ମୋହନା,୧୦ା୫( ମନ୍ମଥ ମିଶ୍ର ): ମାଙ୍କଡଡିଆଁ ଜଳପ୍ରପାତରୁ ଯୁବକଙ୍କ ମୃତଦେହ ଉଦ୍ଧାର ହୋଇଛି । ମୃତ ବ୍ୟକ୍ତିଙ୍କର ନାମ ଅଭିଜିତ ଦାସ ହୋଇଥିବା ବେଳେ ସେ ଜଣେ ଅଧ୍ୟାପକ ହୋଇଥିବା ଜଣାପଡିଛି ।
ସୂଚନା ଅନୁସାରେ, ଜଣେ ଯୁବକଙ୍କ ମୃତଦେହ ପାଣିରେ ଭାସୁଥିବା ନେଇ କିଛି ପର୍ଯ୍ୟଟକ ଦେଖିଥିଲେ । ତତକ୍ଷଣାତ ସେମାନେ ଆମ୍ବୁଲାନ୍ସକୁ ଫୋନ କରିଥିଲେ । ଖବର ପାଇବାର କିଛି ସମୟ ପରେ ଆମ୍ବୁଲାନ୍ସ ଆସି ମୃତଦେହକୁ ଦେଖି ଫେରିଯାଇଥିଲେ । ପରେ ସେମାନେ ପୋଲିସକୁ ଫୋନ କରିଥିଲେ । ତେବେ ଘଟଣାସ୍ଥଳରେ ରା – ଉଦୟଗିରି ପୋଲିସ ପହଞ୍ଚି ଶବକୁ ଜବତ କରିବା ସହ ଏକ ଅପମୃତ୍ୟୁ ମାମଲା ରୁଜ୍ଜୁ କରି ମୃତ୍ୟୁର କାରଣ ଉପରେ ଅଧିକ ତଦନ୍ତ କରୁଛି ।
ସୂଚନା ପ୍ରକାରେ ପ୍ରାଥମିକ ତଦନ୍ତରୁ ଜଣା ପଡିଛି ଯେ, ମୃତ ବ୍ୟକ୍ତିଙ୍କର ନାମ ଅଭିଜିତ ଦାସ ଏବଂ ଜଗତସିଂପୁର ଜିଲା ନାଉଗାଁ ଥାନା ଅନ୍ତର୍ଗତ ଗଜରାଜପୁର ଗ୍ରାମର । ସେ ବ୍ରହ୍ମପୁରର ଏକ ଘରୋଈ କଲେଜର ଜଣେ ଅଧ୍ୟାପକ ବୋଲି ଜଣାପଡିଛି, ପୋଲିସ ତାଙ୍କ ପରିବାର ଲୋକଙ୍କୁ ଫୋନ ମାଧ୍ୟମରେ ଖବର ଦେଇଛନ୍ତି । ପରିବାର ପକ୍ଷରୁ କେହି ଆସିଲେ ଶବ ବ୍ୟବଚ୍ଛେଦ ପାଇଁ ପାରଳାଖେମୁଣ୍ଡିକୁ ପଠାଯିବ ବୋଲି ରା -ଉଦୟଗିରି ଥାନା ସବଇନ୍ସପେକ୍ଟର ସ୍ୱପ୍ନାରାଣୀ ବେହେରା କହିଛନ୍ତି ।
