କୋଲକାତା,୭।୭: ଦେଶର ପ୍ରାୟ ସମସ୍ତ ରାଜ୍ୟରେ ପେଟ୍ରୋଲ ଲିଟର ପିଛା ୧୦୦ ଟଙ୍କା ପାର କରିଛି। ଏଥି ନେଇ ବୁଧବାର କେନ୍ଦ୍ର ମନ୍ତ୍ରିମଣ୍ଡଳର ସମ୍ପ୍ରସାରଣ କରୁଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସମାଲୋଚନା କରିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ। ଦେଶବାସୀଙ୍କୁ ‘ମନ କି ବାତ୍’ ନୁହେଁ ପେଟ୍ରୋଲ ଓ ଭାକ୍ସିନ କି ବାତ୍ ଦରକାର ବୋଲି ମମତା କହିଛନ୍ତି।
ପେଟ୍ରୋଲ ଓ ଜିଜେଲ ବିକ୍ରି ଉପରେ ଟ୍ୟାକ୍ସ ଲଗାଇ କେନ୍ଦ୍ର ସରକାର ୩.୭୧ ଲକ୍ଷ ଟଙ୍କା ରାଜସ୍ବ ଆଦାୟ କରିଛନ୍ତି। ଏହି ଅର୍ଥକୁ କୋଭିଡ୍-୧୯ ଟିକାକରଣ କ୍ଷେତ୍ରରେ ବ୍ୟବହାର କରୁ ନାହାନ୍ତି। କ୍ୟାବିନେଟ୍ର ସମ୍ପ୍ରସାରଣ ବଦଳରେ ପ୍ରଧାନମନ୍ତ୍ରୀ ଦେଶର ସ୍ବାସ୍ଥ୍ୟସେବା ଓ ଅର୍ଥନୀତି ଉପରେ ଗୁରୁତ୍ୱ ଦିଅନ୍ତୁ ବୋଲି କହିଛନ୍ତି ଟିଏମ୍ସି ସୁପ୍ରିମୋ।
” ମୋଦି ସରକାର ତୈଳ ଉପରେ ଟ୍ୟାକ୍ସ ବାବଦକୁ ୩.୭୧ ଲକ୍ଷ କୋଟି ଟଙ୍କା ଆୟ କରିଛି। ଏହି ଟଙ୍କା ଗଲା କୁଆଡ଼େ। ସେ କେବଳ ‘ମନ କି ବାତ୍’ କରୁଛନ୍ତି। କାହିଁକି ପେଟ୍ରୋଲ ଓ ଡିଜେଲ ଉପରେ କହୁନାହାନ୍ତି। ସେ କେବଳ ମୋତେ ଅପମାନ ଦିଅନ୍ତି। ଗ୍ୟାସ ଦର ଉପରେ ନଜର ପକାନ୍ତୁ। ଗତ ୧୪ ମାସରେ ଗ୍ୟାସ ଦର ୪୭ ପ୍ରତିଶତ ବଢ଼ିଛି। ପ୍ରଧାନମନ୍ତ୍ରୀ ଉଜ୍ୱାଲା ଯୋଜନର କ’ଣ ହେଲା। ଯଦି ଆମେ ସାମାଜିକ ଯୋଜନା ଆଣି ପାରୁଛୁ, ଆପଣ କାହିଁକି ଦେଇ ପାରିବେ ନାହିଁ। ସେ ଭାବୁଛନ୍ତି ସମ୍ପ୍ରସାରଣ କାମ ଦେବ। ‘ମନ କି ବାତ୍’ରେ ପେଟ୍ରୋଲ କଥା କୁହନ୍ତୁ। ମୁଁ ତୁମ ବିରୋଧରେ ନାହିଁ। କିନ୍ତୁ ଆମକୁ ସ୍ବାସ୍ଥ୍ୟ ଓ ଅର୍ଥନୀତି ଉପରେ ଧ୍ୟାନ ଦେବାକୁ ପଡ଼ିବ“ ବୋଲି ମମତା କହିଛନ୍ତି।
ଉଲ୍ଲେଖଯୋଗ୍ୟ, ମୁମ୍ବାଇ, ହାଇଦ୍ରାବାଦ, ଚେନ୍ନାଇ, ବେଙ୍ଗାଲୁରୁ ପରେ କୋଲକାତାରେ ମଧ୍ୟ ପେଟ୍ରୋଲ ଦର ୧୦୦ ଟଙ୍କା ଅତିକ୍ରମ କରିଛି।
