ଓ୍ବାଶିଂଟନ, ୧୨।୧୨(ପି.ଟି.): ଫାଇଜର ନିର୍ମିତ କୋଭିଡ୍-୧୯ ଟିକାକୁ ଜରୁରୀ ବ୍ୟବହାର ନିମନ୍ତେ ମଞ୍ଜୁରୀ ଦେବାକୁ ଆମେରିକା ସରକାରଙ୍କ ସ୍ବତନ୍ତ୍ର ପରାମର୍ଶଦାତା କମିଟି ସୁପାରିସ କରିଛି। ଗୁରୁବାର ୮ ଘଣ୍ଟାର ସର୍ବସାଧାରଣ ଶୁଣାଣି ପରେ ଖାଦ୍ୟ ଓ ଔଷଧ ପ୍ରଶାସନ (ଏଫ୍ଡିଏ)ର ଭାକ୍ସିନ୍ ଓ ଅନ୍ୟାନ୍ୟ ଆନୁଷଙ୍ଗିକ ଜୈବ ଉତ୍ପାଦ ପରାମର୍ଶଦାତା କମିଟି ଫାଇଜର ଭାକ୍ସିନ ସପକ୍ଷରେ ମତ ଦେଇଥିଲା। ଟିକାକୁ ମଞ୍ଜୁରୀ ଦେବା ସପକ୍ଷରେ ୧୭ ଭୋଟ ପଡ଼ିଥିବାବେଳେ ୪ ଜଣ ସଦସ୍ୟ ବିରୋଧ କରିଥିଲେ ଓ ଜଣେ ଅନୁପସ୍ଥିତ ଥିଲେ। ତେଣୁ ଟିକାକୁ ମଞ୍ଜୁରୀ ଦେବା ପାଇଁ ଅଧିକ ସମୟ ଲାଗିବା ସମ୍ଭାବନା ଥିବାରୁ ଏଫ୍ଡିଏର ପୂର୍ଣ୍ଣ ଅନୁମୋଦନ ଲାଗି ଫାଇଜର ପୁଣିଥରେ ଆବେଦନ କରିବ ବୋଲି ଜଣାପଡ଼ିଛି।
ଟିକାକରଣ ସଫଳତା ନେଇ ଡବ୍ଲ୍ୟୁଏଚ୍ଓର ଉଦ୍ୟମ
ଦକ୍ଷିଣ-ପୂର୍ବ ଏସିଆର ସଦସ୍ୟ ଦେଶଗୁଡ଼ିକରେ କୋଭିଡ୍-୧୯ ଟିକାକରଣକୁ ସଫଳ କରାଇବା ପାଇଁ ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ବିଭିନ୍ନ ସରକାର ଏବଂ ଟିକା ଉତ୍ପାଦନକାରୀ ସଂସ୍ଥା ସହ ଆଲୋଚନା କରିଛି। ଟିକାର ସୁଷମ ବଣ୍ଟନ ଓ କାର୍ଯ୍ୟକାରିତାରେ ଉତ୍ପାଦନକାରୀ ଓ ନିୟାମକ ସଂସ୍ଥାଗୁଡ଼ିକର ଗୁରୁତ୍ୱପୂର୍ଣ୍ଣ ଭୂମିକା ରହିଥିବା ଡବ୍ଲ୍ୟୁଏଚ୍ଓ ଦକ୍ଷିଣ-ପୂର୍ବ ଏସିଆ ଅଞ୍ଚଳର ଆଞ୍ଚଳିକ ନିର୍ଦ୍ଦେଶକ ଡ. ପୁନମ୍ ଖେତ୍ରପାଲ ସିଂ ଦୁଇଦିନିଆ ଭର୍ଚୁଆଲ ବୈଠକରେ କହିଛନ୍ତି। ଟିକାକରଣ ପାଇଁ କିପରି ପଞ୍ଜୀକରଣକୁ ତ୍ୱରାନ୍ବିତ କରାଯିବ ତାହା ଉପରେ ଗୁରୁତ୍ୱ ଦିଆଯାଇଥିଲା। ଉକ୍ତ ଅଞ୍ଚଳର ଜାତୀୟ କାର୍ଯ୍ୟକ୍ରମ, ଟିକା ପ୍ରକ୍ରିୟା ଏବଂ ନିୟାମକ ସଂସ୍ଥା ମଧ୍ୟରେ ସମନ୍ବୟ ବଢ଼ାଇବାକୁ ଲକ୍ଷ୍ୟ ରଖାଯାଇଛି। ଭାରତରୁ ସେରମ୍ ଇନ୍ଷ୍ଟିଚ୍ୟୁଟ୍ ଅଫ୍ ଇଣ୍ଡିଆ, ଭାରତ ବାୟୋଟେକ୍ ଇଣ୍ଟରନ୍ୟାଶନାଲ ଲିଃ, ବାୟୋଲୋଜିକାଲ୍ ଇ ଲିଃ,କାଡିଲା ହେଲ୍ଥ କେୟାର ଲିଃ, ଡ. ରେଡିସ୍ ଲାବରେଟୋରିଜ୍ ଏବଂ ଓକ୍ହାର୍ଡ ଲିମିଟେଡ୍ ପ୍ରମୁଖ ଆଲୋଚନାରେ ଭାଗ ନେଇଥିଲେ।
