ଯାଜପୁର ଅଫିସ,୧୧।୧୨: ଯାଜପୁର ଜିଲାର ବିଭିନ୍ନ ପ୍ରାଥମିକ କୃଷି ସେବା ସମବାୟ ସମିତି(ପ୍ୟାକ୍ସ)ରେ କାର୍ଯ୍ୟରତ ଡାଟା ଏଣ୍ଟ୍ରି ଅପରେଟର(ଡିଇଓ) ପଦବୀର ସ୍ଥାୟିତ୍ୱ ନେଇ ବିଭାଗୀୟ ପଦକ୍ଷେପ ଆରମ୍ଭ ହୋଇଛି। ଏହି ମର୍ମରେ ସମବାୟ ମନ୍ତ୍ରୀଙ୍କୁ ଜିଲାର ବିଞ୍ଝାରପୁର ବ୍ଲକ ଡିଇଓମାନଙ୍କ ଦରଖାସ୍ତ ଉପରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ୧ ସପ୍ତାହ ମଧ୍ୟରେ ରିପୋର୍ଟ ଦାଖଲ କରିବାକୁ ଗତ ୭ା୧୨ା୨୦୨୦ରେ ରାଜ୍ୟ ସମବାୟ ସମିତି ନିବନ୍ଧକ(ଆରସିଏସ୍)ଙ୍କ କାର୍ଯ୍ୟାଳୟରୁ ଡେପୁଟି ରେଜିଷ୍ଟ୍ରାର(କ୍ରେଡିଟ୍) ନିର୍ଦ୍ଦେଶ ଜାରି କରିଛନ୍ତି।
ସୂଚନାଯୋଗ୍ୟ, ତା୯ା୧୧ା୨୦୨୦ରିଖରେ ବିଞ୍ଝାରପୁର ବ୍ଲକର ଡିଇଓମାନେ ବିଞ୍ଝାରପୁର ବିଧାୟିକା ପ୍ରମିଳା ମଲ୍ଲିକଙ୍କ ଜରିଆରେ ସମବାୟ ବିଭାଗ ମନ୍ତ୍ରୀଙ୍କୁ ସେମାନଙ୍କ ପଦବୀ ସ୍ଥାୟିତ୍ୱକୁ ନେଇ ପଦକ୍ଷେପ ଗ୍ରହଣ କରିବାକୁ ଦାବି କରିଥିଲେ। ଏହି ଦାବିପତ୍ର ଉପରେ ବିଧାୟିକା ମଲ୍ଲିକ ତା୧୧ା୧୧ା୨୦୨୦ରିଖରେ ଖାଦ୍ୟ ଯୋଗାଣ ଓ ସମବାୟ ମନ୍ତ୍ରୀଙ୍କୁ ଚିଠି ଲେଖିଥିଲେ। ଏହାପରେ ସମବାୟ ବିଭାଗ ଅଧୀନ ସଚିବ ଡି.କେ. ମହାନ୍ତି ଗତ ୨୦ା୧୧ା୨୦୨୦ରେ ଆରସିଏସ୍ଙ୍କୁ ପତ୍ର ଲେଖି ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ନିର୍ଦ୍ଦେଶ ଦେଇଥିଲେ। ଏହି ଆଧାରରେ ଯାଜପୁର ମଣ୍ଡଳ ସହକାରୀ ନିବନ୍ଧକ ସମବାୟ ସମିତି ସମୂହ (ଏଆରସିଏସ୍)ଙ୍କୁ ଡିଇଓ ପଦବୀ ସ୍ଥାୟିତ୍ୱ ଉପରେ ଜବାବ ତଲବ କରିଛନ୍ତି।
ଡିଇଓମାନଙ୍କ ପକ୍ଷରୁ ଦାବିପତ୍ରରେ ଦର୍ଶାଯାଇଛି ଯେ, ୨୦୧୪-୧୫ ମସିହାରେ ସରକାରଙ୍କ ଦ୍ୱାରା ନିର୍ବାଚିତ ହୋଇଥିବା ସମିତିର ପରିଚାଳନା ପରିଷଦର ସଦସ୍ୟା/ସଦସ୍ୟମାନଙ୍କ ଦ୍ୱାରା ବିବେଚିତ ହୋଇ ପ୍ୟାକ୍ସରେ କମ୍ପ୍ୟୁଟରୀକରଣ କାର୍ଯ୍ୟ କରି ଆସୁଛନ୍ତି। କୃଷକ ପଞ୍ଜୀକରଣ, ଧାନ ସଂଗ୍ରହ, ପ୍ରଧାନମନ୍ତ୍ରୀ କୃଷି ବୀମା ଯୋଜନା, ମଞ୍ଜି ଓ ସାର ବିକ୍ରି ଆଦି କାର୍ଯ୍ୟ ସମ୍ପାଦନ କରି ଆସୁଛନ୍ତି। ତଥାପି ଡିଇଓମାନଙ୍କ ଭବିଷ୍ୟତ ଅନ୍ଧକାର ଭିତରେ ଗତି କରୁଛି। ଦୈନନ୍ଦିନ ପାରିଶ୍ରମିକ ବାବଦକୁ ପାଉଥିବା ଅର୍ଥରାଶି, ଆଜିର ସମୟରେ ନିଜର ଆବଶ୍ୟକତା ତଥା ପରିବାର ପ୍ରତିପୋଷଣରେ ସମସ୍ୟା ହେଉଛି। ତେଣୁ ଡିଇଓମାନଙ୍କ ସ୍ଥାୟିତ୍ୱ ନିମନ୍ତେ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ସେମାନେ ଦାବି କରିଥିଲେ।
