କରୋନା ମହାମାରୀ ସମୟରେ ସଂକ୍ରମଣକୁ ରୋକିବା ପାଇଁ ସମସ୍ତେ ଘରେ ରହିବାକୁ ଶ୍ରେୟ ମନେ କରୁଛନ୍ତି। ଏହି ବିଷମ ପରିସ୍ଥିତି ମଧ୍ୟରେ ଜିମ୍, ପାର୍କ କିମ୍ବା ବୁଲାବୁଲି ପାଇଁ ଯିବା ମଧ୍ୟ ବିପଦ। ତେଣୁ ଲୋକେ ଘରେ ରହି ଫିଟ୍ନେସ ପ୍ରତି ବିଶେଷ ଧ୍ୟାନ ଦେଉଛନ୍ତି। ଏଥିରୁ ବି ବାଦ୍ ପଡ଼ିନାହାନ୍ତି ଜଣେ ୮୨ ବର୍ଷୀୟା ବୃଦ୍ଧା। ଦୃଢ଼ ଇଚ୍ଛାଶକ୍ତି ଥିଲେ ସବୁ ଅସମ୍ଭବ ସମ୍ଭବ ହୋଇଥାଏ। ବୟସ କୌଣସି ପାଚେରି ହୋଇ ନ ଥାଏ। କେବଳ ଦୃଢ଼ ମନୋବଳ ହିଁ ଯଥେଷ୍ଟ। ବୃଦ୍ଧା ଜଣଙ୍କ ପରିଣତ ବୟସରେ ବି ବ୍ୟାୟାମ କରୁଛନ୍ତି। ତାଙ୍କର ଏହି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି। ଯେଉଁ ଭିଡିଓକି ଅନ୍ୟମାନଙ୍କୁ ନିଶ୍ଚିତ ପ୍ରେରଣା ଯୋଗାଇବ।
ବୃଦ୍ଧାଙ୍କ ଏହି ଭିଡିଓକୁ ତାଙ୍କ ନାତି ଚିରାଗ କୋର୍ଡିଆ ସୋସିଆଲ ମିଡିଆରେ ପୋଷ୍ଟ କରିଥିଲେ। ଚିରାଗ ତାଙ୍କ ଜେଜେମା’ଙ୍କ ଓଜନ ଉଠାଇବା, ସ୍କ୍ବାଟସ୍, ଡେଡ୍ଲିଫ୍ଟ ଭଳି ଅନ୍ୟାନ୍ୟ ବ୍ୟାୟାମ ଅଭ୍ୟାସ କରୁଥିବାର ଭିଡିଓଟି ଶେୟାର କରିଥିଲେ। ଚିରାଗଙ୍କ କହିବା ଅନୁଯାୟୀ, ତାଙ୍କ ଜେଜେମା ପିଲାବେଳୁ ବହୁତ ଶକ୍ତିଶାଳୀ। ସେ ପହଁରିବା, ଅନେକ ଖେଳ ଖେଳିବା ଏବଂ ବିବାହ ପରେ ମଧ୍ୟ ଶାରୀରିକ ଭାବରେ ବହୁତ ସକ୍ରିୟ ଥିଲେ। ତେବେ ଥରେ ତାଙ୍କ ଗୋଡ଼ରେ ଆଘାତ ଲାଗିଥିଲା ଏବଂ ଆଉ ଦିନେ ସେ ଶଯ୍ୟାରୁ ଖସିପଡ଼ିଥିଲେ। ସେହି ଦିନଠାରୁ ତାଙ୍କ ସ୍ବାସ୍ଥ୍ୟ ଖରାପ ହେବାରେ ଲାଗିଲା। ଜେଜେମା ମଧ୍ୟ ଚାଲିବା କିମ୍ବା କିଛି ଉଠାଇବାକୁ ଭୟ କରୁଥିଲେ। ଏବେ କିନ୍ତୁ ବିନା ଭୟରେ ସେ ପ୍ରଶିକ୍ଷଣ ନେଉଛନ୍ତି। ସମସ୍ତ ପ୍ରକାର ବ୍ୟାୟାମ କରୁଛନ୍ତି।
ହ୍ୟୁମାନ୍ ଅଫ୍ ବମ୍ବେର ଏକ ପୋଷ୍ଟରେ ୮୨ ବର୍ଷୀୟା ଜେଜେମା’ ତାଙ୍କ ଯାତ୍ରା ବିଷୟରେ କହିଥିଲେ ଯେ, ନିୟମିତ ବ୍ୟାୟାମ କରିବା ତାଙ୍କ ଜୀବନକୁ କିପରି ବଦଳାଇଦେଲା। ସେ କହିଛନ୍ତି,‘ ଧୀରେ ଧୀରେ ମୁଁ ବିଛଣାରୁ ଚଟାଣକୁ ଏବଂ ପାଣି ବୋତଲରୁ ଡମ୍ବୁଲ ପର୍ଯ୍ୟନ୍ତ ଗଲି। ମୋ’ ଗୋଡ଼ରେ ଫୁଲା କମିଗଲା ଏବଂ ମୁଁ ମୋ ହାତ ଏବଂ ବାହୁରେ ଶକ୍ତି ଫେରି ପାଇଲି। ସମୟ ସହିତ ଜଡ଼ିତ ଯନ୍ତ୍ରଣା ଏବଂ ବ୍ଲଡପ୍ରେସରର ସମସ୍ୟା ମଧ୍ୟ ଦୂର ହୋଇଗଲା।
