୬୦୦ ବର୍ଷ ପୂର୍ୱେ ରଚିତ ଭବିଷ୍ୟବାଣୀ ଗ୍ରନ୍ଥ ‘ମାଳିକା’କୁ ନେଇ ଏବେ ସାରା ଦେଶରେ ଚର୍ଚ୍ଚା ଜୋର୍ ଧରିଛି। ବିଶ୍ୱରେ ଚାଲିଥିବା ଯୁଦ୍ଧ ପରିସ୍ଥିତି, ପ୍ରାକୃତିକ ବିପର୍ଯ୍ୟୟ ଏବଂ ପୃଥିବୀର ସଂକଟକୁ ନେଇ ମାଳିକା ବିଶାରଦ ଏବଂ ଜ୍ୟୋତିଷମାନେ ବଡ଼ ବୟାନ ଦେଇଛନ୍ତି।
ମାଳିକା ବିଶାରଦମାନଙ୍କ ଅନୁଯାୟୀ, ଆଗାମୀ ସମୟ (୨୦୨୫ ରୁ ୨୦୨୮ ମଧ୍ୟରେ) ପୃଥିବୀ ପାଇଁ ଅତ୍ୟନ୍ତ ସଂକଟଜନକ ହେବ। ମାଳିକାରେ ଉଲ୍ଲେଖ ଅଛି ଯେ, ବିଶ୍ୱ ଏକ ଭୟଙ୍କର ତୃତୀୟ ବିଶ୍ୱଯୁଦ୍ଧ (World War 3) ଆଡ଼କୁ ଅଗ୍ରସର ହେଉଛି। ଏହି ଯୁଦ୍ଧ ପ୍ରାରମ୍ଭରେ ପାରମ୍ପରିକ ଅସ୍ତ୍ରଶସ୍ତ୍ରରେ ଆରମ୍ଭ ହୋଇ ପରେ ପରମାଣୁ ଯୁଦ୍ଧରେ (Nuclear War) ପରିଣତ ହେବ, ଯାହା ସାରା ବିଶ୍ୱକୁ ମହାବିନାଶ ଆଡ଼କୁ ଠେଲିଦେବ। ଚୀନ ଏବଂ କିଛି ଇସଲାମିକ ଦେଶ ଭାରତ ବିରୋଧରେ ସମ୍ମୁଖୀନ ହୋଇପାରନ୍ତି ବୋଲି ଭବିଷ୍ୟବାଣୀ କରାଯାଇଛି।
ଜ୍ୟୋତିଷ ଶାସ୍ତ୍ର ଅନୁଯାୟୀ, ଗ୍ରହରାଜ ଶନିଦେବ ମୀନ ରାଶିର ‘ଉତ୍ତରାଭାଦ୍ରପଦ’ ନକ୍ଷତ୍ରରେ ପ୍ରବେଶ କରିବା ପରେ ବିଶ୍ୱରେ ଅଶାନ୍ତି ଏବଂ ପ୍ରାକୃତିକ ବିପର୍ଯ୍ୟୟ ବୃଦ୍ଧି ପାଇଛି। ଇତିହାସ ସାକ୍ଷୀ ଅଛି ଯେ, ଯେତେବେଳେ ଏଭଳି ଗ୍ରହ ସଂଯୋଗ ହୋଇଛି, ସେତେବେଳେ ବିଶ୍ୱଯୁଦ୍ଧ (୧୯୩୯) କିମ୍ୱା ଭାରତ-ପାକିସ୍ତାନ ଯୁଦ୍ଧ (୧୯୫) ଭଳି ବଡ଼ ଘଟଣା ଘଟିଛି। ଆଗାମୀ ୨୦୩୧ ପର୍ଯ୍ୟନ୍ତ ସମୟ ଅତ୍ୟନ୍ତ ସଂକେତପୂର୍ଣ୍ଣ ବୋଲି କେତେକ ବରିଷ୍ଠ ଜ୍ୟୋତିଷ ମଧ୍ୟ ମତ ଦେଇଛନ୍ତି।
