ଜେନେଭା/ନୂଆଦିଲ୍ଲୀ,୩।୧୧: କରୋନା ମହାମାରୀର ଫାଇଦା ନେଇ ପାକିସ୍ତାନ ଭାରତରେ ଆତଙ୍କବାଦୀ ଅନୁପ୍ରବେଶ ପାଇଁ ଷଡ଼ଯନ୍ତ୍ର ରଚିଛି। ଜାତିସଂଘରେ ଭାରତ ପକ୍ଷରୁ ପାକିସ୍ତାନ ବିରୋଧରେ ଏଭଳି ଅଭିଯୋଗ ଅଣାଯାଇଛି। ଜାତିସଂଘରେ ଭାରତର ସ୍ଥାୟୀ ମିଶନର ସଚିବ ଆଶିଷ ଶର୍ମା ଏହା କହିଛନ୍ତି। ଭାରତର ବିଭିନ୍ନ ସମ୍ପ୍ରଦାୟ ମଧ୍ୟରେ ବିଭାଜନର ବିଷ ପାକିସ୍ତାନ ବୁଣୁଥିବା ସେ ଅଭିଯୋଗ କରିଛନ୍ତି। ବର୍ଣ୍ଣବୈଷମ୍ୟ, ସାଂସ୍କୃତିକ ଅସହିଷ୍ଣୁତା ସମ୍ପର୍କିତ ଏକ ଆଲୋଚନା ଚକ୍ରରେ ଯୋଗଦେଇ ସେ ଏଭଳି କହିଛନ୍ତି। କରୋନା ଯୋଗୁ ବିଶ୍ୱରେ ସଙ୍କଟ ସୃଷ୍ଟି ହେବା ସହିତ କାରବାର ଥମି ଯାଇଛି। ମାତ୍ର ପାକିସ୍ତାନ ଏହାର ସୁଯୋଗ ନେଇ ଆତଙ୍କବାଦୀ କାର୍ଯ୍ୟକଳାପକୁ ପ୍ରୋତ୍ସାହିତ କରୁଛି। ଭାରତରେ ଅଶାନ୍ତି ସୃଷ୍ଟି ପାଇଁ ପାକିସ୍ତାନ ଉଦ୍ୟମ କରୁଥିଲେ ମଧ୍ୟ ତାହା ବିଫଳ ହେବାରେ ଲାଗିଛି। ଭାରତର ଭିନ୍ନତାରେ ଏକତା ପରମ୍ପରା ଆଗରେ ପାକିସ୍ତାନର ସବୁ ଷଡ଼ଯନ୍ତ୍ର ଅସଫଳ ରହିଥିବା ସେ କହିଛନ୍ତି।
