ଗଞ୍ଜାମ,୧୦ା୫(ଅନାଥ ତରାଇ): ଗଞ୍ଜାମ ସହରର ପାରମ୍ପରିକ ପ୍ରସିଦ୍ଧ ଚନ୍ଦନ ଯାତ୍ରା ଏବେ ଶେଷ ପର୍ଯ୍ୟାୟରେ ପହଞ୍ଚିଛି । ଗତ ମାସ ୨୦ ତାରିଖରୁ ଆରମ୍ଭ ହୋଇଥିବା ଏହି ଐତିହାସିକ ଯାତ୍ରା ଆସନ୍ତା ସୋମବାର ପୂର୍ବାହ୍ନ ୧୧ଟାରେ ପୂର୍ଣ୍ଣାହୁତି ହେବ। ରବିବାର ଅପରାହ୍ଣରେ ସହରର ବଡ଼ବଜାର ସ୍ଥିତ ତ୍ରିବେଣୀ ମଠ ଛକଠାରେ ହରି ଏବଂ ହରଙ୍କର ଅପୂର୍ବ ମିଳନ ବା ‘ହରିହର ଭେଟ’ ଅନୁଷ୍ଠିତ ହୋଇଯାଇଛି। ଏହି ଅବସରରେ ମଦନ ମୋହନ ଗୋପାଳସ୍ଵାମୀ ଓ ପୁରୁଣା ଜଗନ୍ନାଥ ମନ୍ଦିରର ଶ୍ରୀଜଗନ୍ନାଥ ସୁସଜ୍ଜିତ ବିମାନରେ ଆସିଥିବା ବେଳେ ବୃଷଭ ପୀଠରେ ବିଜେ କରି ଶ୍ରୀଖଣ୍ଡେଶ୍ଵର ମଧ୍ୟ ସେଠାରେ ପହଞ୍ଚିଥିଲେ।
ଗୋପାଳଜୀଙ୍କ ନିମନ୍ତ୍ରଣ କ୍ରମେ ତିନି ଦେବତାଙ୍କର ମିଳିତ ଶୋଭାଯାତ୍ରା ବାହାରି ଗୋପାଳଜୀ ମନ୍ଦିର ଅଭିମୁଖେ ଯାଇଥିଲା। ଯାତ୍ରାର ନୀତିକାନ୍ତି ଅନୁଯାୟୀ, ପ୍ରଥମ ପର୍ଯ୍ୟାୟରେ ୭ ବେଢ଼ା ଓ ୩ ଭଉଁରୀ ଅନୁଷ୍ଠିତ ହେବାର ବିଧି ରହିଛି। ପରେ ଠାକୁରମାନେ ଚାପରୁ ଓହ୍ଲାଇ ମନ୍ଦିରକୁ ବିଜେ କରିବେ, ଯେଉଁଠାରେ ଗୋପାଳଜୀ ଚନ୍ଦନ କୁଣ୍ଡରେ ଅବସ୍ଥାନ କରିବେ ଓ ଅନ୍ୟ ଦୁଇ ଠାକୁର ସିଂହାସନରେ ବିରାଜମାନ ହେବେ । ରାତିରେ ମୁଖ୍ୟ ଚାପରେ ଗୋପାଳଜୀ ଓ ଶ୍ରୀଜଗନ୍ନାଥ ବସିବା ବେଳେ ଶ୍ରୀଖଣ୍ଡେଶ୍ଵର ନିଆଳି ଚାପରେ ଭୋଗ ଗ୍ରହଣ କରିବେ।
ସମସ୍ତ ଠାକୁର ମିଳିତ ଭାବେ ୨୧ ବେଢ଼ା ବୁଲିବା ସହ ୮୪ ଭଉଁରୀ ସମ୍ପନ୍ନ କରିବାର କାର୍ଯ୍ୟକ୍ରମ ରହିଛି । ରବିବାର ପଣ୍ଡା ସାହି ପକ୍ଷରୁ ଗାଧୁଆ ତୋଠ ନିକଟରେ ପଂକ୍ତି ଭୋଗ ଅନୁଷ୍ଠିତ ହୋଇଥିଲା। ଏହା ସହିତ ମନ୍ଦିର ପ୍ରାଙ୍ଗଣରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଓ ଭଜନ ସମାରୋହ ଚାଲିଥିବାରୁ ସମଗ୍ର ଗଞ୍ଜାମ ସହର ଏବେ ଉତ୍ସବମୁଖର ହୋଇଉଠିଛି । ଶହ ଶହ ଶ୍ରଦ୍ଧାଳୁ ଏହି ଦେବ ଦୁର୍ଲଭ ମୁହୂର୍ତ୍ତର ଦର୍ଶନ କରି ନିଜକୁ କୃତାର୍ଥ ମନେ କରୁଛନ୍ତି ।
