ବେଙ୍ଗାଲୁରୁ,୨୬।୫: କର୍ନାଟକ ରାଜନୀତିରୁ ଏକ ବଡ଼ ଖବର ସାମ୍ନାକୁ ଆସୁଛି। ମିଳିଥିବା ସୂଚନା ଅନୁଯାୟୀ, କର୍ନାଟକ ମୁଖ୍ୟମନ୍ତ୍ରୀ ସିଦ୍ଧାରାମୈୟା ନିଜ ପଦରୁ ଇସ୍ତଫା ଦେଇପାରନ୍ତି। ତାଙ୍କ ସ୍ଥାନରେ ରାଜ୍ୟର ବର୍ତ୍ତମାନର ଉପ-ମୁଖ୍ୟମନ୍ତ୍ରୀ ଡି.କେ. ଶିବକୁମାର (DK Shivakumar) କର୍ନାଟକର ନୂଆ ମୁଖ୍ୟମନ୍ତ୍ରୀ ହେବାର ସମ୍ଭାବନା ରହିଛି।
କର୍ନାଟକ କଂଗ୍ରେସ ମଧ୍ୟରେ ଚାଲିଥିବା ଆଭ୍ୟନ୍ତରୀଣ କନ୍ଦଳ ଏବଂ ନେତୃତ୍ୱ ପରିବର୍ତ୍ତନକୁ ନେଇ ଦୀର୍ଘ ଦିନ ହେବ ଚର୍ଚ୍ଚା ଚାଲିଥିଲା। ଏବେ କଂଗ୍ରେସ ହାଇକମାଣ୍ଡଙ୍କ ସହ ଆଲୋଚନା ପରେ ସିଦ୍ଧାରାମୈୟା ପଦ ଛାଡିବାକୁ ପ୍ରସ୍ତୁତ ଥିବା ଜଣାପଡିଛି।
ସୂତ୍ର ଅନୁସାରେ, ସରକାର ଗଠନ ସମୟରେ କଂଗ୍ରେସ ଶୀର୍ଷ ନେତୃତ୍ୱଙ୍କ ମଧ୍ୟରେ ଅଢେଇ ବର୍ଷ ଲେଖାଏଁ ମୁଖ୍ୟମନ୍ତ୍ରୀ ପଦ ବାଣ୍ଟିବା ନେଇ ଏକ ବୁଝାମଣା ହୋଇଥିଲା। ସେହି ଫର୍ମୁଲା ଅନୁଯାୟୀ ଏବେ ଡି.କେ. ଶିବକୁମାରଙ୍କୁ ଶାସନ ଭାର ମିଳିବାକୁ ଯାଉଛି।
କର୍ନାଟକ କଂଗ୍ରେସର ଅନେକ ବରିଷ୍ଠ ନେତା ଏବଂ ମନ୍ତ୍ରୀ ଦିଲ୍ଲୀ ଗସ୍ତ କରି ହାଇକମାଣ୍ଡଙ୍କ ସହ ଆଲୋଚନା କରିଛନ୍ତି। ଏହି ପରିପ୍ରେକ୍ଷୀରେ ମନ୍ତ୍ରୀମଣ୍ଡଳରେ ବଡ଼ ଧରଣର ଅଦଳବଦଳ ମଧ୍ୟ ଦେଖିବାକୁ ମିଳିପାରେ। ଯଦି ଏହି ପରିବର୍ତ୍ତନ ହୁଏ, ତେବେ ଦାକ୍ଷିଣାତ୍ୟରେ କଂଗ୍ରେସର ସବୁଠାରୁ ଶକ୍ତିଶାଳୀ ଗଡ଼ କୁହାଯାଉଥିବା କର୍ନାଟକରେ ଏକ ନୂଆ ରାଜନୈତିକ ଅଧ୍ୟାୟ ଆରମ୍ଭ ହେବ।
