ଝୁମ୍ପୁରା/କେନ୍ଦୁଝର,୨୭।୯(ଡି.ଏନ.ଏ./ସ୍ବ.ପ୍ର.): କେନ୍ଦୁଝର ଜିଲା ଝୁମ୍ପୁରା ବ୍ଲକ ବାଲିବନ୍ଧ ବନାଞ୍ଚଳ ଅଧୀନ ଜଙ୍ଗଲ ପାର୍ଶ୍ୱ ଗ୍ରାମ ପୁରୁଣାପାଣିରେ ସୋମବାର ଭୋରରେ ହାତୀ ଆକ୍ରମଣରେ ଜଣେ ଯୁବକଙ୍କ ମୃତ୍ୟୁ ଘଟିଛି। ମୃତକ ହେଲେ ଚାମରା ମୁଣ୍ଡା।
ସୂଚନା ଅନୁଯାୟୀ, ପୁରୁଣାପାଣି ଜଙ୍ଗଲରେ ୧୧ଟି ହାତୀ ଘୂରି ବୁଲୁଛନ୍ତି। ଜଙ୍ଗଲ ପାର୍ଶ୍ୱ ଫସଲ ଉଜାଡ଼ିବା ସହ ହାତୀପଲ ଉପଦ୍ରବ ଚଳାଇଛନ୍ତି। ଚାମରା ଫସଲ ଜଗିବା ପାଇଁ ରବିବାର ରାତିରେ ଯାଇଥିଲେ। ସେ ଗଛ ଉପରେ ବାନ୍ଧିଥିବା ମଞ୍ଚାରୁ ଭୋରରେ ଓହ୍ଲାଇ ଘରକୁ ଆସୁଥିଲେ। ହେଲେ କୁହୁଡ଼ି ଯୋଗୁ ପଛପଟୁ ଆସୁଥିବା ହାତୀକୁ ସେ ଦେଖି ନ ପାରି ହାବୁଡରେ ପଡିଥିଲେ। ହାତୀ ଶୁଣ୍ଢରେ ତାଙ୍କୁ କଚାଡ଼ି ଦେବା ସହ ଗୋଇଠା ମାରିବାରୁ ସେ ଗୁରୁତର ହୋଇପଡିଥିଲେ। ହାତୀ ଚାଲିଯିବା ପରେ ପାଖରେ ଥିବା ଚାଷୀମାନେ ତାଙ୍କୁ ଉଦ୍ଧାର କରି ଝୁମ୍ପୁରା ଡାକ୍ତରଖାନାକୁ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ବନ ବିଭାଗ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ସରକାରଙ୍କ ନିୟମ ଅନୁଯାୟୀ ମୃତ ଚାମରା ପରିବାରକୁ ୪ଲକ୍ଷ ଟଙ୍କାର ଅନୁକମ୍ପା ରାଶି ପ୍ରଦାନ କରାଯିବ। ତେବେ ପ୍ରାଥମିକ ସହାୟତା ୪୦ ହଜାର ଟଙ୍କା ଦିଆଯାଇଥିବା ଚମ୍ପୁଆ ରେଞ୍ଜର ସଞ୍ଜୀବ ରାଉତ କହିଛନ୍ତି।
