ଭୁବନେଶ୍ୱର,୨୭।୨: ମହାଶିବରାତ୍ରି ଅବସରରେ ଶ୍ରୀ ଲିଙ୍ଗରାଜଙ୍କ ମନ୍ଦିରରେ ମହାଦୀପ ଉଠିବାବେଳେ ଘଟିଛି ବଡ଼ ଅଘଟଣ। ମହାଦୀପ ଧରି ମନ୍ଦିର ଚୂଡ଼ାକୁ ଚଢ଼ୁଥିବା ସେବାୟତ ଯୋଗେନ୍ଦ୍ର ସମର୍ଥା ତଳକୁ ଖସିପଡ଼ିଛନ୍ତି। ଫଳରେ ତାଙ୍କ ମୁହଁ ଏବଂ ମୁଣ୍ଡରେ ଗଭୀର ଆଘାତ ଲାଗିଛି। ତାଙ୍କୁ ଉଦ୍ଧାର କରାଯାଇ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି। ତାଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ଆଇସିୟୁରେ ଚିକିତ୍ସା କରାଯାଉଛି।
ଆହତ ସେବାୟତଙ୍କୁ ମୁଖ୍ୟମନ୍ତ୍ରୀ ମୋହନ ମାଝୀ ହସ୍ପିଟାଲ ଯାଇ ସାକ୍ଷାତ କରିଛନ୍ତି। ବର୍ତ୍ତମାନ ତାଙ୍କର ସ୍ବାସ୍ଥ୍ୟବସ୍ଥା ସ୍ଥିର ଥିବା ସେବାୟତଙ୍କ ପୁଅ ଅଶ୍ୱିନୀ ସମର୍ଥା କହିଛନ୍ତି।
ସେ କହିଛନ୍ତି, ବାପା ଦୀର୍ଘ ୩୦ ବର୍ଷ ହେଲା ମହାଦୀପ ଉଠାଉଥିଲେ। ମନ୍ଦିର ଚଢ଼ିବା ସ୍ଥାନରେ ପ୍ରତିବର୍ଷ ବାଲି ପଡ଼େ। ହେଲେ ଏଥର ପ୍ରଶାସନ ବାଲି ପକାଇବାକୁ ଭୁଲି ଯାଇଥିଲା। ବାଲି ପଡ଼ିଥିଲେ ଅଘଟଣ ହୋଇନଥାନ୍ତା ବୋଲି ଅଶ୍ୱିନୀ କହିଛନ୍ତି। ପାଦରେ ଘିଅ ଲାଗିବାରୁ ଗୋଡ଼ ଖସି ଏମିତି ବଡ଼ ଅଘଟଣ ଘଟିଛି ବୋଲି ସେ କହିଛନ୍ତି।
ସୂଚନାଥାଉ କି, ଅଘଟଣ ପରେ ମହାଦୀପକୁ ଅନ୍ୟଜଣେ ସେବାୟତ ଲିଙ୍ଗରାଜ ସମର୍ଥା ମନ୍ଦିର ଉପରକୁ ନେଇଥିଲେ। ଏହି ଘଟଣା ଜଣାପଡ଼ିବା ପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କ୍ୟାପିଟାଲ୍ ହସ୍ପଟାଲ୍ରେ ପହଞ୍ଚତ୍ ଆହତ ସେବାୟତଙ୍କୁ ଭେଟି ଆଶୁ ଆରୋଗ୍ୟ କାମନା କରିଛନ୍ତି। ଏଭଳି ଏକ ଅଘଟଣକୁ ନେଇ ବିଭିନ୍ନ ମହଲରେ ସମାଲୋଚନା କରାଯାଇଛି। ନିର୍ଦ୍ଧାରିତ ସମୟଠାରୁ ପ୍ରାୟ ୪୦ମିନିଟ ବିଳମ୍ବରେ ମହାଦୀପ ଉଠିଥିବାରୁ ତରତର ହୋଇ ମନ୍ଦିର ଉପରକୁ ଚଢ଼ିବାରୁ ଏଭଳି ଅବସ୍ଥା ହେଲା ବୋଲି ଅନେକେ କହୁଛନ୍ତି। ଏଥିପାଇଁ ପ୍ରଶାସନକୁ ମଧ୍ୟ ଦାୟୀ କରାଯାଇଛି।
