୭୦ ଦଶକର ହିଟ୍ ଅଭିନେତ୍ରୀଙ୍କ ମଧ୍ୟରୁ ଶଶିକଳା ଅନ୍ୟତମ। ସେ ବଲିଉଡ୍ର ଅନେକ ଫିଲ୍ମରେ ଅଭିନୟ କରିଥିଲେ। ଶଶିଙ୍କ ସମ୍ପୂର୍ଣ୍ଣ ନାମ ହେଉଛି ଶଶିକଳା ଜାଭଲକର। ଶଶି ଏକ ମରାଠୀ ପରିବାରର ଥିଲେ। ତାଙ୍କ ଜୀବନ ଉତ୍ଥାନପତନରେ ପରିପୂର୍ଣ୍ଣ ଥିଲା। ଅଭିନେତ୍ରୀ ହେବା ପୂର୍ବରୁ ସେ ଲୋକଙ୍କ ଘରେ ଚାକରାଣୀ ଭାବରେ କାମ କରିଥିବା କୁହାଯାଏ। ବହୁ ସଂଘର୍ଷ ପରେ ସେ ଚଳଚ୍ଚିତ୍ରରେ କାମ ପାଇଥିଲେ।
ଶଶିକଳାଙ୍କ ପରିବାର ବହୁତ ଧନୀ ଥିଲେ। ତାଙ୍କ ବାପା ଜଣେ ବଡ଼ ବ୍ୟବସାୟୀ ଥିଲେ। ମାତ୍ର ସେ ଗୀତ ଏବଂ ଅଭିନୟକୁ ଭଲ ପାଉଥିଲେ। ତେଣୁ ସେ ସୋଲାପୁର ଜିଲାର ଅନେକ ସହରରେ ଷ୍ଟେଜ ଶୋ କରିଥିଲେ। ତାଙ୍କୁ ସେତେବେଳେ ମାତ୍ର ୫ ବର୍ଷ ହୋଇଥିଲା। ଏପରି ଏକ ସମୟ ଆସିଲା ଯେତେବେଳେ ତାଙ୍କ ବାପା ଦରିଦ୍ର ହୋଇଗଲେ। ତାଙ୍କ ପକ୍ଷେ ବଞ୍ଚିବା କଷ୍ଟକର ହୋଇଗଲା। ପରେ ତାଙ୍କ ପରିବାର ମୁମ୍ବାଇ ପଳାଇ ଆସିଲେ।
ସେ ଏକ ସାକ୍ଷାତ୍କାରରେ କହିଥିଲେ, ମୋ ବାପା ତାଙ୍କ ପୂରା ରୋଜଗାର ଟଙ୍କାକୁ ସାନଭାଇଙ୍କ ନିକଟକୁ ପଠାଉଥିଲେ। ଭାଇ ଲଣ୍ଡନରେ ରହି ପଢ଼ୁଥିଲା। ଆମେ ୬ ଜଣ ଭାଇଭଉଣୀ ଥିଲୁ । ଏକ ସମୟ ଆସିଗଲା ଯେତେବେଳେ ତାଙ୍କ ସାନଭାଇ ବହୁତ ଭଲ ଚାକିରି ପାଇଲା। କିନ୍ତୁ ପରେ ସେ ଆମ ପରିବାରକୁ ଭୁଲିଗଲା। ମୋ ବାପା ଦେବାଳିଆ ହୋଇଗଲେ। ସେହି ଦିନଗୁଡ଼ିକ ବହୁତ କଷ୍ଟସାଧ୍ୟ ଥିଲା। ଆମକୁ ୮ ଦିନ ପର୍ଯ୍ୟନ୍ତ ଖାଦ୍ୟ ମିଳି ନ ଥିଲା। ଅମେ ଚାହିଁଥାଉ ମଧ୍ୟାହ୍ନଭୋଜନ ପାଇଁ କିଏ ଆମକୁ ନିମନ୍ତ୍ରଣ କରନ୍ତା କି।
ତେବେ ସେ ମୁମ୍ବାଇରେ କାମ ପାଇବା ପାଇଁ ବହୁତ ଚେଷ୍ଟା କରିଥିଲେ ମଧ୍ୟ କୌଣସି କାମ ପାଇପାରି ନ ଥିଲେ। ବାଧ୍ୟହୋଇ ଲୋକଙ୍କ ଘରେ କାମ କରିବା ଆରମ୍ଭ କଲେ। ‘ଚାକରାଣୀ ଭାବରେ କାମ କରୁଥିବାବେଳେ ସେ ଜଣେ ଅଭିନେତ୍ରୀ ତଥା ଗାୟକ ନୁରଜାହାନଙ୍କୁ ଭେଟିଥିଲେ । ନୁରଜାହାନ ତାଙ୍କ ସ୍ବାମୀଙ୍କୁ ଶଶିିକଳାଙ୍କୁ ଏକ ଫିଲ୍ମରେ କାମ ଦେବାକୁ କହିଥିଲେ। ଏହିପରି ଭାବରେ ୧୯୪୫ ମସିହାରେ ‘ଜିନତ୍’ ଫିଲ୍ମରେ କାମ କରିଥିଲେ। ଏହି ଫିଲ୍ମ ପାଇଁ ତାଙ୍କୁ ୨୫ ଟଙ୍କା ଦରମା ମିଳିଥିଲା। ଏହା ପରେ ସେ କ୍ରମାଗତ ଭାବରେ ଅନେକ ଫିଲ୍ମରେ କାମ କରି ସଫଳତା ପାଇଥିଲେ।
