ଭୁବନେଶ୍ୱର,୨୫।୫: ଭାଜପାରେ ଆନୁଷ୍ଠାନିକ ଭାବେ ଯୋଗଦାନ କରିବା ପରେ ଦେବାଶିଷ ସାମନ୍ତରାୟ ନିଜର ପ୍ରଥମ ପ୍ରତିକ୍ରିୟା ଦେଇଛନ୍ତି। ସେ କହିଛନ୍ତି ଯେ, ପ୍ରଧାନମନ୍ତ୍ରୀଙ୍କ ବ୍ୟକ୍ତିତ୍ୱ ଓ କାର୍ଯ୍ୟଶୈଳୀରେ ପ୍ରଭାବିତ ହୋଇ ସେ ଭାଜପାରେ ଯୋଗ ଦେବାକୁ ସିଦ୍ଧାନ୍ତ ନେଇଥିଲେ।
ଏହା ସହ ସେ କହିଥିଲେ ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଦେଶ ସହିତ ଓଡ଼ିଶା ମଧ୍ୟ ବିକାଶର ପଥରେ ଆଗକୁ ବଢ଼ୁଛି। ଏହି ଭିଜନର ଅଂଶୀଦାର ହେବା ପାଇଁ ସେ ଭାଜପାକୁ ଚୟନ କରିଛନ୍ତି।ସେ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇ କହିଛନ୍ତି ଯେ, “ଗୁଣ୍ଡୁଚି ମୂଷା” ଭଳି ଛୋଟ ଭାବରେ ହେଉଥିଲେ ମଧ୍ୟ ଦେଶ ଓ ରାଜ୍ୟର ଉନ୍ନତିରେ ସହଯୋଗ କରିବା ପାଇଁ ସୁଯୋଗ ମିଳିଥିବାରୁ ସେ କୃତଜ୍ଞ।
ଏହା ସହିତ, ସେ ଆଗାମୀ ଦିନରେ ଓଡ଼ିଶାରେ ଭାଜପା ପାଇଁ ନିଷ୍ଠାର ସହ କାମ କରିବା ସହ ଦଳକୁ ଆହୁରି ସୁଦୃଢ଼ କରିବାକୁ ସଂକଳ୍ପ ବୋଲି କହିଛନ୍ତି।
ସୂଚନାଯୋଗ୍ୟ, ସୋମବାର ବିଜେଡିରୁ ଇସ୍ତଫା ଦେବା ସହ ଏମ୍ପି ପଦରୁ ଇସ୍ତଫା ଦେଇଥିଲେ ରାଜ୍ୟସଭା ଏମ୍ପି ଦେବାଶିଷ ସାମନ୍ତରାୟ। ବିଜେଡିର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇ ଦଳର ସଭାପତି ନବୀନ ପଟ୍ଟନାୟକଙ୍କୁ ସେ ତାଙ୍କ ଇସ୍ତଫା ପତ୍ର ପଠାଇଥିଲେ। ଏହାର କିଛି ସମୟ ପରେ ସେ ଉପରାଷ୍ଟ୍ରପତି ସି.ପି. ରାଧାକ୍ରିଷ୍ଣନ୍ଙ୍କୁ ରାଜ୍ୟ ସଭା ସଦସ୍ୟ ପଦରୁ ଇସ୍ତଫା ପତ୍ର ଦେଇଥିଲେ। ଦେବାଶିଷଙ୍କ ଏଭଳି ପଦକ୍ଷେପ କଟକ ରାଜନୀତିର ଚର୍ଚ୍ଚାର ବିଷୟ ପାଲଟିଛି। ଦେବାଶିଷ ଭାଜପାରେ ଯୋଗଦେବା ନେଇ ଅନୁମାନ କରାଯାଉଥିବାବେଳେ ସେ ମଧ୍ୟ ଏ ନେଇ ସବୁଜ ସଙ୍କେତ ଦେଇଥିଲେ।
ଏ ବାବଦରେ ଦେବାଶିଷ କହିଛନ୍ତି, ସେ ରାଷ୍ଟ୍ରୀୟ ଦଳରେ ଯୋଗଦେବାକୁ ଯାଉଛନ୍ତି। ଦଳର ମୁଖ୍ୟଙ୍କଠାରୁ ଆଶ୍ୱାସନା ପାଇଛନ୍ତି ଏବଂ ଖୁବ୍କମ୍ ସମୟରେ ସେଥିରେ
ଯୋଗ ଦେବା ସମ୍ପର୍କରେ ସମସ୍ତେ ଜାଣିପାରିବେ।
