ପୁରୀ ଅଫିସ,୨୧ା୩: କରୋନା ଭାଇରସକୁ ନେଇ ଏବେ ସବୁଠି ଆଲୋଚନା। ଏହି ପ୍ରାଣଘାତୀ ଭାଇରସ୍କୁ କିପରି ମୁକାବିଲା କରାଯାଇପାରିବ ସେ ନେଇ ରାଜ୍ୟ ସରକାର ବିଭିନ୍ନ ସମୟରେ ନିର୍ଦ୍ଦେଶନାମା ଜାରି କରୁଛନ୍ତି। ପୁରୀ ଜିଲା ପ୍ରଶାସନ ଏହିସବୁ ନିର୍ଦ୍ଦେଶ କିପରି ଠିକ୍ ଭାବେ କାର୍ଯ୍ୟକାରୀ ହେବ ତାହା ଉପରେ ଗୁରୁତ୍ୱ ଦେଉଛି। ଶନିବାରଠାରୁ ଦୋକାନ ଖୋଲିବା ଉପରେ କିଛି କଟକଣା ରହିବ। ସେହିପରି ଅଟୋ, ଟ୍ୟାକ୍ସି ଚଳାଚଳ ଉପରେ ନିୟନ୍ତ୍ରଣ ଆଣିବାକୁ ଇଭିନ, ଅଡ୍ ଫର୍ମୁଲା ଲାଗୁ ହେବ ବୋଲି ଜିଲାପାଳ ବଲୱନ୍ତ ସିଂ କହିଛନ୍ତି।
ଏକ ଭିଡିିଓ ମାଧ୍ୟମରେ ଜିଲାପାଳ କହିଛନ୍ତି, କରୋନା ମୁକାବିଲା ପାଇଁ ରାଜ୍ୟ ସରକାରଙ୍କ ନିର୍ଦ୍ଦେଶମତେ ଆହୁରି କିଛି ନୂଆ ପଦକ୍ଷେପ ନେବାକୁ ଯାଉଛୁ। ଶନିବାରଠାରୁ ଦୋକାନ ଉପରେ କଟକଣା କରାଯିବ। ବିଶେଷକରି ଅତ୍ୟାବଶ୍ୟକ ସାମଗ୍ରୀ (ଗ୍ରସେରି, ପନିପରିବା ଆଦି) ବିକ୍ରି ହେଉଥିବା ଦୋକାନକୁ ବାଦ୍ ଦେଇ ଆଉ ସମସ୍ତ ଦୋକାନ ବନ୍ଦ ରହିବ। ରାସ୍ତାକଡ଼ରେ ଯେଉଁ ଦୋକାନରେ ଲୋକଙ୍କ ଗହଳି ହେଉଛି ତାକୁ ବନ୍ଦ କରାଯିବ। କୌଣସି ଜାଗାରେ ୭ଜଣରୁ ଅଧିକ ଲୋକଙ୍କ ସମାଗମ ହେବ ନାହିଁ। ଏହାକୁ କଡ଼ାକଡି କରାଯିବ। ସାମାଜିକ ଦୂରତ୍ୱ ବଜାୟ ରଖିବା ଲାଗି ସହରରେ ଅଟୋ ଓ ଟ୍ୟାକ୍ସି ଚଳାଚଳକୁ ନିୟନ୍ତ୍ରଣ କରାଯିବ। ଏଥିପାଇଁ ଯୁଗ୍ମ ଏବଂ ଅଯୁଗ୍ମ ନିୟମ ଲାଗୁ ହେବ। ଯୁଗ୍ମ (ଇଭିନ) ତାରିଖରେ ଯୁଗ୍ମ ନମ୍ବର ଥିବା ଗାଡ଼ିି ଚଳାଚଳ କରିବ। ସେହିଭଳି ଅଯୁଗ୍ମ (ଅଡ୍) ତାରିଖରେ ଅଯୁଗ୍ମ ନମ୍ବର ଗାଡ଼ି