ବରଗଡ଼,୮।୫(ପ୍ରେମାନନ୍ଦ ଖମାରୀ)- ବରଗଡ଼ ଜିଲା କ୍ରିକେଟ୍ ଆସୋସିଏଶନ୍, ବରଗଡ଼ ଆନୁକୂଲ୍ୟରେ ଆୟୋଜିତ ହେଉଥିବା ୮ମ ବରଗଡ଼ ଜିଲଖ ପ୍ରିମିୟର ଲିଗର ପଞ୍ଚମ ଦିବସ ଶୁକ୍ରବାର ଅନୁଷ୍ଠିତ ପ୍ରଥମ ମ୍ୟାଚରେ ମା’ ସମଲେଶ୍ୱରୀ ଇଲେଭେନ ଦଳ, ଅତାବିରା ହ୍ବାଇଟ ହର୍ଷକୁ ୪ ୱିକେଟରେ ହରାଇ ପ୍ରତିଯୋଗିତାରେ ନିଜର ଦ୍ୱିତୀୟ ମ୍ୟାଚ୍ ଜିତି ନେଇଛି। ଲେଙ୍ଗୁ ମିଶ୍ର ମିନି ଷ୍ଟାଡିୟମରେ ଅନୁଷ୍ଠିତ ଏହି ମ୍ୟାଚରେ ଟସ୍ ଜିତି ଅତାବିରା ଦଳ ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ।
ଦଳର ଖେଳାଳୀମାନେ ଜୋରଦାର ଢଙ୍ଗରେ ରନ୍ ରେଟ୍ ହାର ବଢ଼ାଇବା ପାଇଁ ଚାରିଆଡ଼େ ସର୍ଟ ଲଗାଇ ମ୍ୟାଚର ପ୍ରାରମ୍ଭ କରିଥିଲେ। ଦଳର ବ୍ୟାଟ୍ସମ୍ୟାନ୍ ରୋହନ କୁମାରଙ୍କ ୨୪ ବଳରେ ୩ ଚୌକା ୧ ଛକା ସହ ୨୫ ରନ୍, ପ୍ରବୀଣ ଲୁହାଙ୍କ ୨୬ ବଳରେ ୩ ଚୌକା ୨ ଛକା ସହ ୩୦ ରନ୍, ସୌମ୍ୟ ଲେଙ୍କାଙ୍କ ୧୧ ବଳରେ ୩ ଚୌକା ୧ ଛକା ସହ ୨୪ ରନ୍ , ଦେବବ୍ରତ ପ୍ରଧାନଙ୍କ ୧୮ ବଳରେ ୩ ଚୌକା ୧ ଛକା ସହ ୨୬ ରନ୍ , ଅତୁଲ୍ୟ କର୍ଣ୍ଣଙ୍କ ୧୦ ବଳରେ ୩ ଛକା ସହ ୨୦ ରନ୍ , ଶୃତିରାଜ୍ ମିଶ୍ରଙ୍କ ୧୧ ରନ୍ ଫଳରେ ଦଳ ୧୯.୫ ଓଭରେ ୧୫୩ ରନ୍ କରି ଅଲ୍ଆଉଟ୍ ହୋଇଯାଇଥିଲା। ପ୍ରତିପକ୍ଷ ମା’ ସମଲେଶ୍ୱରୀ ଇଲେଭେନ୍ ପକ୍ଷରୁ ଶୁଭମ୍ ଦାସ ୨୩/୫ ଉଇକେଟ, ଦେବବ୍ରତ ପ୍ରଧାନ ୨୧/୩ ଉଇକେଟ, ଶ୍ରେଷ୍ଠ ସିଂ ୨୮/୧ ଉଇକେଟ, ଅମରଜିତ ସିଂ ୧୬/୧ ଉଇକେଟ ନେଇଥିଲେ । ୧୫୪ ରନର ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇ ଥିବା , ମା ସମଲେଶ୍ୱରୀ ଦଳ ଶ୍ରେଷ୍ଠ ସିଂ ଙ୍କ ୨୩ ବଳରେ ୯ ଚୌକା ୧ ଛକା ବଳରେ ୫୦ ରନ୍, ସନ୍ଦେଶ ସୁହାସ ପୂଜାରୀ ୧୨ ବଳରେ ୨ ଚୌକା ୪ ଛକା ସହ ୩୭ ରନ୍, ଦିବ୍ୟ କୁମାର ସାହୁଙ୍କ ୨୨ ବଳରେ ୪ ଚୌକା ୧ ଛକା ସହ ୩୫ ରନ୍ , ଦେବବ୍ରତ ପ୍ରଧାନ ୨୦ ବଳରେ ୩ ଛକା ସହ ୨୩ ରନ୍ ଫଳରେ ଦଳ ୧୫.୩ ଓଭରରେ ୧୫୭/୬ କରି ମ୍ୟାଚ୍ କୁ ସମଲେଶ୍ୱରୀ ଇଲେଭେନ ୪ ଉଇକେଟରେ ବିଜୟୀ ହୋଇଥିଲା। ଏହି ମ୍ୟାଚକୁ ଓସିଏ ପ୍ୟାନେଲ ଅମ୍ପାୟାର ଅକ୍ଷୟ ସାହାଣୀ ଓ ହନୁ ଅଗ୍ରୱାଲ ଖେଳ ପରିଚାଳନା କରିଥିବା ବେଳେ ତୃତୀୟ ଅମ୍ପାୟାର ଭାବରେ ସାଜନ୍ ସାହୁ ଓ ଚତୁର୍ଥ ଅମ୍ପାୟାର ଥିଲେ ଶୁଭମ୍ ପାତ୍ର। ମ୍ୟାଚ୍ ରିଫରୀ ଅଛନ୍ତି ହରିହର ପ୍ରଧାନ । ସ୍କୋରର ଥିଲେ ରଜତ ଦାଶ, ମନୋଜ ପାତ୍ର । ଭାଷ୍ୟକାର ଭାବରେ ଅଛନ୍ତି ନିଶିକାନ୍ତ ସନ୍ତୋଷ ନାୟାର, ମନୋଜ ସିଂ ।
