ନୂଆଦିଲ୍ଲୀ,୩୦।୮: ବୋର୍ଡ ରିପୋର୍ଟରେ ଅସଙ୍ଗତି କିମ୍ବା ବାର୍ଷିକ ସାଧାରଣ ବୈଠକ(ଏଜିଏମ୍)ରେ ବିଳମ୍ବ ହେଲେ ଜେଲ୍ ଦଣ୍ଡ ଭୋଗିବାକୁ ପଡିବ ନ ପାରେ। ଜିଏସ୍ଟିର ବିଭିନ୍ନ ଆଇନକୁ ଅଣଆପରାଧିକ କରିବା ଦିଗରେ ସରକାର ପଦକ୍ଷେପ ନେବେ। ଦେଶ ମଧ୍ୟରେ ଇଜ୍ ଅଫ୍ ଡୁଇଁ ବିଜନେସ ବା ବାଣିଜ୍ୟ ସୁବିଧାକୁ ତ୍ୱରାନ୍ବିତ କରିବା ଲାଗି ସରକାର କେତେକ ନୂଆ ପଦକ୍ଷେପ ନେବେ ବୋଲି ଜଣାପଡିଛି। କମ୍ପାନୀ ଆଇନ ପରେ ସରକାର ଜିଏସ୍ଟି ଆଇନରେ ରହିଥିବା ବିଭିନ୍ନ ଅସୁବିଧା ଦୂରୀକରଣ ଦିଗରେ କାର୍ଯ୍ୟପନ୍ଥା ଗ୍ରହଣ କରିବେ ବୋଲି ଏକ ରିପୋର୍ଟରେ ପ୍ରକାଶ ପାଇଛି।
ଜିଏସ୍ଟି ଆଇନରେ ରହିଥିବା ବିଭିନ୍ନ ଆପରାଧିକ ଦିଗକୁ ବିଚାର କରିବାକୁ ସରକାର ଯୋଜନା ରଖିଛନ୍ତି। ଏ ନେଇ କେନ୍ଦ୍ରୀୟ ପରୋକ୍ଷ ଟିକସ ଏବଂ ସୀମା ଶୁଳ୍କ ବୋର୍ଡ(ସିବିଆଇସି) ଅଧିକାରୀଙ୍କର ଏକ କମିଟି ଗଠନ କରାଯାଇଛି। ଏହି କମିଟି ଅଂଶୀଦାରଙ୍କ ସହ ବିଭିନ୍ନ ଆଲୋଚନା କରିବ। ଶିଳ୍ପ କ୍ଷେତ୍ରର ମଧ୍ୟ ପ୍ରସ୍ତାବ ଗ୍ରହଣ କରାଯିବ। ଏହାବାଦ ଚୂଡାନ୍ତ ରିପୋର୍ଟକୁ କ୍ୟାବିନେଟ ନିକଟକୁ ପଠାଯିବ ବୋଲି ଜଣାପଡିଛି।
ଏ ସମ୍ପର୍କରେ ଜିଏସ୍ଟି ମହାନିର୍ଦ୍ଦେଶାଳୟ ପକ୍ଷରୁ ଦେଶର ଶିଳ୍ପ ସଂଘଗୁଡିକୁ ଚିଠି ଲେଖାଯାଇଛି। ଇଜ ଅଫ୍ ଡୁଇଁ ବିଜନେସକୁ ଉତ୍ସାହିତ କରିବା ଦିଗରେ ବିଭିନ୍ନ ଦିଗ ଉପରେ ଆଲୋଚନା କରାଯିବ ବୋଲି ଚିଠିରେ ଉଲ୍ଲେଖ ରହିଛି। ଜିଏସ୍ଟି ନିୟମକୁ ବ୍ୟାପକ କରିବା ଏବଂ ଆପରାଧିକ ନିୟମଗୁଡିକୁ ପୁଣି ଥରେ ବିଚାର କରିବା ଦିଗରେ ଅଂଶୀଦାର ସେମାନଙ୍କ ମତାମତ ରଖି ପାରିବେ ବୋଲି ଚିଠିରେ କୁହାଯାଇଛି। ଏ ସଂକ୍ରାନ୍ତ ବିଭିନ୍ନ ଦିଗ ଉପରେ ବୈଠକରେ ସମୀକ୍ଷା କରାଯିବା ନେଇ ପ୍ରସ୍ତାବ ରହିଛି। ଏହି ଆଧାରରେ ବାଣିଜି୍ୟକ ମନୋଭାବରେ ସୁଧାର ଆଣିବା, ଆଇନଗତ ମାମଲା ଏବଂ କାର୍ଯ୍ୟାନୁଷ୍ଠାନକୁ କମ୍ କରି କିଭଳି ବାଣିଜି୍ୟକ ଧାରାକୁ ଉନ୍ନତ କରାଯାଇ ପାରିବ ସେ ଦିଗରେ ବିଚାର କରାଯାଉଥିବା ଜଣାପଡିଛି।
