ଧର୍ମଶାଳା, ୨୬ା୫: ଆଜି ଚଳିତ ଆଇପିଏଲ୍ର କ୍ୱାଲିଫାୟର-୧ ମହାମୁକାବିଲା। ଡିଫେଣ୍ଡିଂ ଚାମ୍ପିୟନ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ(ଆର୍ସିବି) ଏବଂ ଗୁଜରାଟ ଟାଇଟନ୍ସ(ଜିଟି) ପରସ୍ପରକୁ ଭେଟିବେ। ଏହି ମ୍ୟାଚ୍ର ବିଜେତା ସିଧାସଳଖ ଫାଇନାଲରେ ପ୍ରବେଶ କରିବ ଏବଂ ପରାଜିତ ହୋଇଥିବା ଦଳ ଶୁକ୍ରବାର କ୍ୱାଲିଫାୟର-୨ ମ୍ୟାଚ୍ରେ ଏଲିମିନେଟର ବିଜେତା ଦଳକୁ ଭେଟିବ।
ଉଭୟ ଦଳ ଲିଗ୍ ପର୍ଯ୍ୟାୟରେ ୧୪ ମ୍ୟାଚ୍ରୁ ୧୮ ପଏଣ୍ଟ ହାସଲ କରିଥିଲେ। ହେଲେ ଆର୍ସିବି ଅପେକ୍ଷାକୃତ ଭଲ ନେଟ୍ ରନରେଟ୍ ଯୋଗୁ ଶୀର୍ଷରେ ରହିଥିଲା। ଦୀର୍ଘ ୧୮ ବର୍ଷର ଅପେକ୍ଷା ପରେ ଗତ ସଂସ୍କରଣରେ ପ୍ରଥମ ଥର ଚାମ୍ପିୟନ ହୋଇଥିବା ଆର୍ସିବି ତା’ର ଦ୍ୱିତୀୟ ଟାଇଟଲଠାରୁ ଦୁଇ ପାଦ ଆଗରେ ରହିଛି।
ଳିତ ଆଇପିଏଲ୍ରେ ଆର୍ସିବି ଓ ଗୁଜରାଟ ସବୁଠୁ ସମ୍ପୂର୍ଣ୍ଣ ଦଳ। ଅଧିନାୟକ ରଜତ ପଟିଦାରଙ୍କ ନେତୃତ୍ୱରେ ଆର୍ସିବି ଆଟାକିଂ ବ୍ୟାଟିଂ ଓ ଗତ ସିଜନ ଅପେକ୍ଷା ଉନ୍ନତ ବୋଲିଂ ୟୁନିଟ୍ ଦମରେ ପ୍ଲେଅଫ୍ରେ ସ୍ଥାନ ପକ୍କା କରିଛି। ଡିଫେଣ୍ଡିଂ ଚାମ୍ପିୟନ ଦଳ ବାରମ୍ବାର ୨୦୦ ଅତିକ୍ରମ କରିଛି। ଦଳର ଆଇକନ ବିରାଟ କୋହଲି ବ୍ୟାଟରେ ଭଲ ପ୍ରଦର୍ଶନ ବରୁଥିବା ବେଳେ ଜୋଶ ହାଜେଲଉଡ୍ ଓ ଭୁବନେଶ୍ୱର କୁମାରଙ୍କ ପେସ ଯୋଡ଼ିର ପ୍ରଦର୍ଶନ ଉଚ୍ଚକୋଟୀର ରହିଛି। ଘର ବାହାରେ ଜିତିବା ଓ ମ୍ୟାଚ୍ର ଠିକଣା ସମୟରେ ଖେଳାଳିଙ୍କ ଦାୟିତ୍ୱର ସହ ପ୍ରଦର୍ଶନ ଯୋଗୁ ଲିଗ୍ ପର୍ଯ୍ୟାୟରେ ଦଳ ସ୍ଥିର ପ୍ରଦର୍ଶନ କରିଥିଲା। ପୂର୍ବରୁ ଆର୍ସିବି ଧର୍ମଶାଳାରେ ପଞ୍ଜାବ କିଙ୍ଗ୍ସକୁ ହରାଇଥିଲା। ଏଣୁ ଆର୍ସିବି ଫାଇଦାରେ ରହିପାରେ।
ଅନ୍ୟପକ୍ଷରେ ଗୁଜରାଟ ତା’ର ଘାତକ ବୋଲିଂ ୟୁନିଟ୍ ଓ ଟପ୍ ଅର୍ଡର ବ୍ୟାଟରଙ୍କ ପ୍ରଦର୍ଶନ ବଳରେ ଏପର୍ଯ୍ୟନ୍ତ ପହଞ୍ଚିଛି। ଅଧିନାୟକ ଶୁବମନ ଗିଲ, ସାଇ ସୁଦର୍ଶନ ଓ ଜୋଶ ବଟଲର ଦଳକୁ ଆବଶ୍ୟକ ଥିବା ଦୃଢ଼ତା ଓ ଦ୍ରୁତ ଗତିରେ ରନ ପ୍ରଦାନ କରିଛନ୍ତି। ମାତ୍ର ମହମ୍ମଦ ସିରାଜ, କାଗିସୋ ରାବାଡା, ପ୍ରସିଦ୍ଧ କ୍ରିଷ୍ଣା ନୂଆ ବଲରେ ପ୍ରତିପକ୍ଷ ଦଳକୁ ସମସ୍ୟାରେ ପକାଉଥିବା ବେଳେ ରଶିଦ ଖାନ ଓ ବାମହାତୀ ସ୍ପିନର ଆର ସାଇ କିଶୋର ମଧ୍ୟ ଓଭରକୁ ନିୟନ୍ତ୍ରଣ କରୁଛନ୍ତି। ଗୁଜରାଟ ତା’ର ଅନ୍ତିମ ମ୍ୟାଚ୍ରେ ଚେନ୍ନାଇ ସୁପର କିଙ୍ଗ୍ସ ୮୯ ରନରେ ପରାସ୍ତ କରି ନକ୍ଆଉଟ୍ରେ ପ୍ରବେଶ କରିଥିଲା।
