କାଠମାଣ୍ଡୁ, ୩୧।୧:: ଏବେ ନେପାଳ ମହାକାଶ ଦୌଡ଼ରେ ସାମିଲ୍ ହେବାକୁ ଯାଉଛି। ୩୭ ବର୍ଷ ପରେ ଅନ୍ତର୍ଜାତୀୟ ଟେଲିକମ୍ୟୁନିକେଶନ ସଂଘ (ଆଇଟିୟୁ) ପକ୍ଷରୁ ମହାକାଶରେ ପୃଥିବୀ ଉପରେ ଉପଗ୍ରହ ପାଇଁ ନେପାଳକୁ ଏକ କକ୍ଷ ପଥ ପ୍ରଦାନ କରାଯାଇଛି। ଏହି କକ୍ଷ ପଥରେ ନେପାଳର ଉପଗ୍ରହ ଅବସ୍ଥାପିିତ ହୋଇପାରିବ। କକ୍ଷ ପ୍ରଦାନ ସମ୍ପର୍କିତ ଅନୁମତି ମିଳିବା ପରେ ନେପାଳ ଟେଲିକମ୍ୟୁନିକେଶନ କର୍ତ୍ତୃପକ୍ଷ (ଏନ୍ଟିଏ) ପ୍ରସ୍ତୁତି ଆରମ୍ଭ ହୋଇଛି। ୧୯୮୪ରେ ଏନେଇ ନେପାଳ ଆଇଟିୟୁ ନିକଟରେ ଆବେଦନ କରିଥିଲା। ଆଇଟିୟୁ ପକ୍ଷରୁ ଅର୍ବିଟାଲ ସ୍ଲଟ୍ ପ୍ରଦାନ କରାଯାଇଥିଲା। ତେବେ ପୃଥିବୀର ଉପରେ କକ୍ଷରେ ଅଧିକ ଉପଗ୍ରହ ରହିଥିବାରୁ ତଥା ପ୍ରଯ୍ୟାପ୍ତ ଟ୍ରାଫିକ୍ ଅଭାବରୁ ନେପାଳକୁ ଉପଗ୍ରହଣ ପ୍ରେରଣ ଲାଗି ଅନୁମତି ମିଳୁ ନ ଥିଲା। ଇତିମଧ୍ୟରେ ନେପାଳରେ ଯୋଗାଯୋଗ ବ୍ୟବସ୍ଥା ବୃଦ୍ଧି ପାଇଛି। ତେଣୁ ଉପଗ୍ରହ ଲାଗି କକ୍ଷ ପଥ ଯୋଗାଇ ଦେବାକୁ ଆଇଟିୟୁ ନିକଟରେ ୨୦୨୦ ସେପ୍ଟେମ୍ବରରେ ନେପାଳ ଆବେଦନ କରିଥିଲା। ନେପାଳର ଆବେଦନକୁ ଆଇଟିୟୁ ସ୍ବୀକୃତି ପ୍ରଦାନ କରିଛି। ଉପଗ୍ରହ ନିର୍ମାଣ କରିବା ଲାଗି ଚାଇନା, ଭାରତ, ବ୍ରିଟେନ୍, ଫ୍ରାନ୍ସ, ସିଙ୍ଗାପୁର, ୟୁଏଇ ଏବଂ ଜର୍ମାନୀ ଆଦି ଦେଶର ୯ଟି କମ୍ପାନୀଠାରୁ ନେପାଳ ଠିକା ଆହ୍ବାନ କରିଛି ବୋଲି ଏନ୍ଟିଏ ପକ୍ଷରୁ ମିନ୍ ପ୍ରସାଦ ଆରୟାଲ ସୂଚନା ଦେଇଛନ୍ତି। ମହାକାଶକୁ ଉପଗ୍ରହ ପ୍ରେରଣ ଦ୍ୱାରା ନେପାଳର ସଞ୍ଚାର ବ୍ୟବସ୍ଥା, ପ୍ରସାରଣ ତଥା ବିମାନ ଉଡ଼ାଣ ବ୍ୟବସ୍ଥାରେ ବିକାଶ ସମ୍ଭବ ହୋଇପାରିବ ବୋଲି ସେ କହିଛନ୍ତି।
