ ପର୍ଯ୍ୟାୟରେ ସେମାନଙ୍କ ଖେଳାଳିଙ୍କୁ ପଠାଇ ନ ଥିଲେ।
