ବେଙ୍ଗାଲୁରୁ,୧୦।୫: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆର୍ଟ ଅଫ ଲିଭିଂ ସେଣ୍ଟର ଗସ୍ତ ପୂର୍ବରୁ ବେଙ୍ଗାଲୁରୁରେ ଏକ ବଡ଼ ଧରଣର ସୁରକ୍ଷା ତ୍ରୁଟି ସାମ୍ନାକୁ ଆସିଛି। ପୋଲିସ ସୁରକ୍ଷା ଯାଞ୍ଚ ସମୟରେ ତାତାଗୁନି ନିକଟସ୍ଥ ଏକ ଫୁଟପାଥରୁ ଦୁଇଟି ସନ୍ଦିଗ୍ଧ ଜିଲାଟିନ ଷ୍ଟିକ ଜବତ କରିଛି।
କନକପୁରା ରୋଡ ହାଇୱେର ଏକ ବ୍ରିଜ ନିକଟରେ ଥିବା ଚାରିକାନ୍ଥ ପାଖରୁ ଏହି ବିସ୍ଫୋରକ ମିଳିଛି। ଏହି ସ୍ଥାନଟି ଆର୍ଟ ଅଫ ଲିଭିଂ ସେଣ୍ଟରଠାରୁ ମାତ୍ର ୩ କିଲୋମିଟର ଏବଂ ନାଇସ ରୋଡ (NICE Road) ଠାରୁ ପ୍ରାୟ ୧ କିଲୋମିଟର ଦୂରରେ ଅବସ୍ଥିତ। ପ୍ରଧାନମନ୍ତ୍ରୀଙ୍କ ଆଗମନ ପୂର୍ବରୁ କରାଯାଉଥିବା ରୁଟିନ୍ ‘ଏରିଆ କଣ୍ଟ୍ରୋଲ ଅପରେଶନ’ ସମୟରେ ଏହି ସନ୍ଦିଗ୍ଧ ସାମଗ୍ରୀ ଉଦ୍ଧାର କରାଯାଇଛି।
ପୋଲିସର ସୂଚନା ଅନୁଯାୟୀ, କୌଣସି ଅଜ୍ଞାତ ବ୍ୟକ୍ତି ଏହି ଜିଲାଟିନ ଷ୍ଟିକ୍କୁ ସେଠାରେ ଫିଙ୍ଗି ଦେଇଥିବା ସନ୍ଦେହ କରାଯାଉଛି। ବିସ୍ଫୋରକକୁ ତୁରନ୍ତ ଜବତ କରାଯିବା ସହ ସେହି ଅଞ୍ଚଳରେ ସର୍ଚ୍ଚ ଅପରେସନକୁ ଜୋରଦାର କରାଯାଇଛି। ଆର୍ଟ ଅଫ ଲିଭିଂ ଫାଉଣ୍ଡେଶନର ବିରୋଧୀମାନେ ଏହା ପଛରେ ଥାଇପାରନ୍ତି ବୋଲି ପ୍ରାଥମିକ ସନ୍ଦେହ କରାଯାଉଥିଲେ ମଧ୍ୟ ପୋଲିସ ଏପର୍ଯ୍ୟନ୍ତ କୌଣସି ସ୍ପଷ୍ଟ କାରଣ ଦର୍ଶାଇ ନାହିଁ।
ଏହି ଘଟଣା ସତ୍ତ୍ୱେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆର୍ଟ ଅଫ ଲିଭିଂର ୪୫ତମ ବାର୍ଷିକୋତ୍ସବ ଏବଂ ଶ୍ରୀ ଶ୍ରୀ ରବିଶଙ୍କରଙ୍କ ୭୦ତମ ଜନ୍ମଦିନ ସମାରୋହରେ ଯୋଗ ଦେଇଥିଲେ।
ପ୍ରଧାନମନ୍ତ୍ରୀଙ୍କ ଗସ୍ତ ପୂର୍ବରୁ ଏଭଳି ବିସ୍ଫୋରକ ମିଳିବା ଘଟଣା ସୁରକ୍ଷା ଏଜେନ୍ସିଗୁଡ଼ିକ ପାଇଁ ଚିନ୍ତାର ବିଷୟ ପାଲଟିଛି ଏବଂ ଅପରାଧୀଙ୍କୁ ଧରିବା ପାଇଁ ତଦନ୍ତ ଜାରି ରହିଛି।
