ତୁମୁଡ଼ିବନ୍ଧ,୨ା୫(ଦୀପକ କୁମାର ପରାସେଠ୍): ଶିକାର କରିବାକୁ ଯାଇ ଶବ ପଲଟିଲେ। ସାଥୀ ଶିକାରୀଙ୍କ ଗୁଳିରେ ଚାଲିଗଲା ଜୀବନ। ଘରୁ ଡାକି ନେଇ ଗୁଳିକରି ହତ୍ୟା କରିଛନ୍ତି ବୋଲି ସ୍ତ୍ରୀ ଅଭିଯୋଗ କରିଛନ୍ତି। ଏପରି ଘଟଣା କନ୍ଧମାଳ ଜିଲା ବେଲଘର ଥାନା ଅନ୍ତର୍ଗତ ସାପେରି ଗ୍ରାମରେ ଘଟିଛି। ମୃତକ ହେଲେ କାମଦେବ ମାଝୀ(୩୩)।
ମିଳିଥିବା ସୂଚନା ଅନୁସାରେ, କାମଦେବ ବେଲଘର ପଞ୍ଚାୟତର ତୁଆ କଲା ଗ୍ରାମର। ସେ ଦୀର୍ଘ ବର୍ଷ ହେବ ଗୁମା ଗ୍ରାମ ପଞ୍ଚାୟତ ସାପେରି ଗ୍ରାମରେ ବିବାହ କରିଥିଲେ। ବିବାହ ପରେ ସେ ସେଠାରେ ଶ୍ୱଶୁର ଘରେ ରହୁଥିଲେ। ଶୁକ୍ରବାର ଅପରାହ୍ନରେ କାମଦେବ, ଲିପଟୁ ମାଝୀ ଓ ମଧୁସୂଦନ ମାଝୀ ତିନି ଜଣ ମିଶିକି ଦେଶୀ ବନ୍ଧୁକ ଧରି ଶିକାର କରିବା ପାଇଁ ବାହାରି ଥିଲେ ନିକଟ ବେଲଘର ଅଞ୍ଚଳର କାଡାପାନା ଜଙ୍ଗଲକୁ। ସେହି ଜଙ୍ଗଲରେ ଶିକାର କରିବା ସମୟରେ ସାଥୀ ଶିକାରୀଙ୍କ ଗୁଳି କାମଦେବଙ୍କ ଛାତିରେ ବାଜିଯିବାରୁ ଘଟଣା ସ୍ଥଳରେ ଟଳିପଡ଼ିଲେ। ଗୁଳିବାଜିବା ପରେ ସାଥି ଶିକାରୀମାନେ ଗ୍ରାମବାସୀଙ୍କୁ ସୂଚନା ଦେଇଥିଲେ। ସୂଚନା ପାଇବା ପରେ ପରିବାର ଲୋକେ ଘଟଣାସ୍ଥଳରେ ପହଞ୍ଚିଥିଲେ ଏବଂ ବେଲଘର ପୋଲିସକୁ ସୂଚନା ଦେଇଥିଲେ।
ବେଲଘର ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଥିଲା। ମୃତ କାମଦେବଙ୍କ ସ୍ତ୍ରୀ ଚୁମୁକି ମୋ ସ୍ବାମୀଙ୍କୁ ଗୁଳି କରି ହତ୍ୟା କରାଯାଇଛି ବୋଲି ଅଭିଯୋଗ କରିଛନ୍ତି। ମୋ’ ସ୍ବାମୀଙ୍କୁ ଘରକୁ ଆସି ଶିକାରକୁ ଯିବା କହି ଡାକିନେଇ ଗୁଳି କରି ହତ୍ୟା କଲେ ବୋଲି ଅଭିଯୋଗ କରିଛନ୍ତି। ଏ ନେଇ ବେଲଘର ପୋଲିସ ୩୯/୨୬ରେ ଏକ ମାମଲା ରୁଜୁ କରି ଦୁଇ ଜଣ ଅଭିଯୁକ୍ତକୁ ଗିରଫ କରିବା ସହିତ ଘଟଣାର ସମ୍ପୂର୍ଣ୍ଣ ତଦନ୍ତ କରାଯିବ ଏବଂ ସ୍ପଷ୍ଟୀକରଣ ଦିଆଯିବ ବୋଲି ବେଲଘର ଥାନା ଅଧିକାରୀ ସୌମ୍ୟ ରଞ୍ଜନ ପତି କହିଛନ୍ତ। ବର୍ତ୍ତମାନ ମୃତଦେହକୁ ବ୍ୟବଚ୍ଛେଦ କରିବା ନିମନ୍ତେ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।
