ନୂଆଦିଲ୍ଲୀ,୨୧ ।୯: କୃଷି ବିଲ୍କୁ ନେଇ ପାର୍ଲାମେଣ୍ଟରୁ ସଡ଼କ ପର୍ଯ୍ୟନ୍ତ ବିରୋଧ ଜାରି ରହିଛି । ଏହି ମହାସଂଗ୍ରାମ ମଧ୍ୟରେ ବିରୋଧି ଦଳ ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଭେଟିବାକୁ ସମୟ ମାଗିଛନ୍ତି । ବିରୋଧି ରାଷ୍ଟ୍ରପତିଙ୍କୁ ଭେଟି ୨ଟି ଯାକ ବିଲ୍ରେ ହସ୍ତାକ୍ଷର ନ କରି ପୁଣିଥରେ ରାଜ୍ୟସଭାକୁ ଫେରାଇ ଦେବାକୁ ଅନୁରୋଧ କରିବେ ବୋଲି ଅନୁମାନ କରାଯାଉଛି । ଏହାସହ ବିରୋଧି ରବିବାର ଯାହାସବୁ ଘଟିଛି ତା’ର ବିବରଣୀ ପ୍ରଦାନ କରିବେ ବୋଲି ଜଣାପଡିଛି । ସୂଚନାଯୋଗ୍ୟ, ବିରୋଧିଙ୍କ ହଟ୍ଟଗୋଳ ପରେ ବି ରବିବାର ରାଜ୍ୟ ସଭାରେ ଦୁଇଟି କୃଷି ବିଲ୍କୁ ମଞ୍ଜରୀ ପ୍ରଦାନ କରାଯାଇଛି । ଏସବୁ ପରେ ସୋମବାର ୮ ଜଣ ରାଜ୍ୟ ସଭା ସଦସ୍ୟଙ୍କୁ ନିଲମ୍ବନ କରାଯିବା ଘଟଣା ମଧ୍ୟ ରାଷ୍ଟ୍ରପତିଙ୍କ ଆଗରେ ବିରୋଧି ଉପସ୍ଥାପିତ କରିବ । କୃଷି ବିଲ୍କୁ ମଞ୍ଜୁରୀ ମଳିବା ପରେ ସାରା ଦେଶରେ କୃଷକମାନେ ଏହାର ବିରୋଧ କରିଛନ୍ତି । ଭାରତୀୟ ଜନତା ପାର୍ଟିକୁ ବାଦ୍ ଦେଲେ ପ୍ରାୟ ସମସ୍ତ ଦଳ ମଧ୍ୟ ଏହାକୁ ବିରୋଧ କରିଥିବା ଦେଖାଯାଇଛି । ସୂଚନାଯୋଗ୍ୟ, ସୋମବାର ନିଲମ୍ବିତ ହୋଇଥିବା ୮ ଜଣ ସଦସ୍ୟ ଗୃହରୁ ବାହାରକୁ ଆସିବାକୁ ରାଜି ହୋଇ ନ ଥିଲେ । ଏହାପରେ ଗୃହକାର୍ଯ୍ୟକୁ ମଙ୍ଗଳବାର ପର୍ଯ୍ୟନ୍ତ ମୁଲତବି ରଖାଯାଇଛି । ଏହାପରେ ନିଲମ୍ବିତ ସଦସ୍ୟ ପାର୍ଲାମେଣ୍ଟ ପରିସରରେ ଧାରଣାରେ ବସିଛନ୍ତି । ଏହାକୁ ନେଇ ଭାଜପା କହିଲା ଏମାନେ ପାର୍ଲାମେଣ୍ଟରେ ଗୁଣ୍ଡାରାଜ ଚଲାଇଛନ୍ତି ।
