କଟକ ଅଫିସ,୫।୧୦: ଦୁର୍ଗା ପୂଜା ପୂର୍ବରୁ କମିଶନରେଟ ପୋଲିସ ପକ୍ଷରୁ କ୍ଲିନ କ୍ରାଇମ ଅଭିଯାନ ଆରମ୍ଭ ହୋଇଛି। ବନ୍ଧୁକ କାରବାର ଅଭିଯୋଗରେ ବାଦାମବାଡି ଥାନା ପୋଲିସ ମଙ୍ଗଳବାର ଜଣେ ଆଲବମ୍ ନିର୍ଦ୍ଦେଶକଙ୍କ ସମେତ ୪ ପେଶାଦାର ଅପରାଧୀଙ୍କୁ ଗିରଫ କରିଛି। ଅଭିଯୁକ୍ତମାନେ ହେଲେ, ସଦର ଥାନା ଝିଙ୍କିରିଆର ଜ୍ଞାନରଞ୍ଜନ ସାହୁ ଓରଫ ନବ(୪୦), ବାଦାମବାଡି ଥାନା ଶଙ୍କରପୁର ଡିହସାହିର ପ୍ରକାଶ ରାଉତ ଓରଫ ପପୁ(୩୫), ବଳଭଦ୍ରପୁର ବାଲିସାହିର ବାସିନ୍ଦା ତଥା ଆଲବମ ନିର୍ଦ୍ଦେଶକ ପ୍ରମୋଦ ରାଉତ ଓରଫ ଜିତୁ(୪୩), ଚାଉଳିଆଗଞ୍ଜ ଥାନା ଗତିରାଉତ ପାଟଣାର ସୁଶାନ୍ତ ପରିଡା(୪୯। ପୋଲିସ ତାଙ୍କଠାରୁ ୩ଟି ବନ୍ଧୁକ ସହ ୧୬ଟି ଗୁଳି ଜବତ କରିଛି। ଅଭିଯୁକ୍ତଙ୍କ ନାମରେ ବିଭିନ୍ନ ଥାନାରେ ପୂର୍ବରୁ ୧୪ଟି ସଙ୍ଗୀନ ମାମଲା ରହିଥିବା ଡିସିପି କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ଡିସିପି ପ୍ରତୀକ ସିଂ ସୂଚନା ଦେଇଛନ୍ତି।
ସେ କହିଛନ୍ତି ଯେ, ଅଭିଯୁକ୍ତ ନବ ମଙ୍ଗଳାବର ଝାଞ୍ଜିରୀମଙ୍ଗଳା ଗଡା ନିକଟରେ ବନ୍ଧୁକ ଧରି ବୁଲୁଥିବା ବିଶ୍ୱସ୍ତସୂତ୍ରରୁ ପୋଲିସକୁ ଖବର ମିଳିଥିଲା। ପରେ ବାଦାମ ବାଡି ଥାନା ଏସ୍ଆଇ ଦିଲୀପ ମହାନ୍ତି ଓ ଅନ୍ୟ କର୍ମଚାରୀମାନେ ଘଟଣାସ୍ଥଳକୁ ଯାଇ ଅପରାଧୀ ନବକୁ କାବୁ କରିଥିଲେ। ତାଙ୍କଠାରୁ ପୋଲିସ ଗୋଟିଏ ବନ୍ଧୁକ ଓ ୨ ରାଉଣ୍ଡ ଗୁଳି ଜବତ କରିଥିଲା। ଅଧିକ ପଚରାଉଚୁରା କରିବାକୁ ସେ ବନ୍ଧୁକଟି ପ୍ରକାଶଠାରୁ କିଣିଥିବା ସ୍ବୀକାର କରିଥିଲା। ପ୍ରକାଶ ତାର ସମ୍ପର୍କୀୟ ତାଳଚେରର ଟୁକୁନା ସ୍ବାଇଁଙ୍କଠାରୁ ଆଣି ଚୋରା ବନ୍ଧୁକ କାରବାର କରିଥାଏ ବୋଲି ଜଣାପଡିଥିଲା। ଟୁକୁନା ପୂର୍ବରୁ ବନ୍ଧୁକ କାରବାର ଘଟଣାରେ ଗିରଫ ହୋଇ ଜେଲରେ ରହିଛି। ପ୍ରକାଶକୁ ପୋଲିସ ଗିରଫ କରିବା ସହ ତାଠାରୁ ୧୦ ରାଉଣ୍ଡ ଗୁଳି ଜବତ କରିଥିଲା। ନବକୁ ଜେରାପରେ ପ୍ରକାଶ, ପ୍ରମୋଦ ଓ ସୁଶାନ୍ତଙ୍କୁ ପୋଲିସ ଗିରଫ କରିଥିଲା। ପ୍ରମୋଦଠାରୁ ଗୋଟିଏ ବନ୍ଧୁକ, ୨ ଗୁଳି ଓ ସୁଶାନ୍ତଠାରୁ ଗୋଟିଏ ବନ୍ଧୁକ ଓ ୨ଟି ଗୁଳି ଜବତ କରିଥିଲା। ପରେ ସମସ୍ତଙ୍କୁ ଗିରଫ କରି କୋର୍ଟଚାଲାଣ କରାଯାଇଛି। ଅଧିକ ଜେରାପାଇଁ ଅଭିଯୁକ୍ତଙ୍କୁ ରିମାଣ୍ଡରେ ଅଣାଯିବ ବୋଲି ଡିସିପି ସିଂ କହିଛନ୍ତି।
ସୂଚନା ଯୋଗ୍ୟ, ବଳଭଦ୍ରପୁର ବାଲିସାହିର ବାସିନ୍ଦା ପ୍ରମୋଦ ରାଉତ ଓରଫ ଜିତୁ ପୂର୍ବରୁ ଆଲବମ୍ ନିର୍ଦ୍ଦେଶକ ଭାବେ କାର୍ଯ୍ୟ କରୁଥିଲେ। କିନ୍ତୁ ଦିନକୁ ଦିନ ଆଲବମର ଚାହିଦା କମିଯିବାରୁ ସେ ଅପରାଧ ଦୁନିଆକୁ ଚାଲିଆସିଥିଲେ। ଏଥିସହ ବନ୍ଧୁକ ରଖିବା ତାଙ୍କର ସଉକ ମଧ୍ୟ ରହିଥିଲା। ଚୋରା ବନ୍ଧୁକ କାରବାରରେ ସେ ଗତ ୬ ବର୍ଷ ଧରି ସଂଶ୍ଳିଷ୍ଟ ରହିଥିବା ପୋଲିସ ସୂତ୍ରରୁ ଜଣାପଡିଛି।
