ନୂଆଦିଲ୍ଲୀ, ୧୫।୭(ପି.ଟି.)-ଜାତୀୟ କ୍ରୀଡ଼ା ଆଚରଣବିଧି ଉଲ୍ଲଂଘନକରି ନିର୍ବାଚିତ ହୋଇଥିବାରୁ ନିକଟରେ ହକି ଇଣ୍ଡିଆ ସଭାପତି ପଦରୁ ଇସ୍ତଫା ଦେଇଥିବା ମହମ୍ମଦ ମୁସ୍ତାକ ଅହମ୍ମଦ ଏବେ ମୁହଁ ଖୋଲିଛନ୍ତି। ଅନ୍ୟ ଉଲ୍ଲଂଘନକାରୀଙ୍କୁ ଦଣ୍ଡିତ କରାଯାଉ ନ ଥିବାବେଳେ ଏପରି ବିଳମ୍ବିତ ନିଷ୍ପତ୍ତରୁ ମନ୍ଦ ଅଭିଳାଷର ବାସ୍ନା ଆସୁଛି ବୋଲି ସେ ପ୍ରକାଶ କରିଛନ୍ତି। ସଂଖ୍ୟାଲଘୁ ସମ୍ପ୍ରଦାୟର ହୋଇଥିବାରୁ ତାଙ୍କ ଉପରେ ଏପରି କାର୍ଯ୍ୟାନୁଷ୍ଠାନ ହୋଇଥିବା ସେ ସନ୍ଦେହ କରୁଛନ୍ତି ବୋଲି କହିଛନ୍ତି। ଏ ସମ୍ପର୍କିତ ଏକ ପତ୍ର ସେ କେନ୍ଦ୍ର କ୍ରୀଡ଼ା ସଚିବ ରବି ମିତ୍ତଲଙ୍କ ନିକଟକୁ ପ୍ରେରଣ କରିଛନ୍ତି। ଅନ୍ୟପକ୍ଷରେ କ୍ରୀଡ଼ା ମନ୍ତ୍ରଣାଳୟ ନିୟମ ଅନୁସାରେ କାର୍ଯ୍ୟ କରିଛି। ତା ଛଡ଼ା ଅନ୍ୟ କିଛି ନୁହେଁ ବୋଲି ଜଣେ କର୍ମକର୍ତ୍ତା ପ୍ରକାଶ କରିଛନ୍ତି।
କ୍ରୀଡ଼ା ଆଚରଣବିଧି ଉଲ୍ଲଂଘନ ସତ୍ତ୍ୱେ ସୁଧାଂଶୁ ମିତ୍ତଲ, ରାଜୀବ ମେହେଟା ଓ ଆନନ୍ଦେଶ୍ୱର ପାଣ୍ଡେ ଯଥାକ୍ରମେ ଖୋ ଖୋ, ଫେନ୍ସିଂ ଓ ହ୍ୟାଣ୍ଡବଲ୍ ସଂଘର ସଭାପତିଭାବେ କାର୍ଯ୍ୟ କରି ଆସୁଛନ୍ତି ବୋଲି ମୁସ୍ତାକ ନିଜ ପତ୍ରରେ ଉଲ୍ଲେଖ କରିଛନ୍ତି। ”ମୁଁ ସଂଖ୍ୟାଲଘୁ ସମ୍ପ୍ରଦାୟର ହୋଇଥିବାରୁ କ୍ରୀଡ଼ା ମନ୍ତ୍ରଣାଳୟ ଏପରି କାର୍ଯ୍ୟାନୁଷ୍ଠାନ ନେଇଥିବା ଅନୁଭବ ହେଉଛି। ମହମ୍ମଦ ମୁସ୍ତାକ ଅହମ୍ମଦ ନାମକୁ ନେଇ ସମ୍ଭବତଃ କିଛି ସମସ୍ୟା ରହିଛି“ ବୋଲି ସେ ନିଜ ପତ୍ରରେ ଲେଖିଛନ୍ତି। ନିୟମ ଅନୁସାରେ କ୍ରମାଗତ ତୃତୀୟ ଥର ପାଇଁ କେହି କୌଣସି ଅଫିସ୍ର ଦାୟିତ୍ୱରେ ରହିପାରିବେ ନାହିଁ। ଏ କ୍ଷେତ୍ରରେ କ୍ରୀଡ଼ା ସଂହିତା କାର୍ଯ୍ୟକାଳ ଗାଇଡଲାଇନ୍ ଉଲ୍ଲଂଘନ ହୋଇଥିବାରୁ ମୁସ୍ତାକଙ୍କୁ ଦାୟିତ୍ୱ ଛାଡ଼ିବାକୁ କୁହା ଯାଇଥିଲା। ସେ ୨୦୧୦ରୁ ୨୦୧୪ ପର୍ଯ୍ୟନ୍ତ ହକି ଇଣ୍ଡିଆ କୋଷାଧ୍ୟକ୍ଷ ଏବଂ ୨୦୧୪ରୁ ୪ ବର୍ଷ ପାଇଁ ମହାସଚିବ ଦାୟିତ୍ୱରେ ଥିଲେ। ୨୦୧୮ ନିର୍ବାଚନରେ ସେ ସଭାପତି ଭାବେ ଆଉ ୪ ବର୍ଷ ପାଇଁ ନିର୍ବାଚିତ ହୋଇଥିଲେ। ୨୦୧୯ରେ ଏହା ହକି ଇଣ୍ଡିଆକୁ ଅବଗତ କରାଯାଇଥିଲା। ମାତ୍ର ମନ୍ତ୍ରଣାଳୟ ନିକଟରୁ ସ୍ବୀକୃତି ପାଇବା ପୂର୍ବରୁ ସେ କୋଷାଧ୍ୟକ୍ଷ ଥିବାରୁ ତାହା ବିଚାରକୁ ନିଆ ନ ଯାଉ ବୋଲି ଯୁକ୍ତି ଉପସ୍ଥାପନ କରାଯାଇଥିଲା। ମାତ୍ର ହକି ଇଣ୍ଡିଆର ଯୁକ୍ତି ଖଣ୍ଡନ ହେବାପରେ ମୁସ୍ତାକଙ୍କୁ ଇସ୍ତଫା ଦେବାକୁ ପଡ଼ିଲା। ମନ୍ତ୍ରଣାଳୟ ପକ୍ଷରୁ କୁହାଯାଇଥିଲା ଯେ, ୨୦୧୦ ଅଗଷ୍ଟରେ ହୋଇଥିବା ନିର୍ବାଚନକୁ ଦୃଷ୍ଟିରେ ରଖି ୨୦୧୪ ଫେବୃୟାରୀରେ ହକି ଇଣ୍ଡିଆକୁ ସ୍ବୀକୃତି ଦିଆଯାଇଥିଲା। ତେଣୁ କୋଷାଧ୍ୟକ୍ଷଭାବେ ମୁସ୍ତାକଙ୍କ କାର୍ଯ୍ୟକୁ ପ୍ରଥମ କାର୍ଯ୍ୟକାଳ ବିବେଚନା କରାଯାଇଛି।
