ରୋମ, ୨୯।୩(ଏ.ପି.): ପର୍ତ୍ତୁଗାଲ ଫୁଟବଲ ସୁପରଷ୍ଟାର କ୍ରୀଷ୍ଟିଆନୋ ରୋନାଲ୍ଡୋ, କୋଚ୍ ମାଉରିଜିଓ ସାରିଙ୍କ ସମେତ ତାଙ୍କ କ୍ଲବ ଜୁଭେଣ୍ଟସର ଅନ୍ୟ ସଦସ୍ୟମାନେ କରୋନା ବିପତ୍ତି ପାଇଁ ୯୦ ମିଲିୟନ ୟୁରୋ ବା ୧୦୦ ମିଲିୟନ ଆମେରିକୀୟ ଡଲାର ପ୍ରଦାନ କରିବାକୁ ଘୋଷଣା କରିଛନ୍ତି। ଏହି ବିପତ୍ତି ସମସୟରେ କ୍ଲବ୍ର ସହାୟତା ପାଇଁ ଏମାନେ ଏହି ବିପୁଳ ଅର୍ଥ ପ୍ରଦାନ କରିବେ ବୋଲି କୁହାଯାଇଛି। ଏମାନେ ୪ ମାସ ଅର୍ଥାତ୍ ବର୍ଷକର ଏକ ତୃତୀୟାଂଶ ଦରମା ପ୍ରଦାନ କରିବେ। ଏ ଦୃଷ୍ଟିରୁ ଦେଖିବାକୁ ଗଲେ ରୋନାଲ୍ଡୋ ୧୦ ମିଲିୟନ ୟୁରୋ ବା ୧୧ ମିଲିୟନ ଅମେରିକୀୟ ଡଲାର ପ୍ରଦାନ କରିବେ।
ଉଲ୍ଲେଖଥାଉ କି, ସିରିଜ୍-ଏ’ରେ ଏହି ଇଟାଲୀୟ କ୍ଲବ ଜୁଭେଣ୍ଟସ ରେକର୍ଡ ନବମଥର ପାଇଁ ଟାଇଟଲ ହାସଲ ଲକ୍ଷ୍ୟରେ ରହିଛି। ପଏଣ୍ଟ ତାଲିକାରେ ଜୁଭେଣ୍ଟସ୍ ଶୀର୍ଷରେ ରହିଛି। ଲାଜିଓ ଗୋଟିଏ ପଏଣ୍ଟ କମ୍ ପାଇ ଦ୍ୱିତୀୟ ସ୍ଥାନରେ ରହିଛି। କଷ୍ଟକର ସମୟରେ ଏହି ବଦାନ୍ୟତା ପାଇଁ ଜୁଭେଣ୍ଟସ ରୋନାଲ୍ଡୋଙ୍କ ସମେତ କୋଚ୍ ଓ ଅନ୍ୟ ଖେଳାଳିମାନଙ୍କୁ କୃତଜ୍ଞତା ପ୍ରଦାନ କରିଛନ୍ତି। କରୋନା ଭାଇରସ ପାଇଁ ଇଟାଲୀରେ ଜାତୀୟ ବିପତ୍ତି ସୃଷ୍ଟି ହୋଇଛି। ଜୁଭେଣ୍ଟସ ଖେଳାଳି ଯଥା ଡାନିଏଲେ ରୁଗାନି, ବ୍ଲେଇସ୍ ମାଟୁଇଡି ଓ ପାଉଲୋ ଡିବାଲା କାରେନା ଭାଇରସରେ ଆକ୍ରାନ୍ତ ହୋଇଛନ୍ତି। ଇଟାଲୀରେ ମୋଟ ଉପରେ ୧ ଲକ୍ଷ ଲୋକ କୋଭିଡି- ୧୯ରେ ଆକ୍ରାନ୍ତ ହୋଇଛନ୍ତି। ଏହି କ୍ରମରେ ଦେଖିବାକୁ ଗଲେ ଇଟାଲୀ ଚାଇନାକୁ ମଧ୍ୟ ପଛରେ ପକାଇଛି। ଚଳିତମାସ ପ୍ରାରମ୍ଭରେ ଜୁଭେଣ୍ଟସ କ୍ଲବକୁ ନିୟନ୍ତ୍ରଣ କରୁଥିବା ଇଟାଲୀର ଶିଳ୍ପପତ୍ତି ପରିବାର ଆଗ୍ନେଲି ପରିବାର ଦେଶର ସିଭିଲ ପ୍ରୋଟେକ୍ସନ ଏଜେନ୍ସିକୁ ୧୦ ମିଲିୟନ ୟୁରୋ ପ୍ରଦାନ କରିଥିଲା।
