ନୂଆଦିଲ୍ଲୀ, ୬ା୫: ଭାରତରେ ଦୈନିକ କରୋନା ମୃତ୍ୟୁସଂଖ୍ୟା ରେକର୍ଡ ଭାଙ୍ଗି ଚାଲିଛି। ଯଦି ଏହି କ୍ରମାଗତ ଜାରି ରୁହେ ତେବେ ଆଗାମୀ କିଛି ସପ୍ତାହ ମଧ୍ୟରେ ଦେଶରେ ମୃତ୍ୟୁ ସଂଖ୍ୟା ଦ୍ୱିଗୁଣ ହୋଇପାରେ ବୋଲି ବାଙ୍ଗାଲୁରୁସ୍ଥିତ ଇଣ୍ଡିଆନ ଇନ୍ଷ୍ଟିଚ୍ୟୁଟ ଅଫ୍ ସାଇନ୍ସର ଏକ ବିଶେଷଜ୍ଞ ଟିମ୍ ଚେତାବନୀ ଦେଇଛନ୍ତି। ଜୁନ ୧୧ ସୁଦ୍ଧା ଭାରତରେ ୪,୦୪,୦୦୦ ନିକଟତର ହୋଇପାରେ ବୋଲି ଆଶଙ୍କା କରାଯାଇଛି। ଭାରତକୁ ସବୁଠୁ ବଡ ସ୍ବାସ୍ଥ୍ୟ ସଙ୍କଟରେ ପକାଇଥିବା କୋଭିଡ୍ର ଦ୍ୱିତୀୟ ଲହର ଆସନ୍ତା ସପ୍ତାହରେ ସ୍ଥିତି ଆହୁରି ଖରାପ କରିପାରେ। ଏପରିକି ଜୁଲାଇ ମାସ ଶେଷ ସୁଦ୍ଧା ଦେଶରେ ମୋଟ ମୃତ୍ୟୁସଂଖ୍ୟା ୧୦ ଲକ୍ଷ ପାର୍ କରିବାରେ ବୋଲି ୱାଶିଂଟନ୍ ବିଶ୍ୱବିଦ୍ୟାଳୟର ହେଲ୍ଥ ମେଟ୍ରିକ୍ସ ଆଣ୍ଡ ଇଭାଲ୍ୟୁଏଶନ ପ୍ରତିଷ୍ଠାନ ପକ୍ଷରୁ ଆକଳନ କରାଯାଇଛି।
ନୂଆ ସଂକ୍ରମିତଙ୍କ ମଧ୍ୟରୁ ଅଧା ଭାରତରେ
ଗତ ସପ୍ତାହରେ ବିଶ୍ୱରେ ରିପୋର୍ଟ ହୋଇଥିବା ନୂଆ କୋଭିଡ-୧୯ ମାମଲା ମଧ୍ୟରୁ ଅଧା କେବଳ ଭାରତରେ ବୋଲି ବୁଧବାର ବିଶ୍ୱ ସ୍ବାସ୍ଥ୍ୟ ସଙ୍ଗଠନ(ଡବ୍ଲ୍ୟୁଏଚ୍ଓ) କହିଛି। ସାପ୍ତାହିକ ମହାମାରୀ ସମ୍ବନ୍ଧୀୟ ରିପୋର୍ଟରେ ଡବ୍ଲ୍ୟୁଏଚ୍ଓ କହିଛି, ବିଶ୍ୱର ନୂଆ ମୋଟ ମାମଲା ମଧ୍ୟରୁ ୪୬ ପ୍ରତିଶତ ଏବଂ ଗତ ସପ୍ତାହରେ କରୋନାରେ ଆକ୍ରାନ୍ତ ହୋଇ ମୃତ୍ୟୁ ଘଟିଥିବା ଲୋକଙ୍କ ମଧ୍ୟରୁ ୨୫ ପ୍ରତିଶତ କେବଳ ଭାରତର ନାଗରିକ। କ୍ରମାଗତ ୧୪ ଦିନ ପାଇଁ ଦୈନିକ ସଂକ୍ରମଣ ୩ ଲକ୍ଷ ଉପରେ ରହୁଥିବାବେଳେ ବୁଧବାର ମୃତୁସଂଖ୍ୟା (୩,୭୮୦) ସର୍ବକାଳୀନ ରେକର୍ଡ କରିଛି।
ବେଙ୍ଗାଲୁରୁ: ୨ ନମୁନାରୁ ଗୋଟିଏ ପଜିଟିଭ୍
କର୍ନାଟକର ବେଙ୍ଗାଲୁରୁରେ କୋଭିଡ୍-୧୯ ସ୍ଥିତି ଚିନ୍ତାଜନକ ହୋଇଛି। କରୋନା ଟେଷ୍ଟ କରାଉଥିବା ପ୍ରତି ୨ ଜଣରେ ଜଣଙ୍କ ରିପୋର୍ଟ ପଜିଟିଭ୍ ଆସୁଛି। ସୋମବାର ଏହି ସହରରେ ପଜିଟିଭ ଚିହ୍ନଟ ହାର ସର୍ବକାଳୀନ ରେକର୍ଡ କରି ୫୫ ପ୍ରତିଶତରେ ପହଞ୍ଚିଥିଲା। ତେବେ ମଙ୍ଗଳବାର ଏଥିରେ ସାମାନ୍ୟ ସୁଧାର ଆସି ୩୩ ପ୍ରତିଶତ ହୋଇଥିଲା। ଏଠାରେ ସକ୍ରିୟ ମାମଲା ୩ ଲକ୍ଷ ଟପିଛି। ମଙ୍ଗଳବାର ବେଙ୍ଗାଲୁରୁରୁ ୨୦,୮୭୦ ସଂକ୍ରମିତ ଚିହ୍ନଟ ହୋଇଥିଲା। କର୍ନାଟକରେ ମୋଟ ୨୯୨ ମୃତକଙ୍କ ମଧ୍ୟରୁ ୧୩୨ ଜଣ କେବଳ ବେଙ୍ଗାଲୁରର ରହିଥିଲେ।
