କୋରାପୁଟ,୩୦ା୫(ଅମିତାଭ ବେହେରା):କୋରାପୁଟସ୍ଥିତ ଶହୀଦ ଲକ୍ଷ୍ମଣ ନାୟକ ଭେଷଜ ମହାବିଦ୍ୟାଳୟ ଓ ଚିକିତ୍ସାଳୟରେ ଜଣେ ୭ ମାସର ଶିଶୁଙ୍କ ଅସ୍ତ୍ରୋପଚାର କରାଯାଇ ତାଙ୍କ ତଣ୍ଟିରୁ ଏକ ମୁଣ୍ଡ କ୍ଲିପ୍ ବାହାର କରାଯାଇଛି। ଶିଶୁର ଜୀବନ ରକ୍ଷା ହୋଇଛି। ଚିକିତ୍ସାଳୟ ଅଧୀକ୍ଷକ ଡା. ସୁଶାନ୍ତ କୁମାର ସାହୁଙ୍କଠାରୁ ମିଳିଥିବା ସୂଚନା ଅନୁଯାୟୀ, କୋରାପୁଟ ସହର ନିକଟବର୍ତ୍ତୀ ଏକ ଗ୍ରାମର ୭ ମାସର ଶିଶୁ ଘରେ ଖେଳୁଥିବା ବେଳେ ତଳେ ପଡ଼ିଥିବା ଏକ କ୍ଲଚର ଗିଳିଦେଇଥିଲେ। ଏହା ପରେ ଶିଶୁର ଅବସ୍ଥା ଗୁରୁତର ହୋଇଥିଲା। ପରିବାର ଲୋକେ ତାଙ୍କୁ ଶହୀଦ ଲକ୍ଷ୍ମଣ ନାୟକ ଭେଷଜ ମହାବିଦ୍ୟାଳୟ ଓ ଚିକିତ୍ସାଳୟରେ ଭର୍ତ୍ତି କରିଥିଲେ। ଚିକିତ୍ସାଳୟର ଇଏନ୍ଟି ବିଭାଗର ଡା. ରାଜେଶ କର, ଡା. ଗୋପାଳ ନାୟକ ଓ ତାଙ୍କ ଟିମ୍ ଦୀର୍ଘ ସମୟ ଧରି ଅସ୍ତ୍ରୋପଚାର କରି କ୍ଲଚର ସଫଳତାର ସହ ବାହାର କରିଥିଲେ। ଶିଶୁ ବିପଦମୁକ୍ତ ଥିବା ଡାକ୍ତର କହିଛନ୍ତି।
