ପାତ୍ରପୁର, ୨୩/୦୫ (ଉମା ଚରଣ ନେପାକ): ଅଘୋଷିତ ବିଦ୍ୟୁତ କାଟ ଓ ଏସ୍ ନୁଆଗାଁ ଗ୍ରାମ ଉପର ପଟରୁ ଯାଇଥିବା ୧୧ କେଭି ତାର ସ୍ଥାନାନ୍ତର ଦାବିକୁ ନେଇ ଶନିବାର ତାଳପଡା ଗ୍ରାମବାସୀ ସୁରଙ୍ଗି ଗ୍ରାମରେ ଥିବା ବିଦ୍ୟୁତ କାର୍ଯ୍ୟାଳୟରେ ତାଲା ପକାଇ ରାସ୍ତା ଅବରୋଧ କରି ପ୍ରତିବାଦ ଜଣେଇଛନ୍ତି।
ବାରମ୍ବାର ଅଭିଯୋଗ ସତ୍ତ୍ୱେ ବିଦ୍ୟୁତ ବିଭାଗ ନିରବ ଦର୍ଶକ ସାଜିଥିବାରୁ ଗ୍ରାମବାସୀମାନେ ଏହି ପଦକ୍ଷେପ ନେଇଥିବା କହିଛନ୍ତି। ପାତ୍ରପୁର ବ୍ଲକ ଅନ୍ତର୍ଗତ ତାଳପଡା ଓ ଆଖପାଖ ଅଞ୍ଚଳର ଦୁଇଶରୁ ଅଧିକ ଗ୍ରାମବାସୀ ଏକତ୍ରିତ ହୋଇ ସୁରଙ୍ଗି ବିଦ୍ୟୁତ କାର୍ଯ୍ୟାଳୟକୁ ତାଲା ପକାଇଥିଲେ। ସେମାନେ କାର୍ଯ୍ୟାଳୟ କର୍ମଚାରୀଙ୍କୁ ବାହାରକୁ କାଢ଼ି ରାସ୍ତାରୋକ କରିଥିଲେ ଏବଂ ସେଠାରେ ରନ୍ଧାବଢ଼ା କରି ଦୀର୍ଘ ସମୟ ଧରି ପ୍ରତିବାଦ ଜାରି ରଖିଥିଲେ।
ଏହି ଘଟଣା ସମ୍ପର୍କରେ ସୂଚନା ପାଇ ଖାରିଆଗୁଡା ଫାଣ୍ଡି ଅଧିକାରୀ ଘଟଣାସ୍ଥଳରେ ପହଞ୍ଚି ଲୋକମାନଙ୍କୁ ବୁଝାଇବା ପରେ ସେମାନେ ରାସ୍ତାରୋକ ଉଠାଇଥିଲେ। ପରେ ବିଦ୍ୟୁତ ବିଭାଗର ଚିକିଟି ସେକ୍ସନର ଏସଡିଓ ଓ ସୁରଙ୍ଗି ଜେଇ ଘଟଣାସ୍ଥଳକୁ ପହଞ୍ଚି ଗ୍ରାମବାସୀଙ୍କ ସହ ଆଲୋଚନା କରିଥିଲେ। ତେବେ ଗ୍ରାମବାସୀମାନେ ଲିଖିତ ପ୍ରତିଶ୍ରୁତି ପାଇଁ ଅଡ଼ିଆ ରହିଥିଲେ।
ପରବର୍ତ୍ତୀ ସମୟରେ ଏସଡିଓ ହସ୍ତକ୍ଷେପ କରି ଏସ୍ ନୁଆଗାଁ ଗ୍ରାମ ଦେଇ ଯାଇଥିବା ୧୧ କେଭି ତାର ସ୍ଥାନାନ୍ତର ପାଇଁ ଜିଲାପାଳଙ୍କ ପକ୍ଷରୁ ଅନୁମୋଦିତ ଅର୍ଥ ମଞ୍ଜୁରି ସମ୍ପର୍କିତ ଚିଠି ଦେଖାଇଥିଲେ। ସେହିସହ ଅଘୋଷିତ ବିଦ୍ୟୁତ କାଟ ବନ୍ଦ କରାଯିବ ବୋଲି ଆଶ୍ୱାସନ ଦେଇଥିଲେ।ଏହାପରେ ଗ୍ରାମବାସୀମାନେ ଶାନ୍ତ ହୋଇ ପ୍ରତିବାଦରୁ ହଟିଥିବା ଜଣାପଡ଼ିଛି।
ଏନେଇ ଚିକିଟି ଏସଡିଓ କହିଛନ୍ତି ଯେ, ଅଘୋଷିତ ବିଦ୍ୟୁତ କାଟ କରାଯିବ ନାହିଁ ଏବଂ କେବଳ ଜରୁରୀ ପରିସ୍ଥିତିରେ ବିଦ୍ୟୁତ ସରବରାହ ବନ୍ଦ ରହିପାରେ। ଏସ୍ ନୁଆଗାଁ ଗ୍ରାମର ୧୧ କେଭି ତାର ସ୍ଥାନାନ୍ତର ଦାବି ଦୀର୍ଘଦିନ ଧରି ରହିଛି ଏବଂ ଉଚ୍ଚ ପଦାଧିକାରୀଙ୍କ ସହ ଆଲୋଚନା କରି ଏହାର ସମାଧାନ କରାଯିବ ବୋଲି ସେ କହିଛନ୍ତି। ବାରମ୍ବାର ଗୁହାରି ସତ୍ତ୍ୱେ ପ୍ରଶାସନ ପକ୍ଷରୁ କୌଣସି ପଦକ୍ଷେପ ନ ନିଆଯାଇଥିବାରୁ ଏପରି ଚରମ ପଦକ୍ଷେପ ନେବାକୁ ପଡ଼ିଲା ବୋଲି ଗ୍ରାମବାସୀମାନେ ପ୍ରକାଶ କରିଛନ୍ତି।
