ଜାମଟିକ୍ରା, ୪।୧୧ (ଡି.ଏନ.ଏ): ଅତାବିରା ବ୍ଲକ ଅଞ୍ଚଳରେ ଧାନ ଫସଲରେ ଲାଗିଥିବା ରୋଗପୋକ ଯୋଗୁ ଚାଷ କ୍ଷତିଗ୍ରସ୍ତ ହୋଇଛି। ବଜାରରେ ମିଳୁଥିବା କୀଟନାଶକ ପ୍ରୟୋଗ କଲେ ମଧ୍ୟ କୌଣସି ସୁଫଳ ମିଳୁନାହିଁ। ଫଳରେ ସୋମବାର ଚାଷୀମାନେ ଅତାବିରା କୃଷି ଓ ପରାମର୍ଶ କେନ୍ଦ୍ରକୁ ଆସି ରୋଗପୋକ ଲାଗିଥିବା ଧାନକେଣ୍ଡା ବ୍ଲକ କୃଷି ଅଧିକାରୀଙ୍କୁ ଦେଖାଇଥିଲେ। ଅଭିଯୋଗ ଅନୁସାରେ, ସେମାନେ ଯମୁନା, ସୋର୍ଣ୍ଣା ଓ ୧୦୦୧ ଧାନ ଚାଷ କରିଛନ୍ତି । କିନ୍ତୁ ଧାନ ଗୁଡିକର ପିଲ ବାହାରିବା ପରେ ଧାନରେ ନଳୀ ପୋକ ଓ ସିଟି ବ୍ଲାଷ୍ଟ ରୋଗ ଲାଗିଥିବାରୁ ଧାନ ଗୁଡିକ ପରିପକ୍ୱ ହେବା ପୂର୍ବରୁ ଅଗାଡି ହୋଇଯାଉଛି। ସଚେତନତା ଅଭାବ ଯୋଗୁ ଚାଷୀମାନେ ରୋଗ ସମ୍ପର୍କରେ କିଛି ଜାଣି ପାରୁନାହାନ୍ତି । ଫଳରେ ସେମାନେ ଅଧିକ କ୍ଷତିଗ୍ରସ୍ତ ହେଉଛନ୍ତି। ଏ ସମ୍ପର୍କରେ ଅତାବିରା ବ୍ଳକ କୃଷି ଅଧିକାରୀ ମାମିନୀ ଭୋଇଙ୍କୁ ପଚାରିବାରୁ ବର୍ତ୍ତମାନ ଆଉ କିଛି କରିହେବ ନାହିଁ। ଏ ସମ୍ପର୍କରେ ଉପରିସ୍ଥ ଅଧିକାରୀଙ୍କୁ ଜଣାଇବୁ ବୋଲି କହିଥିଲେ।
