ନୂଆଦିଲ୍ଲୀ,୯ା୫: ରେସଲିଂ ଫେଡେରେଶନ ଅଫ୍ ଇଣ୍ଡିଆ (ଡବ୍ଲ୍ୟୁଏଫ୍ଆଇ) ଶନିବାର ଭିନେଶ ଫୋଗତଙ୍କ ବିରୋଧରେ ଶୃଙ୍ଖଳାଗତ ଓ ଆଣ୍ଟି-ଡୋପିଂ ନିୟମ ଉଲ୍ଲଂଘନ ଅଭିଯୋଗ ଆଣିବା ସହିତ ବିସ୍ତୃତ କାରଣ ଦର୍ଶାଅ ନୋଟିସ ଜାରି କରିଛି।
ୟୁଡବ୍ଲ୍ୟୁଡବ୍ଲ୍ୟୁ ଆଣ୍ଟି-ଡୋପିଂ ନିୟମ ଅନୁଯାୟୀ, ଅବସରରୁ ପ୍ରତ୍ୟାବର୍ତ୍ତନ କରୁଥିବା ଆଥଲେଟ୍ସଙ୍କ ଲାଗି ନୋଟିସ ପିରିଅଡ୍ରେ ୬ ମାସ ରହିବା ବାଧ୍ୟତାମୂଳକ। କିନ୍ତୁ ଏହାକୁ ସମ୍ପୂର୍ଣ୍ଣ କରିପାରି ନ ଥିବାରୁ ଭିନେଶଙ୍କୁ ଆସନ୍ତା ଜୁନ ୨୬ ତାରିଖ ପର୍ଯ୍ୟନ୍ତ ଘରୋଇ ପ୍ରତିଯୋଗିତାରେ ଅଂଶଗ୍ରହଣ କରିବା ପାଇଁ ଅଯୋଗ୍ୟ ଘୋଷିତ କରାଯାଇଛି। ଏହାର ଅର୍ଥ ଦୁଇ ଥରର ଓ୍ବାଲର୍ଡ ଚାମ୍ପିୟନଶିପ୍ ମେଡାଲିଷ୍ଟଙ୍କୁ ମ୍ୟାଟ୍କୁ ଫେରିବା ଲାଗି ଅପେକ୍ଷା କରିବାକୁ ପଡ଼ିବ। ସେ ରବିବାରଠାରୁ ଗୋଣ୍ଡାରେ ହେବାକୁ ଥିବା ନ୍ୟାଶନାଲ ଓପନ ର଼୍ୟାଙ୍କିଙ୍ଗ୍ ଜରିଆରେ ପ୍ରତ୍ୟାବର୍ତ୍ତନ କରିବାକୁ ଟାର୍ଗେଟ ରଖିଥିଲେ।
ଡବ୍ଲ୍ୟୁଏଫ୍ଆଇ ସଭାପତି ସଞ୍ଜୟ ସିଂ କହିଛନ୍ତି, ଓ୍ବାଡା ନିୟମକୁ ଉଚିତ ଭାବେ ପାଳନ କରାଯାଉଛି କି ନାହିଁ, ଆମକୁ ଦେଖିବାକୁ ପଡ଼ିବ। ଅବସରରୁ ପ୍ରତ୍ୟାବର୍ତ୍ତନ କରିବା ପାଇଁ ସେ ଏପର୍ଯ୍ୟନ୍ତ ଆବଶ୍ୟକୀୟ ସର୍ତ୍ତ ପୂରଣ କରିନାହାନ୍ତି। ତାଙ୍କୁ ପୁଣି ଥରେ ପ୍ରତିଦ୍ୱନ୍ଦ୍ୱିତା ଲାଗି ଯୋଗ୍ୟ ହେବା ପାଇଁ ବାଧ୍ୟତାମୂଳକ ୬ ମାସ ନୋଟିସ ସମୟସୀମା ଶେଷ କରିବାକୁ ପଡ଼ିବ।
