ଅତାବିରା, ୨୧।୩ (ଡି.ଏନ୍.ଏ.)-
ବରଗଡ଼ ଜିଲା ଭେଡ଼େନ ବ୍ଲକ ସଂକିର୍ଡ଼ା ପଁଚେତ୍ ସଦର ଗଁାରେ ବାସ କରୁଛନ୍ ସୁରୁବାବାୁ ପତି(୬୬)। ଅନେକ ବଛର ତଲେ ସେ ଝନେ ଟ୍ରାକ୍ଟର ଡ୍ରାଇଭର ହିସାବେ ନିଜର ପେଟ୍ ପାଲୁଥିଲେ। ହେଲେ ଗୁଟେ ସଡ଼କ ଦୁରଘଟନାର ଶିକାର ହେଇ ଅଁଧ୍ ପାଲଟିଗଲେ। ତାହାକୁ ଡୁଂଗି ଦେଖ୍ବାକେ କେହି ନାଇଁ। ଏନ୍ତାଥି ଗଁାର ଗୁଟେ ପରିବାର ତାହାକୁ ଆଶ୍ରେ ଦେଇଛନ୍। ଯେ ଯାହା ଦେଲା ଖାଇ ନିଜର ଜୀବନ୍ ବଁଚେଇଛନ୍।
ସୂଚନା ଅନ୍ସାରେ ସୁବର୍ଣ୍ଣପୁର ଜିଲା ବିନିକା ବ୍ଲକ ଭଣ୍ଡାର ଗଁାର ସ୍ବର୍ଗତ ଦଶରଥ ପତିକଁର ୪ ପୁଓ ଜଗନ୍ନାଥ, ସୁରୁବାବୁ, ତ୍ରିବିକ୍ରମ, ତିଲୋଚନ। ଭାଇମାନକର ଭିତରେ ସୁରୁବାବୁ ପତି(୬୬) ଦୁଇନ ନମର। ଆଏଜ୍କେ ଅନେକ ବଛର ତଲେ କେହେନ୍ସି କାରନ୍ରୁ ସେ ଗଁା, ପରିବାର ଛାଡ଼ି ବରଗଡ଼ ଜିଲା ଭେଡ଼େନ ବ୍ଲକ ଡାଲବ ପଁଚେତ୍ ଖୁଣ୍ଟୁଲିପାଲି ଗଁାକେ ପଲେଇ ଆସିଥିଲେ। ଗଁାର ଝନ୍କର ଟ୍ରାକ୍ଟର ଚଲେଇ ନିଜର ପେଟ୍ ପାଲୁଥିଲେ। ୨୦୦୪ ସାଲେ ସେ କେହେନ୍ସି କାମ୍ରେ ଗୋଡ଼ଭଗା ଗଲାବେଲେ ଗୁଟେ ସଡ଼କ ଦୁରଘଟନାର ଶିକାର ହେଇଥିଲେ। ସେଠାନୁ ବୁର୍ଲା ଡାକ୍ତରଖାନାରେ ଅନେକ ଦିନ ଧରି ଚିକିଛିତ ହେଇଥିଲେ ବି ସବୁଦିନର ଲାଗି ଦୁଇ ଆଏଁଖ୍ ହରେଇଥିଲେ। ସେ ଦିନ୍ଠାନୁ ସୁରୁବାବୁ ଗୁଟେ ଦିବ୍ୟାଙ୍ଗ ଜୀବନ୍ ବିତଉଛନ୍। ଆସର ପାସର ଗଁା ବୁଲି ଭିଖ୍ ମାଗି ପେଟ୍ ପାଲୁଛନ୍। ଇ ହିସାବେ ସେ ବୁଲି ବୁଲି ଦିନେ ସଂକିର୍ଡା ଗଁାରେ ପୁହୁଁଚିଥିଲେ। ଅନେକ ବଛର ହେଲା ସେ ଇଠାନେ ରହିଆସୁଛନ୍। ଥାନୀଅ ପଁଚେତ୍ରୁ ମାସିକ ୫ଶହ ଟଁକା ଭତା ଆର ୧୦ କେ.ଜି. ଚାଉଲ ପାଉଛନ୍। ଚାଉଲ ଆର ଭତା ପଏସା କଁା କରସ ବଲି ପଚ୍ରାଲାରୁ ଅସବିଧା ସମିଆରେ ମୁଢ଼ି, ମିକ୍ଚର, ବିସ୍କୁଟ ଘିନି ଖାଏସିଁ ବଲି ସେ କହିଥିଲେ। ସେନ୍ତା ଗଁାରେ ଗୁଟେ ପରିବାର ମୋତେ ମୁଡ଼ ଗୁଁଜ୍ବାକେ ଜାଗା ଟିକେ ଆର ସୁବିଧା ଅସ୍ବିଧାରେ ଥିର ପାଏନ୍ ଟିକେ ଦେଉଛନ୍। ନାଇଁହେଲେ ମୁଇଁ କେଭ୍ଠାନୁ ଆରପାରେ ଥାଏତି ବଲି ସେ କହିଥିଲେ। ସେନ୍ତା ତାକର ମୂଲ ଗଁା ଆର ଘରର ଲୁକ୍କର ବାବ୍ଦେ ପଚ୍ରାଲାରୁ ଆମେ ୪ ଭାଇ। ଗଁାରେ ୧୦ ଏକର ଜମି ଥିଲା। ବଡ଼ ଆର ସାନ ଭାଇ ମରିଗଲେନ, ତିନ୍ ନମର ଭାଇ ଲାପତା ଅଛେ। ଏହେଦେ ଗଁାରେ ଆର ଜମିବାଡ଼ି କିଛି ନଁାଇଁନ, ଖାଲି ସାନଭାଏ ବହୁ ତାକର ଛୁଆପିଲାକୁ ଧରି ଗଁାରେ ରହୁଛନ୍। ମୁଇଁ ଇଠାନେ ମୋର ଭାଏଗ୍କେ ଆଦ୍ରି ମାଗିଯାଚି ଖାଉଛେଁ ବଲି ସୁରୁବାବୁ କହିଥିଲେ। ଜିଲା ଆର ଥାନୀଅ ପରଶାସନ ଇ ଅସାହା ଅଁଧ୍ ବୁରୁଧ୍କଁର ଉପରେ ଦୁରୁଷ୍ଟି ଦେଇ କେହେନ୍ସି ବୃଦ୍ଧାଶ୍ରମରେ ଥଇଥାନ କରବାକେ ଗଁାବାସୀ ଦାବି କରିଛନ୍।
