ଦିଗପହଣ୍ଡି,୨୪।୪(ଡି.ଏନ୍.ଏ.): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ପଦ୍ମନାଭପୁର ପଞ୍ଚାୟତ ଭୁଶୁଣ୍ଡା ଗ୍ରାମର ରତନା ପ୍ରଧାନଙ୍କ ମୃତ୍ୟୁପରେ ଶୁକ୍ରବାର ପରିବାର ଲୋକଙ୍କ ପକ୍ଷରୁ ଦ୍ୱାଦଶାହ ଭୋଜି ଚାଲିଥିଲା। ଖବର ପାଇ ବିଡିଓ ହଳଧର ଶବର ଦିଗପହଣ୍ଡି ପୋଲିସ ସହାୟତାରେ ଗ୍ରାମରେ ଚଢ଼ାଉକରି ଏକ୍ଜିକ୍ୟୁଟିଭ ମାଜିଷ୍ଟ୍ରେଟ ତଥା ଦିଗପହଣ୍ଡି ତହସିଲଦାର ଅଦୈତ କୁମାର ସ୍ବାଇଁଙ୍କ ଉପସ୍ଥିତିରେ ଭୋଜି ପାଇଁ ପ୍ରସ୍ତୁତ ଖାଦ୍ୟ ସାମଗ୍ରୀ ଓ ସମସ୍ତ ସରଞ୍ଜାମକୁ ଜବତ କରିଥିବା ଜଣାପଡିଛି। ଏ ନେଇ ଗ୍ରାମରେ ଚାପା ଉତ୍ତେଜନା ପ୍ରକାଶ ପାଇଛି। ଶୁଦ୍ଧିକ୍ରିୟା ଭୋଜି କରୁଥିବା ପରିବାରଙ୍କ ସମେତ ସେମାନଙ୍କ ସମ୍ପର୍କୀୟଙ୍କୁ କରୋନା ଭୂତାଣୁର ଭୟାବହତା ସମ୍ପର୍କରେ ସଚେତନ କରାଯାଇଥିଲା। ଏ ନେଇ ପ୍ରଶାସନ ପକ୍ଷରୁ ଡାକବାଜି ଯନ୍ତ୍ର ସହାୟତାରେ ଗ୍ରାମବାସୀଙ୍କୁ ସଚେତନ କରାଯାଇଛି। ଭୋଜିରେ ସାମାଜିକ ଦୂରତା ଅବଲମ୍ବନ କରାଯିବା ସମ୍ଭବ ନ ଥିବାରୁ ସରପଞ୍ଚ ବି. କ୍ରିଷ୍ଣା ରାଓ ସୁବୁଦ୍ଧି, ଗାଁ ମୁଖିଆ ଏବଂ ୱାର୍ଡ ସଭ୍ୟଙ୍କୁ ଡକାଇ ତହସିଲଦାର ଓ ବିଡିଓ ଗ୍ରାମବାସୀଙ୍କୁ ବୁଝାଇବା ପରେ ପୋଲିସ ପ୍ରଶାସନ ଫେରିଥିବା ଜଣାପଡିଛି।
