ବରଗଡ଼/ଗାଇସିଲେଟ୍,୨୪।୫(ପ୍ରେମାନନ୍ଦ ଖମାରୀ/ଦୁର୍ଗାପ୍ରସାଦ ତ୍ରିବେଦୀ): ବରଗଡ଼ ଜିଲା ପୋଲିସ ନିଶା କାରବାର ଧରପଗଡ଼ ଅଭିଯାନକୁ ଜୋରଦାର୍ କରିଛି । ଶନିବାର ଜିଲାର ଗାଇସିଲେଟ୍ ଥାନା ପୋଲିସ ୭୩୩ ବୋତଲ କଫ୍ ସିରପ ଜବତ କରିଛି। ଏହା ସହିତ କଫ୍ ସିରପ ଚାଲାଣରେ ବ୍ୟବହୃତ ଏକ କାର୍(ନଂ-ଓଆର21ଡି 9655) ଓ ଗୋଟିଏ ମୋବାଇଲକୁ ଜବତ କରାଯାଇଛି।
ସେହିପରି ଏଥିରେ ସମ୍ପୃକ୍ତ ୩ଅଭିଯୁକ୍ତଙ୍କୁ ପୋଲିସ ଗିରଫ କରିଛି । ଗିରଫ ଅଭିଯୁକ୍ତମାନେ ହେଲେ, ଗାଇସିଲେଟ୍ ଥାନା କନ୍ଦୁମୁଣ୍ଡା ଗ୍ରାମର ସୁପଳ ସାହୁ(୩୫), ରାଇସଲପଦର ଗ୍ରାମର ଉତ୍ତର ବରିହା(୨୪) ଏବଂ ସୁଶାନ୍ତ ସାହୁ(୩୦)। ଅନ୍ୟ ୨ଅଭିଯୁକ୍ତ ରାଇସଲପଦର ଗ୍ରାମର ପ୍ରସନ୍ନ ସାହୁ ଏବଂ କନ୍ଦୁମୁଣ୍ଡା ଗ୍ରାମର ବିରେନ ସାହୁ ଫେରାର୍ ହୋଇଯାଇଥିବା ପୋଲିସ ସୂଚନା ଦେଇଛି। ଏ ନେଇ ଗାଇସିଲେଟ୍ ଥାନାରେ ଏକ ମାମଲା(ନଂ-117/26) ରୁଜୁ ହୋଇଛି।
ସୂଚନା ଅନୁଯାୟୀ, ଅଭିଯୁକ୍ତମାନେ ବଲାଙ୍ଗୀର ଜିଲା ଲୋଇସିଂହା ଅଞ୍ଚଳରୁ ବରଗଡ଼ ଜିଲା କନ୍ଦୁମୁଣ୍ଡା ଅଞ୍ଚଳକୁ ଉପରୋକ୍ତ କାର୍ ଯୋଗେ କଫ୍ ସିରପ ଚାଲାଣ କରୁଥିବା ନେଇ ପୋଲିସକୁ ଖବର ମିଳିଥିଲା। ସେହି ସୂଚନାକୁ ଆଧାର କରି ପୋଲିସର ଏକ ଟିମ୍ ସେଥିପ୍ରତି ନଜର ରଖିଥିଲା। ତେବେ କଫ୍ ସିରପ୍ ବୋଝେଇ କାର୍ଟି ଦ୍ରୁତବେଗରେ ଆସୁଥିବାବେଳେ ପୋଲିସ ଘେରିଯାଇ ସ୍ଥାନୀୟ ଲେବଡ଼ି ନାଳାରେ ସେହି କାର୍କୁ ଅଟକାଇ ଯାଞ୍ଚ କରିଥିଲା। ଯାଞ୍ଚବେଳେ ୫ଟି ପେପର୍ କାର୍ଟୁନରେ ୭୩୩ ବୋତଲ କଫ୍ ସିରପ ବୋଝେଇ ହୋଇ ରହିଥିବା ପୋଲିସ୍ ଦେଖିବାକୁ ପାଇଥିଲା। ଗାଇସିଲେଟ୍ ଅତିରିକ୍ତ ତହସିଲଦାର ଦେବାଶିଷ ମିଶ୍ରଙ୍କ ଉପସ୍ଥିତିରେ ପୋଲିସ କଫ୍ ସିରପ୍ ଏବଂ ବ୍ୟବହୃତ କାର୍କୁ ଜବତ୍ ସହିତ ୩ଅଭିଯୁକ୍ତଙ୍କୁ ଗିରଫ କରିଥିଲା। ତେବେ ଏହା ପୂର୍ବରୁ ଗିରଫ ଅଭିଯୁକ୍ତମାନଙ୍କ ମଧ୍ୟରୁ ଅଭିଯୁକ୍ତଙ୍କ ସୁପଳଙ୍କ ବିରୋଧରେ ୨ଟି, ଉତ୍ତରଙ୍କ ବିରୋଧରେ ୩ଟି ଏବଂ ସୁଶାନ୍ତଙ୍କ ବିରୋଧରେ ୨ଟି ମାମଲା ରହିଥିବା ପୋଲିସ ସୂଚନା ଦେଇଛି ।
