ନୂଆଦିଲ୍ଲୀ,୨୨।୧୦: ସୁପ୍ରିମକୋର୍ଟରେ ଏକ ଆଇନଗତ ଯୁଦ୍ଧରେ ଜିତିବା ପରେ ୩୯ ଜଣ ମହିଳା ସେନା ଅଧିକାରୀଙ୍କୁ ସ୍ଥାୟୀ କମିଶନ ମିଳିଛି। ସାତୋଟି କାର୍ଯ୍ୟ ଦିବସ ମଧ୍ୟରେ ସେମାନଙ୍କ ନୂତନ ସେବା ମାନ୍ୟତା ଦେବାକୁ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ବଞ୍ଚିତ ହୋଇଥିବା ମୋଟ ୭୧ ମହିଳା ସର୍ଟ ସର୍ଭିସ କମିଶନ ଅଧିକାରୀ ସ୍ଥାୟୀ ଆୟୋଗ ପାଇଁ ସୁପ୍ରିମକୋର୍ଟ ଯାଇଥିଲେ।
ସୂଚନା ଅନୁସାରେ, କେନ୍ଦ୍ର କୋର୍ଟଙ୍କୁ କହିଛନ୍ତି ୭୧ଜଣ ଅଧିକାରୀଙ୍କ ମଧ୍ୟରୁ ୩୯ଜଣ ସ୍ଥାୟୀ କମିଶନ ପାଇଁ ଯୋଗ୍ୟ ବିବେଚିତ ହୋଇଥିବା ବେଳେ ୭ଜଣ ମେଡିକାଲରେ ଅଯୋଗ୍ୟ ଏବଂ ୨୫ଜଣ ବିଶୃଙ୍ଖଳାଗତ କାର୍ଯ୍ୟ ପାଇଁ ବାଦ୍ ପଡ଼ିଛନ୍ତି। ଏହା ପରେ ସୁପ୍ରିମକୋର୍ଟ କେନ୍ଦ୍ରକୁ ନିର୍ଦ୍ଦେଶ ଦେଇଛନ୍ତି ୨୫ ଜଣ ସ୍ଥାୟୀ କମିଶନ ପାଇଁ ଯୋଗ୍ୟ ନୁହନ୍ତି। ଅକ୍ଟୋବର ୨ରେ କୌଣସି ଅଧିକାରୀଙ୍କୁ ସେବାରୁ ମୁକ୍ତ ନ କରିବାକୁ କୋର୍ଟ କହିଥିଲେ। ଭାରତର ପ୍ରଥମ ମହିଳା ପ୍ରଧାନ ବିଚାରପତି ହେବାକୁ ଥିବା ଜଷ୍ଟିସ ଡି.ଇ ଚନ୍ଦ୍ରଚୂଡ଼ ଓ ଜଷ୍ଟିସ ବି.ଭି ନାଗରଥନାଙ୍କ ଦୁଇ ଜଣିଆ ଖଣ୍ଡପୀଠ ଏହି ମାମଲାର ଶୁଣାଣି କରିଥିଲେ। ଏହି ପ୍ରକ୍ରିୟା ଶେଷ କରିବାକୁ ସରକାରଙ୍କୁ ପ୍ରାୟ ତିନିମାସ ସମୟ ଦିଆଯାଇଥିଲା।
