ମୁମ୍ବାଇ,୧୫।୧:କିମ୍ବଦନ୍ତୀ ବ୍ୟାଟ୍ସମ୍ୟାନ ସଚିନ ତେନ୍ଦୁଲକର ଘରୋଇ କ୍ରିକେଟରେ ପଦାର୍ପଣ କରିବାର ପ୍ରାୟ ୩୨ ବର୍ଷ ପରେ ମୁମ୍ବାଇ ପାଇଁ ସିନିୟର ସ୍ତରରେ ଖେଳିବାର ସୁଯୋଗ ପାଇଛନ୍ତି ପୁଅ ଅର୍ଜନ ତେନ୍ଦୁଲକର। ଚଳିତ ସୟଦ ମୁସ୍ତାକ ଅଲି ଟି୨୦ ଟୁର୍ନାମେଣ୍ଟରେ ହରିୟାଣା ବିପକ୍ଷରେ ଶୁକ୍ରବାର ଖେଳାଯାଇଥିବା ଗ୍ରୁପ୍ ଇ’ର ଏକ ମ୍ୟାଚ୍ରେ ମୁମ୍ବାଇ ପକ୍ଷରୁ ପ୍ରତିନିଧିତ୍ୱ କରି ଅର୍ଜୁନ ଘରୋଇ କ୍ରିକେଟ କ୍ୟାରିୟର ଆରମ୍ଭ କରିଛନ୍ତି।
ସଚିନ ପ୍ରଥମ ମ୍ୟାଚ୍ରେ ହିଁ ଶତକୀୟ ଇନିଂସ ଖେଳି ସଭିଙ୍କ ଦୃଷ୍ଟି ଆକର୍ଷଣ କରିଥିଲେ। ହେଲେ ପଦାର୍ପଣ ମ୍ୟାଚ୍ରେ ଅର୍ଜୁନଙ୍କ ପ୍ରଦର୍ଶନ ସଭିଙ୍କୁ ନିରାଶ କରିଛି। ୧୧ ନଂ କ୍ରମରେ ବ୍ୟାଟିଂ କରିଥିବା ଅର୍ଜୁନ ଖାତା ଖୋଲି ପାରି ନ ଥିବାବେଳେ ବୋଲିଂରେ ୩ ଓଭରରେ ୩୪ ରନ୍ ଦେଇ ଏକ ଉଇକେଟ ହାତେଇଥିଲେ। ମୁମ୍ବାଇ ପକ୍ଷରୁ ଧାର୍ଯ୍ୟ ୧୪୪ ରନ୍ର ବିଜୟଲକ୍ଷ୍ୟକୁ ହରିୟାଣା ୧୭.୪ ଓଭରରେ ୨ ଉଇକେଟ ହରାଇ ହାସଲ କରି ନେଇଥିଲା।
ଘରୋଇ କ୍ରିକେଟରେ ଗୋଟିଏ ମ୍ୟାଚ୍ ଖେଳିଥିବାରୁ ଜୁନିୟର ତେନ୍ଦୁଲକର ଏବେ ଆଇପିଏଲ ନିଲାମ ପ୍ରକ୍ରିୟାରେ ଭାଗ ନେବା ଲାଗି ଯୋଗ୍ୟତା ହାସଲ କରିଛନ୍ତି। ଉଲ୍ଲେଖଥାଉ କି, ଆଇପିଏଲ-୧୪ ପାଇଁ ଫେବୃୟାରୀରେ ନିଲାମ ପ୍ରକ୍ରିୟା ଅନୁଷ୍ଠିତ ହେବ। ନିୟମ ଅନୁସାରେ ଘରୋଇ କ୍ରିକେଟରେ ଅତିକମ୍ରେ ଗୋଟିଏ ମ୍ୟାଚ୍ ଖେଳିଥିବା କ୍ରିକେଟର ହିଁ ଆଇପିଏଲ ନିଲାମ ପ୍ରକ୍ରିୟା ଲାଗି ନାମ ଦେଇପାରିବେ।