ପ୍ରକାଶ ଯେ, ପୂର୍ବ ନିର୍ଦ୍ଧାରିତ ରାତି ୧୦ଟାରେ ମହାଦୀପ ଉଠିବାର ଥିଲା। ହେଲେ ସନ୍ଧ୍ୟା ଧୂପ ରାତି ୧୦ଟା୩୧ରେ ସରିବା ପରେ ସେବାୟତ ଯୋଗେନ୍ଦ୍ର ମହାଦୀପ ଧରି ପ୍ରଥମେ ବେଢ଼ା ପରିକ୍ରମା କରିଥିଲେ। ଏହାପରେ ସେ ମହାଦୀପ ଧରି ମନ୍ଦିର ଚୂଡ଼ା ଉପରକୁ ଚଢ଼ୁଥିଲେ। ପ୍ରାୟ ୧୫ରୁ ୨୦ ଫୁଟ ଚଢ଼ିବା
ପରେ ସେ ହଠାତ୍ ତଳକୁ ଖସିପଡ଼ିଥିଲେ। ଫଳରେ ତାଙ୍କ ମୁହଁ ଏବଂ ମୁଣ୍ଡରେ ଗଭୀର ଆଘାତ ଲାଗିଥିଲା। ନିକଟରେ ଉପସ୍ଥିତ ସ୍ବେଚ୍ଛାସେବୀ ଏବଂ ଅନ୍ୟମାନେ ତୁରନ୍ତ ତାଙ୍କୁ ଉଦ୍ଧାର କରି କ୍ୟାପିଟାଲ ହସ୍ପିଟାଲକୁ ନେଇଥିଲେ। ପୂର୍ବବର୍ଷଗୁଡ଼ିକରେ ଯୋଗେନ୍ଦ୍ର ମନ୍ଦିର ଚୂଡ଼ାକୁ ଚଢ଼ି ସୁରୁଖୁରୁରେ ମହାପ୍ରଭୁଙ୍କ ମହାଦୀପ ଉଠାଉଥିବାବେଳେ ଚଳିତ ବର୍ଷର ଅଘଟଣକୁ ନେଇ ବିଭିନ୍ନ କଥା ଶୁଣିବାକୁ ମିଳୁଛି। କେତେକ ଶ୍ରଦ୍ଧାଳୁଙ୍କ ମତରେ ମନ୍ଦିର ଉପରକୁ ମହାଦୀପ ନେଇ ଚଢ଼ୁଥିବାବେଳେ ଅନେକ ଭକ୍ତ ମହାଦୀପ ଉପରକୁ ଘିଅ ଫିଙ୍ଗିଥିଲେ। ଫଳରେ ଯୋଗେନ୍ଦ୍ରଙ୍କ ଗୋଡ଼ ଖସି ସେ ତଳେ ପଡ଼ିଯାଇଥିଲେ। ତେବେ କାହିଁକି ଓ କେମିତି ଏ ଅଘଟଣ ଘଟିଲା ତା’ର ଅନୁଧ୍ୟାନ କରାଯିବ ବୋଲି ଖୋର୍ଦ୍ଧା ଜିଲାପାଳ ଚଞ୍ଚଳ ରାଣା କହିଛନ୍ତି। ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ, ଏକାମ୍ର ବିଧାୟକ ବାବୁ ସିଂ ଏବଂ ଭାଜପା ନେତା ଜଗନ୍ନାଥ ପ୍ରଧାନ ପ୍ରମୁଖ ଆହତ ଯୋଗେନ୍ଦ୍ରଙ୍କୁ ହସ୍ପିଟାଲରେ ଭେଟିଛନ୍ତି।
