ଗୁଣପୁର, ୨୩।୫ (ସୁଜାତା ପାଢ଼ୀ): ନିଖିଲ ହାଡପା ଗୁଳିକାଣ୍ଡ ଘଟଣା ପରେ ରାୟଗଡା ସହରରେ ଉତ୍ତେଜନା ଜାରି ରହିଛି। ଶୁକ୍ରବାର ରାତିରେ ରାୟଗଡା ଟାଉନ ଥାନା ସମ୍ମୁଖରେ ପିଟଲା ସାହି ଓ ରେଲି ସାହି ମଧ୍ୟରେ ଖଣ୍ଡଯୁଦ୍ଧ ଘଟିଥିଲା। ଏହି ଘଟଣାରେ ଉଭୟ ସାହିର ୩ ଜଣ କରି ଲେଖା ୬ ଜଣ ଗୁରୁତର ଆହତ ହୋଇଥିଲେ। ସହରରେ ପରିସ୍ଥିତି ଉତ୍ତେଜନାପୂର୍ଣ୍ଣ ରହିଥିବାରୁ ଶନିବାର ଅତିରିକ୍ତ ଆରକ୍ଷୀ ଅଧିକ୍ଷକ ରାମେନ୍ଦ୍ର ପ୍ରସାଦଙ୍କ ନେତୃତ୍ୱରେ ୬ ପ୍ଲାଟୁନ ପୋଲିସ ଫ୍ଲାଗମାର୍ଚ୍ଚ କରିଥିଲା। ତେବେ ଫ୍ଲାଗମାର୍ଚ୍ଚ ସମୟରେ ରେଲି ସାହି ଅଞ୍ଚଳରେ କିଛି ସମୟ ପାଇଁ ଉତ୍ତେଜନା ଦେଖାଯାଇଥିଲା ସ୍ଥାନୀୟ ଲୋକେ ପୋଲିସଙ୍କ ନିକଟକୁ ଯାଇ ନ୍ୟାୟ ଦାବି କରିଥିଲେ ଏବଂ ବାରମ୍ବାର ସେମାନଙ୍କ ଉପରେ ଆକ୍ରମଣ ହେଉଥିବା ଅଭିଯୋଗ ଉଠାଇଥିଲେ।
ଅନ୍ୟପଟେ, କିଛି ସନ୍ଦିଗ୍ଧ ବ୍ୟକ୍ତି ରାୟଗଡା ଉପକାରାଗାର ସମ୍ମୁଖରେ ନିଖିଲ ହତ୍ୟାକାଣ୍ଡ ସମ୍ପର୍କରେ ପଚରାଉଚରା କରିବା ସହିତ ଜେଲ କର୍ମଚାରୀଙ୍କୁ ଧମକ ଦେଉଥିବା ସୂଚନା ମିଳିଛି।
ଏହି ପରିସ୍ଥିତିକୁ ଦୃଷ୍ଟିରେ ରଖି ନିଖିଲ ହତ୍ୟାକାଣ୍ଡରେ ଗିରଫ ହୋଇଥିବା ୧୨ ଜଣ ଅଭିଯୁକ୍ତଙ୍କ ମଧ୍ୟରୁ ୯ ଜଣଙ୍କୁ କୋର୍ଟଙ୍କ ଅନୁମତି ପରେ ବିଭିନ୍ନ ଜିଲା ବାହାର ଜେଲକୁ ସ୍ଥାନାନ୍ତର କରାଯାଇଛି ବୋଲି ଜେଲ ସୁପରିଣ୍ଟେଣ୍ଡେଣ୍ଟ କିଶୋର କୁମାର ସିଂ ସୂଚନା ଦେଇଛନ୍ତି। ପରିସ୍ଥିତି ଉତ୍ତେଜନାପୂର୍ଣ୍ଣ ରହିଥିବାରୁ ସହରରେ ଶାନ୍ତି ଓ ଶୃଙ୍ଖଳା ବଜାୟ ରଖିବା ପାଇଁ ବ୍ୟାପକ ପୋଲିସ ମୋତାୟନ କରାଯାଇଛି। ଘଟଣାସ୍ଥଳରେ ଏଏସପି ରାମେନ୍ଦ୍ର ପ୍ରସାଦଙ୍କ ସହ ଏସଡିପିଓ ଗୌରହରୀ ସାହୁ, ଆଇଆଇସି ପ୍ରସନ୍ନ ବେହେରା, ଗୁଣପୁର ଆଇଆଇସି କେକେବିକେ କହଁର ଓ ଅନ୍ୟାନ୍ୟ ପୋଲିସ ଅଧିକାରୀମାନେ ଉପସ୍ଥିତ ଅଛନ୍ତି।
ସୂଚନାଯୋଗ୍ୟ ଯେ, ପୂର୍ବ ଶତ୍ରୁତା ଓ ଜୁଆ ଅଡ୍ଡାରୁ ଲୁଟ ଘଟଣାକୁ କେନ୍ଦ୍ର କରି ଗତ ୯ ତାରିଖରେ ନିଖିଲ ହାଡପା ନାମକ ଯୁବକଙ୍କୁ ଏକ ଗ୍ୟାଙ୍ଗର ଅପରାଧୀମାନେ ଗୋଡେଇ ଗୋଡେଇ ଗୁଳି କରି ହତ୍ୟା କରିଥିଲେ।ଏହି ଘଟଣାରେ ପୋଲିସ ୧୨ ଜଣଙ୍କୁ ଗିରଫ କରିଥିବାବେଳେ ମୋଟ ୨୧ ଜଣ ଜଡିତ ଥିବା ସନ୍ଦେହ କରାଯାଉଛି। ଘଟଣାକୁ ନେଇ ସହରରେ ଏପର୍ଯ୍ୟନ୍ତ ଉତ୍ତେଜନା ଜାରି ରହିଛି।
