କଟକ ଅଫିସ,୧୯।୮: ମାନବପ୍ରେମୀ ଆଦିତ୍ୟ ଦାସ ମୃତ୍ୟୁ ସମେତ ଓଡ଼ିଶାର ବିଭିନ୍ନ ଜିଲାରେ ଘଟିଥିବା ଚର୍ଚ୍ଚିତ ୧୨ଟି ହତ୍ୟା ଘଟଣାର ସିବିଆଇ ତଦନ୍ତ ଦାବିରେ ହାଇକୋର୍ଟରେ ଜନସ୍ବାର୍ଥ ମାମଲା ଦାଏର ହୋଇଛି। ଏଥିରେ ସିବିଆଇ, ମୁଖ୍ୟ ଶାସନ ସଚିବ, ଗୃହ ସଚିବ, ପୋଲିସ ମହାନିର୍ଦ୍ଦେଶକ, କ୍ରାଇମବ୍ରାଞ୍ଚ ମୁଖ୍ୟ, କଟକ ଗ୍ରାମାଞ୍ଚଳ ଏସ୍ପି, ଜଗତ୍ସିଂହପୁର, ଯାଜପୁର, କେନ୍ଦ୍ରାପଡ଼ା ଓ ବୌଦ୍ଧ ଏସ୍ପି, ଭୁବନେଶ୍ୱର ଡିସିପିଙ୍କ ସମେତ କୁଜଙ୍ଗ, ମାହାଙ୍ଗା, ପାଟକୁରା, ବିଞ୍ଝାରପୁର, ଖଣ୍ଡଗିରି, କଣ୍ଟାମାଳ, ରାଜକନିକା, ମାର୍ଶାଘାଇ ଓ କେନ୍ଦ୍ରାପଡ଼ା ଥାନା ଅଧିକାରୀଙ୍କୁ ପକ୍ଷଭୁକ୍ତ କରାଯାଇଛି।
ଆବେଦନକାରୀ ଭାରତୀୟ ବିକାଶ ପରିଷଦର ରାଜ୍ୟ ସଭାପତି ସୁରେନ୍ଦ୍ର ପାଣିଗ୍ରାହୀ ପିଟିଶନରେ ଦର୍ଶାଇଛନ୍ତି, ଉପରୋକ୍ତ ଘଟଣାଗୁଡିକରେ ପୋଲିସ ଅଭିଯୁକ୍ତମାନଙ୍କୁ ଜାଣିଶୁଣି ଗିରଫ କରି ନ ଥିବାବେଳେ ମାମଲା ରଫାଦଫା କରି ଫାଇନାଲ୍ ରିପୋର୍ଟ ବିଭିନ୍ନ ଜିଲାର ଏସ୍ଡିଜେଏମ୍ କୋର୍ଟରେ ଦାଖଲ କରିଛି। ଏହିପରି ଅନେକ କେସ୍ ଲୋକଲୋଚନକୁ ଆସିପାରୁନାହିଁ। ହତ୍ୟାର ଶିକାର ହୋଇଥିବା ସମସ୍ତ ପରିବାରବର୍ଗଙ୍କଠାରୁ ଆବଶ୍ୟକ ତଥ୍ୟ ଯୋଗାଡ଼ କରି ପାଣିଗ୍ରାହୀ ଏହି ଜନସ୍ବାର୍ଥ ମାମଲା ଦାଏର କରିଛନ୍ତି। ପ୍ରତ୍ୟେକ ମାମଲାରେ ପ୍ରଭାବଶାଳୀ ଲୋକମାନେ ଜଡିତ ଅଛନ୍ତି। ତେଣୁ ସମସ୍ତ ମାମଲାର ତଦନ୍ତ ସିବିଆଇ ମାଧ୍ୟମରେ କରିବା ପାଇଁ ଆବେଦନକାରୀ ହାଇକୋର୍ଟଙ୍କୁ ନିବେଦନ କରିଛନ୍ତି। ଆଇନଜୀବୀ ସୁବ୍ରତ କୁମାର ନାୟକ ମାମଲା ପରିଚାଳନା କରୁଛନ୍ତି।