ମ୍ୟାଚ୍ ପରେ ଜିଲା କ୍ରିକେଟ ଏସୋସିଏସନର ସଭାପତି ହରିହର ପ୍ରଧାନଙ୍କ ସଭାପତିତ୍ବ ଓ ଯୁଗ୍ମ ସମ୍ପାଦକ ସଚ୍ଚିଦାନନ୍ଦ ପଣ୍ଡାଙ୍କ ସଂଯୋଜନାରେ ଅନୁଷ୍ଠିତ ପୁରସ୍କାର ବିତରଣୀ ଉତ୍ସବରେ ଅତିଥି ଭାବରେ ଯୋଗଦେଇ ଜିଲା କଣ୍ଟ୍ରାକ୍ଟର ଏସୋସିଏସନର ସଭାପତି ମଣ୍ଟୁ ଗଡତିଆ, ଯୁବ ଉଦ୍ୟୋଗପତି ହିମାଂଶୁ ପଣ୍ଡା , ଜିଲା କ୍ରିକେଟ ଏସୋସିଏସନର ପୂର୍ବତନ ଉପ ସଭାପତି ପ୍ରଭାତାଦିତ୍ୟ ମିଶ୍ର, ପୂର୍ବତନ ସମ୍ପାଦକ ସୁବ୍ରତ ଚାଟାର୍ଜୀ, ସମ୍ପାଦକ ରବି ପଣ୍ଡା , ଉପ ସଭାପତି ଡା. ଶୁଭ୍ରାଂଶୁ ଶେଖର ମହାପାତ୍ର ପ୍ରମୁଖ ଶୁକ୍ରବାର ମ୍ୟାଚର ଶ୍ରେଷ୍ଠ ଖେଳାଳୀ ରଣଜୀ ଖେଳାଳି ଦେଵବ୍ରତ ପ୍ରଧାନ ଓ ଗୁରୁବାର ମା ସମଲେଶ୍ୱରୀ ଇଲେଭେନ୍ ଓ ବରଗଡ ଯୋଦ୍ଧାସ ମଧ୍ୟରେ ଖେଳାଯାଇଥିବା ମ୍ୟାଚର ଶ୍ରେଷ୍ଠ ଖେଳାଳୀ ଶ୍ରେଷ୍ଠ ସିଂଙ୍କୁ ନଗଦ ଅର୍ଥ ରାଶି ସହ ଟ୍ରଫି ପ୍ରଦାନ କରିଥିଲେ । ଶୁକ୍ରବାର ଦ୍ୱିତୀୟ ମ୍ୟାଚ୍ ବରଗଡ ସ୍ପାର୍ଟନସ ଓ ବରଗଡ ଯୋଦ୍ଧାସ ମଧ୍ୟରେ ଅନୁଷ୍ଠିତ ହୋଇଥିଲା। ବରଗଡ ସ୍ପାର୍ଟନସ ଦଳ ଟସ୍ ଜିତି ପ୍ରଥମେ ବରଗଡ ଯୋଦ୍ଧାସ ଦଳକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲେ। ଯୋଦ୍ଧାସ ଦଳ ପକ୍ଷରୁ ବ୍ୟାଟିଂ ଓପନ୍ କରିବାକୁ ଆସି ଦଳର ବରିଷ୍ଠ ଖେଳାଳି ପ୍ରକାଶ ମାହାନା ୬୧ ବଲରେ ୧୪ ଚୌକା ଓ ୬ ଟି ଛକା ସହ ଶତକ ସହ ଅପରାଜିତ ୧୦୮ ରନ୍ , ଶୟଦ ଜାକି ୧୮ ବଲରେ ୧ ଚୌକା ଓ ୪ ଛକା ସହ ୩୫ ରନ୍ , ମନୋଜ ଶର୍ମା ୨୫ ବଲରେ ୩ ଚୌକା ସହ ୧୭ ରନ୍ କରି ଦଳକୁ ୧୮୨/୭ ରନର ଏକ ମଜବୁତ ସ୍କୋର ଦେଇଥିଲେ । ପ୍ରତିପକ୍ଷ ଦଳ ବରଗଡ ସ୍ପାର୍ଟନ ପକ୍ଷରୁ ଅଜିତ୍ ସ୍ୱାଇଁ ୨୩/୧ ଉଇକେଟ, ପ୍ରିୟାଂଶୁ କୁମାର ଦାଶ ୪୫/୧ ଉଇକେଟ , ଅମିତ୍ ଦାସ ୨୬/୧ ଉଇକେଟ , ଶ୍ରୀକାନ୍ତ ପ୍ରଧାନ ୨୮/୧ ଉଇକେଟ ,ପ୍ରଭଞ୍ଜନ ସାହୁ ୧୩/୧ ଉଇକେଟ ନେଇଥିଲେ। ଖବର ଲେଖା ହେବା ବେଳକୁ ମ୍ୟାଚର ଦ୍ଵିତୀୟ ଇନିଙ୍ଗସ ଜାରି ରହିଥିଲା।
