ନୂଆଦିଲ୍ଲୀ,୨୯।୧୧: କେନ୍ଦ୍ର ସରକାରଙ୍କ କୃଷି ଆଇନ ବିରୋଧରେ ଦେଶର ଚାଷୀ ସଂଗଠନ ଏକଜୁଟ ହୋଇଛନ୍ତି। ଚାଷୀ ସଂଗଠନକୁ ଏବେ ସମାଜସେବୀ ଆନ୍ନା ହଜାରେ ସମର୍ଥନ କରିଛନ୍ତି। ସେ କହିଛନ୍ତି ଯେ, କୃଷି ଆଇନ୍କୁ ନେଇ କେନ୍ଦ୍ର ସରକାର ଏବଂ ଚାଷୀଙ୍କ ମଧ୍ୟରେ ଭାରତ ପାକିସ୍ତାନ ଭଳି ସ୍ଥିତି ସୃଷ୍ଟି ହୋଇଛି। ସରକାର ଚାଷୀଙ୍କ କଥା ଶୁଣିବା ଆବଶ୍ୟକ ବୋଲି ସେ କହିଛନ୍ତି। ଚାଷୀମାନେ ପାକିସ୍ତାନୀ ନୁହନ୍ତି। ସେମାନେ ଦେଶର ଅନ୍ନଦାତା ବୋଲି ଆନ୍ନା କହିଛନ୍ତି। ନିର୍ବାଚନ ସମୟରେ ସେମାନଙ୍କ ପାଖକୁ ଯେଉଁଭଳି ଭୋଟ ମାଗିବା ପାଇଁ ଯାଉଥିଲେ ତାହାକୁ ଦୃଷ୍ଟିରେ ରଖି ଏବେ ଚାଷୀଙ୍କ ସମସ୍ୟା ପ୍ରତି ଧ୍ୟାନଦେବା ଉଚିତ ବୋଲି ସେ କହିଛନ୍ତି। ଏବେ ଚାଷୀ ଅହିଂସା ମାର୍ଗରେ ଆନ୍ଦୋଳନ କରୁଛନ୍ତି। ଯଦି ସେମାନେ ହିଂସା ମାର୍ଗ ଆପଣେଇବେ ତାହାର ଦାୟିତ୍ୱ କିଏ ନେବ ବୋଲି ଆନ୍ନା ସରକାରଙ୍କୁ ପ୍ରଶ୍ନ କରିଛନ୍ତି। ପ୍ରବଳ ଥଣ୍ଡାରେ କରୋନା ମହାମାରୀ ସଂକ୍ରମଣ ସମୟରେ ଚାଷୀଙ୍କ ଉପରେ ପାଣି ବର୍ଷା କରାଗଲା। ଏହା ଠିକ ନୁହେଁ। ଚାଷୀ ଦେଶର ଶତ୍ରୁ ନୁହନ୍ତି। ସରକାର ସେମାନଙ୍କ ଦାବି ମାନିନେବା ଉଚିତ ବୋଲି ଆନ୍ନା କହିଛନ୍ତି।
