ଅନିଷ୍ଟ କରିଥିବା ବ୍ୟକ୍ତିଠାରୁ ସାପ ପ୍ରତିଶୋଧ ନିଏ ବୋଲି କୁହାଯାଏ। ଏହା କେତେ ସତ କେତେ ମିଛ କେହି ବି ଜାଣେନା। ମାତ୍ର ଏଭଳି ଏକ ଘଟଣାକ୍ରମରେ ଆନ୍ଧ୍ରପ୍ରଦେଶର ଚିତ୍ତୁର ଜିଲାର କୁମ୍ମାରା ଗୁଣ୍ଟା ଗ୍ରାମର ଜଣେ ବ୍ୟକ୍ତିଙ୍କ ସହ ଯାହା ହେଉଛି ତାହା ଜାଣିଲେ ଆପଣ କହିବେ ଏହା ସତ ବୋଲି। ବ୍ୟକ୍ତିଜଣଙ୍କ ହେଲେ ସୁବ୍ରମଣ୍ୟମ(୪୫)। ତାଙ୍କୁ ଥରେ କି ଦୁଇ ଥର ନୁହେଁ ବରଂ ୭୨ ଥର ସାପ କାମୁଡ଼ିସାରିଲାଣି।
ସୁବ୍ରମଣ୍ୟମ ୫ମ ଶ୍ରେଣୀରେ ପଢ଼ୁଥିବା ସମୟରେ ପ୍ରଥମ ଥର ପାଇଁ ସାପ ତାଙ୍କୁ କାମୁଡ଼ିଥିଲା। ଏହାପରେ ବର୍ଷକୁ ୨ଥର ତାଙ୍କୁ ସାପ କାମୁଡୁଛନ୍ତି। ପ୍ରତି ବର୍ଷ ଅମାବାସ୍ୟା ଦିନ ସାପ ତାଙ୍କ ଘର ସାମ୍ନାକୁ ଆସନ୍ତି। ଏଣୁ ସେଦିନ ସେ ବାହାରକୁ ଆସିବାକୁ ଡରନ୍ତି। ୩୨ ବର୍ଷ ଧରି ତାଙ୍କ ସହ ଏପରି ହୋଇଆସୁଛି। ଏହା ତାଙ୍କୁ ବହୁତ ଦୁଃଖ ଦେଇଥାଏ। ସାପମାନେ ତାଙ୍କଠାରୁ କେଉଁ କାରଣକୁ ନେଇ ପ୍ରତିଶୋଧ ନେଉଛନ୍ତି ତାହା ସେ ଜାଣି ନ ଥିବା କୁହନ୍ତି। ସାପଙ୍କ ଭୟ ଯୋଗୁ ସେ କାମ ପାଇଁ ବାହାରକୁ ଯାଇପାରି ନ ଥାନ୍ତି। ସେ ଜଣେ କୃଷକ। ବାରମ୍ବାର ସାପ କାମୁଡ଼ିବା ଯୋଗୁ ତାଙ୍କୁ ବର୍ଷକୁ ପ୍ରାୟ ୫୦ହଜାର ଟଙ୍କା ଖର୍ଚ୍ଚ କରିବାକୁ ପଡେ। ଏହା ତାଙ୍କ ପାଇଁ ଏବେ କଷ୍ଟକର ହୋଇପଡ଼ିଛି ବୋଲି ସୁବ୍ରମଣ୍ୟମ କହିଛନ୍ତି।
