ଭଞ୍ଜନଗର,୧୦ା୫(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଘୁମୁସର ଉତ୍ତର ବନଖଣ୍ଡରେ ଶନିବାର ୧୨ ଘଣ୍ଟା ମଧ୍ୟରେ ୩ଟି ହରିଣ ମୃତ୍ୟୁବରଣ କରିଛନ୍ତି। ସେଥିମଧ୍ୟରୁ ମୁଜାଗଡ଼ ରେଞ୍ଜରେ ଦୁଇଟି ମୃତ୍ୟୁବରଣ କରିଥିବା ବେଳେ କେନ୍ଦ୍ରୀୟ ବନାଞ୍ଚଳରେ ଗୋଟିଏ ମୃତ୍ୟୁବରଣ କରିଛି। ପ୍ରଥମଟି ଭଞ୍ଜନଗର ମୁଜାଗଡ଼ ମୁଖ୍ୟ ରାସ୍ତାର ସୋରାଦେବୀ ମନ୍ଦିର ନିକଟରେ ଅଜଣା ଗାଡ଼ି ଧକ୍କାରେ ଗୋଟିଏ ହରିଣ ଆହତ ହୋଇ ଚିକିତ୍ସାଧୀନ ଅବସ୍ଥାରେ ଶନିବାର ସକାଳେ ମୃତ୍ୟୁବରଣ କରିଛି। ଦ୍ୱିତୀୟଟି କେନ୍ଦ୍ରୀୟ ବନାଞ୍ଚଳ ଲାଠିପଡ଼ା ନିକଟରେ ଶନିବାର ହଁ ଘଟିଛି। ଶିକାରୀମାନେ ଆକ୍ରମଣ କରି ଗୋଟିଏ ହରିଣକୁ ମାରିଥିଲେ। ଏହାପରେ ତା’ର ମାଂସକୁ କାଟିବା ପାଇଁ ସଜବାଜ ହେଉଥିଲେ। ଏନେଇ ବିଭାଗୀୟ କର୍ମଚାରୀମାନେ ଜାଣି ଘଟଣାସ୍ଥଳରେ ଚଢ଼ାଉ କରି ୨ ଜଣଙ୍କୁ ଅଟକ ରଖି ପଚରାଉଚରା ଚଳାଇଛି। ସଂପୃକ୍ତ ଅଞ୍ଚଳରେ ଲାଗିଥିବା ସିସିଟିଭି ଫୁଟେଜକୁ ଯାଞ୍ଚ କରି ଅଭିଯୁକ୍ତମାନଙ୍କ ପାଖରେ ବନବିଭାଗ କର୍ମଚାରୀ ପହଞ୍ଚିଥିଲେ।
ସେହିଭଳି ତୃତୀୟ ଘଟଣାଟି ଡହରେ ଘଟିଛି। ଶନିବାର ସନ୍ଧ୍ୟାରେ ଗୋଟିଏ ହରିଣ ଜଙ୍ଗଲରୁ ବାହାରି ଡହ ନିକଟରେ ଘୂରି ବୁଲୁଥିଲା। ଏହି ସମୟରେ କୁକୁରମାନେ ହରିଣଟିକୁ ଗୋଡ଼ାଇବାରୁ ହରିଣଟି ଦୌଡ଼ି ଯାଇ ସିମେଣ୍ଟ କେନାଲ ଉପରେ ବାଡ଼େଇ ହୋଇ ପଡ଼ିଯାଇଥିଲା। ଫଳରେ ଘଟଣାସ୍ଥଳରେ ହରିଣଟି ମୃତ୍ୟୁବରଣ କରିଥିଲା। ଡିଏଫ୍ଓ ହିମାଂଶୁ ଶେଖର ମହାନ୍ତିଙ୍କ ନିର୍ଦ୍ଦେଶକ୍ରମେ ୩ଟି ଯାକ ହରିଣର ବ୍ୟବଚ୍ଛେଦ କରାଯାଇଛି। ମୁଜାଗଡ଼ ରେଞ୍ଜର ବିମ୍ବାଧର ସାହୁ ଏବଂ କେନ୍ଦ୍ରୀୟ ବନାଞ୍ଚଳ ଅଧିକାରୀ ପୃଥିବୀରାଜ ପ୍ରଧାନ ଉଭୟ ମାମଲାର ତଦନ୍ତ କରୁଛନ୍ତି।
