ବରଗଡ଼,୨୭।୫(ପ୍ରେମାନନ୍ଦ ଖମାରୀ):ବରଗଡ଼ ସହର ଥାନାଛକ ସମ୍ମୁଖରେ ନିର୍ମିତ ଧନୁଯାତ୍ରା ମହୋତ୍ସବର ସ୍ଥାୟୀ ତୋରଣ ଭାଙ୍ଗିଯିବା ଘଟଣାକୁ ନେଇ ଅସନ୍ତୋଷ ତେଜିବାରେ ଲାଗିଛି। ନିମ୍ନମାନର କାମ ହୋଇଥିବା ଯୋଗୁ ଝଡ଼ବତାସରେ ତାହା ଭାଙ୍ଗି ଯାଇଥିବା ଅଭିଯୋଗ ହୋଇଛି। ଏଭଳି ଅଭିଯୋଗ କରି ଏହାର ବିଧିବଦ୍ଧ ତଦନ୍ତ ସହିତ ସମ୍ପୃକ୍ତ ଠିକାଦାର ଏବଂ ବିଭାଗୀୟ ଯନ୍ତ୍ରୀଙ୍କ ବିରୋଧରେ ଦୃଢ଼ କାର୍ଯାନୁଷ୍ଠାନ ନେବା ପାଇଁ ଦାବି ଜୋର୍ ଧରିଛି। ସୋମବାର ଖୋଦ୍ ବରଗଡ଼ ପୌର ପରିଷଦ ଅଧ୍ୟକ୍ଷା କଳ୍ପନା ମାଝୀ ସ୍ଥାନୀୟ ଟାଉନ ଥାନାରେ ଏତଲା ଦେଇ ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦାବି କରିଥିବାବେଳେ ମଙ୍ଗଳବାର ଆମ୍ ଆଦ୍ମୀ ପାର୍ଟି(ଏଏପି)ର ଏକ ପ୍ରତିନିଧି ଦଳ ଭିଜିଲାନ୍ସ ଡିଏସ୍ପି ଏବଂ ପୂର୍ବତନ ବିଧାୟକ ସାଧୁ ନେପାକଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଜିଲାପାଳଙ୍କ ନିକଟରେ ଫେରାଦ ହୋଇ ପୃଥକ୍ ଭାବେ ସ୍ମାରକପତ୍ର ପ୍ରଦାନ ସହିତ କାର୍ଯ୍ୟାନୁଷ୍ଠାନ ଦାବି କରିଛନ୍ତି।
ଏଏପି ତୋରଣ ଭାଙ୍ଗିବା ଘଟଣାର ଭିଜିଲାନ୍ସ ତଦନ୍ତ ଦାବି କରିଛି। ସମ୍ବଲପୁର ଭିଜିଲାନ୍ସ ଏସ୍ପିଙ୍କ ଉଦ୍ଦେଶ୍ୟରେ ପ୍ରଦାନ କରିଥିବା ସ୍ମାରକପତ୍ରରେ ଏଏପି ଉଲ୍ଲେଖ କରିଛି, ବରଗଡ଼ ଥାନାଛକରେ କୋଟିଏରୁ ଊର୍ଦ୍ଧ୍ୱ ଟଙ୍କା ବ୍ୟୟ ଅଟକଳରେ ଧନୁଯାତ୍ରାର ସ୍ଥାୟୀ ତୋରଣ ନିର୍ମାଣ କରାଯାଇଥିଲା। ନିମ୍ନମାନର କାମ ଯୋଗୁ ସୋମବାର ହୋଇଥିବା ସାମାନ୍ୟ ଝଡ଼ବତାସରେ ତାହା ଉଡ଼ି ଚୂରମାର୍ ହୋଇଯାଇଛି। ଏହି ତୋରଣ ନିର୍ମାଣରେ ବ୍ୟାପକ ଅନିୟମିତତା ହୋଇଥିବା ଏଏପି ଅଭିଯୋଗ କରିଛି। ବିନା ଟେଣ୍ଡରରେ କୋଟି କୋଟି ଟଙ୍କା ବ୍ୟୟ ଅଟକଳରେ ତୋରଣ ନିର୍ମାଣ ହୋଇଛି। ଏହାର ଭିଜିଲାନ୍ସ ତଦନ୍ତ କରାଗଲେ ଏହି ଅନିୟମିତତାରେ ସମ୍ପୃକ୍ତ ଅଧିକାରୀ ଧରାପଡ଼ିବେ ବୋଲି ଏଏପି ରାଜ୍ୟ ସମ୍ପାଦକ ଭବାନୀ ସାହୁ କହିଛନ୍ତି। ସେହିପରି ତୋରଣ ନିର୍ମାଣରେ ସମ୍ପୃକ୍ତ ପୂର୍ତ୍ତ ବିଭାଗର ଅଧିକାରୀମାନଙ୍କୁ ତୁରନ୍ତ ନିଲମ୍ବନ କରାଯିବା ସହିତ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବା ଏବଂ ସେଭଳି ତୋରଣଗୁଡ଼ିକୁ ବିପଦସଙ୍କୁଳ ବୋଲି ଘୋଷଣା କରିବା ପାଇଁ ମୁଖ୍ୟମନ୍ତ୍ରୀ, ପୂର୍ତ୍ତ ବିଭାଗ ମନ୍ତ୍ରୀ, ଆରଡିସି ଏବଂ ଜିଲାପାଳଙ୍କୁ ମଧ୍ୟ ଏଏପି ଲେଖି ଜଣାଇଛି ବୋଲି ସାହୁ କହିଛନ୍ତି। ସ୍ମାରକପତ୍ର ପ୍ରଦାନ ସମୟରେ ଏଏପି ରାଜ୍ୟ ସମ୍ପାଦକ ସାହୁଙ୍କ ସମେତ ଦଳର ଜିଲା ସଭାପତି ଯଦୁମଣି ପ୍ରଧାନ, ସମ୍ପାଦକ ସ୍ବରୂପ ଭୋଇ, ମେରିୟମ ବାର୍ଲା, ଜୟକ୍ରିଷ୍ଣା ଛୁରିଆ, ମୋଇନ ମହମ୍ମଦ, ଗୌତମ ମହାନନ୍ଦ, ସୁଦାମ ସାହୁ, ଅସିତ୍ ସାହୁ ପ୍ରମୁଖ ଉପସ୍ଥିତ ଥିଲେ। ସେହିପରି ପୂର୍ବତନ ବିଧାୟକ ସାଧୁ ନେପାକଙ୍କ ନେତୃତ୍ୱରେ ଅନ୍ୟ ଏକ ପ୍ରତିନିଧି ଦଳ ଜିଲାପାଳ ଆଦିତ୍ୟ ଗୋୟଲଙ୍କୁ ଫେରାଦ ହୋଇ ଅନ୍ୟ ଏକ ଦାବିପତ୍ର ପ୍ରଦାନ କରିଥିଲେ। ଅତିରିକ୍ତ ଜିଲାପାଳ ମହେନ୍ଦ୍ର ମହାପାତ୍ର ଦାବିପତ୍ର ଗ୍ରହଣ କରିଥିଲେ। ଦାବିପତ୍ରରେ ନେପାକ ଉଲ୍ଲେଖ କରିଛନ୍ତି, ଧନୁଯାତ୍ରା ତୋରଣ ଭାଙ୍ଗିବା ଏବଂ ଏହାଦ୍ୱାରା ୨ ରିକ୍ସାଚାଳକ ଆହତ ହେବା ଘଟଣା ଅତ୍ୟନ୍ତ ଦୁଃଖଦ ଓ ଚିନ୍ତାଜନକ। ନିର୍ମାଣ କାର୍ଯ୍ୟରେ ନିମ୍ନମାନର ସାମଗ୍ରୀ ବ୍ୟବହାର ଏବଂ ଗୁଣାତ୍ମକ ମାନରେ ଅବହେଳା ଯୋଗୁ ସେହି ତୋରଣ ଭାଙ୍ଗିପଡ଼ିଛି। ଅନ୍ୟ କେତେକ ସ୍ଥାନରେ ମଧ୍ୟ ଏଭଳି ତୋରଣ ନିର୍ମାଣ ହୋଇଥିବାରୁ ସେହି ତୋରଣର ଗୁଣବତ୍ତାକୁ ନେଇ ମଧ୍ୟ ସନ୍ଦେହ ହେବା ସହିତ ଲୋକଙ୍କ ମନରେ ଅସନ୍ତୋଷ ସୃଷ୍ଟି ହୋଇଛି ବୋଲି ନେପାକ କହିଛନ୍ତି। ଏହି ଦୃଷ୍ଟିରୁ ସମସ୍ତ ତୋରଣ କେତେ ସୁରକ୍ଷିତ ରହିଛି, ତୁରନ୍ତ ତା’ର ଯାଞ୍ଚ କରିବାକୁ ନେପାକ ଦାବି କରିଛନ୍ତି। ଏହା ସହିତ ତୋରଣ ଭାଙ୍ଗିବା ଘଟଣାରେ ଆହତ ରିକ୍ସା ଚାଳକଙ୍କ ସମସ୍ତ ଚିକିତ୍ସା ଖର୍ଚ୍ଚ ସରକାର ବହନ କରିବା, ତୋରଣ ଭାଙ୍ଗିବା ପରେ ପ୍ରଭାବିତ ରିକ୍ସାଚାଳକ ତଥା ରାସ୍ତାକଡ଼ ବ୍ୟବସାୟୀଙ୍କୁ କ୍ଷତିପୂରଣ ପ୍ରଦାନ, ତୋରଣ ନିର୍ମାଣରେ ଖର୍ଚ୍ଚ ହୋଇଥିବା ସମସ୍ତ ଟଙ୍କା ସମ୍ପୃକ୍ତ ଠିକାଦାରଙ୍କଠାରୁ ଅସୁଲ କରିବା ସହିତ ଠିକାଦାର ଏବଂ ବିଭାଗୀୟ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ମଧ୍ୟ ସ୍ମାରକପତ୍ରରେ ସେ ଦାବି କରିଛନ୍ତି। ଏହା ସହିତ କାଳବୈଶାଖୀ ଯୋଗୁ ପ୍ରଭାବିତ ଚାଷୀ ଏବଂ ଗରିବ ଲୋକଙ୍କୁ ସହାୟତା ପ୍ରଦାନ କରିବାକୁ ସେ ଦାବି କରିଛନ୍ତି। ନେପାକଙ୍କ ସହିତ ରାଜେଶ ମହାପାତ୍ର, ଅବଦୁଲ ଗଫାର ପ୍ରମୁଖ ଦାବିପତ୍ର ପ୍ରଦାନ ସମୟରେ ଉପସ୍ଥିତ ଥିଲେ।
Dharitri – Odisha’s No.1 Odia Daily