ଗଡ଼ିବ। ଏଥିପାଇଁ ଟ୍ୟାକ୍ସି ଏବଂ ଅଟୋ ଆସୋସିଏଶନ ସହ ଆର୍ଟିଓ ଏବଂ ପୋଲିସ ଆଲୋଚନା କରିବେ। ସେହିପରି କରୋନା ସମ୍ପର୍କରେ ଲୋକଙ୍କୁ ସଚେତନ କରିବା ଲାଗି ଅନେକ ଲୋକ ବ୍ୟକ୍ତିଗତ ଭାବେ ପ୍ରଚାରପତ୍ର (ଲିଫ୍ଲେଟ) ବଣ୍ଟନ କରୁଛନ୍ତି। କିନ୍ତୁ ଜିଲା ପ୍ରଶାସନ ଏବଂ ସ୍ବାସ୍ଥ୍ୟ ବିଭାଗ ପକ୍ଷରୁ ଏଥିପାଇଁ ବିଭିନ୍ନ ପ୍ରକାର ପଦକ୍ଷେପ ନିଆଯାଇଛି। ତେଣୁ ବ୍ୟକ୍ତିଗତ ଭାବେ କେହି ଲିଫ୍ଲେଟ୍ ବାଣ୍ଟିବାର ଆବଶ୍ୟକତା ନାହିଁ। ବିଶେଷକରି ବିନା ଅନୁମତିରେ ଯଦି କେହି ପ୍ରଚାରପତ୍ର ବାଣ୍ଟନ୍ତି ତେବେ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏତଦ୍ବ୍ୟତୀତ କେତେକ ସଙ୍ଗଠନ ମାସ୍କ ଆଦି ବାଣ୍ଟୁଛନ୍ତି। ଏଥିରୁ ସେମାନେ ନିବୃତ୍ତ ରୁହନ୍ତୁ। ଯଦି କାହାର ବାଣ୍ଟିବା ପାଇଁ ଇଚ୍ଛା ଅଛି ତେବେ ସେମାନେ ଜିଲା ମନିଟରିଂ ସେଲ୍ରେ ଆସି ଜଣାନ୍ତୁ। ଏହିସବୁ ସାମଗ୍ରୀ କେଉଁଠି ବଣ୍ଟାଯିବ ତାହା ଜିଲାସ୍ତରରେ ହିଁ ନିଷ୍ପତ୍ତି ନିଆଯିବ। ବିଶେଷକରି ସଚେତନତା କ୍ଷେତ୍ରରେ ସାମିଲ ହେଉଥିବା କର୍ମଚାରୀ, ପୋଲିସ, ସଫେଇ କର୍ମଚାରୀଙ୍କ ପାଇଁ ଏହାର ଯଥେଷ୍ଟ ଆବଶ୍ୟକତା ରହିଛି। ତେଣୁ ପ୍ରଶାସନ ମାଧ୍ୟମରେ ସେମାନଙ୍କୁ ଏହା ବଣ୍ଟା ଯାଇପାରିବ। ଏହିସବୁ କଟକଣା ଶନିବାର ଠାରୁ କଡ଼ାକଡ଼ି ହେବ। ତେବେ କରୋନା ପାଇଁ ଯେତେ ପ୍ରକାର କଟକଣା ଲାଗୁ ହେଉଛି ସବୁଥିରେ ଜିଲାବାସୀ ପ୍ରଶାସନକୁ ସହଯୋଗ କରୁଛନ୍ତି। ଏହିଭଳି ସହଯୋଗ ଆଗକୁ ରହିଲେ କରୋନା ଭୂତାଣୁରୁ ସମସ୍ତେ ରକ୍ଷା ପାଇପାରିବା ବୋଲି ଜିଲାପାଳ ସିଂ କହିଛନ୍ତି।