ମାଳିକାରେ ବଙ୍ଗୋପସାଗର ଅଞ୍ଚଳରେ ଏକ ବଡ଼ ପ୍ରାକୃତିକ ଧ୍ୱଂସଲୀଳା ନେଇ ଆଶଙ୍କା ପ୍ରକାଶ କରାଯାଇଛି। ଏହା ସହିତ ମହାକାଶରୁ ଆସୁଥିବା ଗ୍ରହ ସଂକଟ (ସେଥିମଧ୍ୟରୁ ଗୋଟିଏ ହେଉଛି ଆଷ୍ଟେରଏଡ ଆପୋଫିସ – Asteroid Apophis) ପୃଥିବୀର ଅତି ନିକଟ ଦେଇ ଗତି କରିବା ସମୟରେ ବଡ଼ ଧରଣର ଭୂକମ୍ପ, ସୁନାମି ଏବଂ ବାତ୍ୟାର କାରଣ ହୋଇପାରେ, ଯାହା ଉପକୂଳବର୍ତ୍ତୀ ଅଞ୍ଚଳଗୁଡ଼ିକୁ ବୁଡ଼ାଇ ଦେବାର କ୍ଷମତା ରଖେ।
ମାଳିକା ଅନୁଯାୟୀ, କେବଳ ଯୁଦ୍ଧ ନୁହେଁ, ପୃଥିବୀର ବିନାଶର ଆଉ ଏକ ବଡ଼ କାରଣ ହେବ ମାନବ ସମାଜର ନୈତିକ ପତନ। କୋଭିଡ-୧୯ ଠାରୁ ମଧ୍ୟ ଅଧିକ ଭୟଙ୍କର ଏବଂ ଅଦୃଶ୍ୟ ରୋଗ ବ୍ୟାପିବ, ଯାହାର ଚିକିତ୍ସା ବିଜ୍ଞାନ ପାଖରେ ନଥିବ।
ଇରାନ, ଇସ୍ରାଏଲ ଏବଂ ଆମେରିକା ମଧ୍ୟରେ ଚାଲିଥିବା ଉତ୍ତେଜନା ସ୍ପଷ୍ଟ ସଂକେତ ଦେଉଛି ଯେ ମାଳିକାର ୬୦୦ ବର୍ଷର ଭବିଷ୍ୟବାଣୀ ସତ ହେବାକୁ ଯାଉଛି ଏବଂ ପୃଥିବୀର ଏକ ବଡ଼ ଭାଗ ଧ୍ୱଂସ ପାଇବ।
ଅନ୍ୟପଟେ, ପାରମ୍ପରିକ ଜ୍ୟୋତିଷମାନେ ଏହି ମହାବିନାଶ ବା ପୃଥିବୀ ସମ୍ପୂର୍ଣ୍ଣ ଧ୍ୱଂସ ହେବା ଦାବିକୁ ସମ୍ପୂର୍ଣ୍ଣ ରୂପେ ଖଣ୍ଡନ କରିଛନ୍ତି। ସେମାନଙ୍କ ମତରେ, ଗ୍ରହ ନକ୍ଷତ୍ରର ପ୍ରଭାବ ଯୋଗୁଁ ଯୁଦ୍ଧ ଏବଂ ବିପର୍ଯ୍ୟୟ ଘଟିଥାଏ ସତ, କିନ୍ତୁ ଏହା ଦ୍ୱାରା ପୃଥିବୀ ସମ୍ପୂର୍ଣ୍ଣ ଶେଷ ହେବ ନାହିଁ, ବରଂ ଏହା ଏକ ’ଯୁଗ ପରିବର୍ତ୍ତନ’ ବା ଶୁଦ୍ଧିକରଣର ପ୍ରକ୍ରିୟା।
