ବେଙ୍ଗାଲୁରୁ,୨୨ା୪: କର୍ନାଟକର ରାଜଧାନୀ ତଥା ଦେଶର ଆଇଟି ହବ୍ ବେଙ୍ଗାଲୁରୁରୁ ଏକ ଚାଞ୍ଚଲ୍ୟକର ଏବଂ ହୃଦୟ ବିଦାରକ ଘଟଣା ସାମ୍ନାକୁ ଆସିଛି।
ଏହା ସମଗ୍ର ସହରକୁ ଥରାଇ ଦେଇଛି। ଏକ ଟେଲିକମ୍ ଷ୍ଟୋରରେ କାମ କରୁଥିବା ଜଣେ ଯୁବତୀ ତାଙ୍କ ପ୍ରେମିକଙ୍କୁ ତାଙ୍କ ଘରକୁ ଡାକିଥିଲେ, ତାଙ୍କ ଆଖିରେ ପଟି ବାନ୍ଧିଥିଲେ, ତାଙ୍କୁ ଏକ ଚେୟାରରେ ବାନ୍ଧି ଦେଇଥିଲେ ଏବଂ ପରେ ତାଙ୍କୁ ନିଆଁ ଲଗାଇ ଦେଇଥିଲେ। ଏହି ଘଟଣା ବିଷୟରେ ଯିଏ ଶୁଣିଲେ ସେ ଭୟଭୀତ ହୋଇଯାଇଥିଲେ।
ପୋଲିସ କହିଛି ଯେ, ଅଭିଯୁକ୍ତ ପ୍ରେରଣା (୨୭) ଏବଂ ମୃତ କିରଣ (୨୭) ବର୍ଷେ ହେଲା ରିଲେସନ୍ଶିପ୍ରେ ଥିଲେ। ଉଭୟେ ଭୋଡାଫୋନ ଷ୍ଟୋରରେ କାମ କରୁଥିଲେ। ସେମାନଙ୍କ ସମ୍ପର୍କରେ ନିକଟରେ ତିକ୍ତତା ଆସିଥିଲା। ପ୍ରରଣା ଅଭିଯୋଗ କରିଥିଲେ ଯେ, କିରଣ ତାଙ୍କୁ ଅଣଦେଖା କରୁଛନ୍ତି ଏବଂ ବିବାହ କରିବାକୁ ମନା କରୁଛନ୍ତି।
ଘଟଣାଟି ମଙ୍ଗଳବାର ଅପରାହ୍ନରେ ଘଟିଥିଲା। ପ୍ରେରଣା ଦକ୍ଷିଣ ବେଙ୍ଗାଲୁରୁର ଅଞ୍ଜନାପୁରାସ୍ଥିତ ତାଙ୍କ ଘରକୁ କିରଣଙ୍କୁ ନିମନ୍ତ୍ରଣ କରିଥିଲେ। ସେତେବେଳେ ସେ ଘରେ ଏକା ଥିଲେ। କିଛି କଥାବାର୍ତ୍ତା ପରେ, ପ୍ରେରଣା କିରଣଙ୍କ ଆଖିରେ ପଟି ବାନ୍ଧି ତାଙ୍କୁ ଏକ ଚେୟାରରେ ବାନ୍ଧିବାକୁ ଆରମ୍ଭ କରିଥିଲେ। ଯେତେବେଳେ କିରଣ ପ୍ରତିରୋଧ କଲେ ସେ ଏହାକୁ ବିଦେଶରେ ପ୍ରଚଳିତ ଏକ ନୂଆ ପ୍ରକାରର ପ୍ରପୋଜ ବୋଲି କହିଥିଲେ।
ଚେୟାରରେ ବାନ୍ଧି ଆଖିରେ ପଟି ବାନ୍ଧି, କିରଣ ଜାଣି ନଥିଲେ ଯେ କ’ଣ ହେବାକୁ ଯାଉଛି। ଏହି ସମୟରେ ପ୍ରେରଣା ପେଟ୍ରୋଲ ଏବଂ କିରୋସିନର ଏକ ପୂର୍ବରୁ ପ୍ରସ୍ତୁତ ମିଶ୍ରଣ ଆଣି ତାଙ୍କ ଉପରେ ଢାଳି ଦେଲେ ଏବଂ ତାଙ୍କୁ ନିଆଁ ଲଗାଇ ଦେଲେ। ଏହି ସମସ୍ତ ଘଟଣା କ୍ୟାମେରାରେ ରେକର୍ଡ ମଧ୍ୟ କରିଥିଲେ।
ପୋଲିସ ଅଧିକାରୀ ଡିସିପି ଡିଏଲ ନାଗେଶଙ୍କ ଅନୁଯାୟୀ, ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ପ୍ରେମିକା ଜଣକ ତାଙ୍କ ପ୍ରେମିକଙ୍କୁ ନିଆଁ ଲଗାଇ ହତ୍ୟା କରିଛନ୍ତି। ସେ ତାଙ୍କୁ ଅଣଦେଖା କରୁଥିବାରୁ ସେ ରାଗି ଯାଇଥିଲେ। ଘଟଣାଟି ବେଙ୍ଗାଲୁରୁର ବାୟାଦରହାଲ୍ଲି ଥାନା ଅଧୀନରେ ଥିବା ଅଞ୍ଜନାନଗର ଅଞ୍ଚଳରେ ଘଟିଛି। ପୋଲିସ ଅଭିଯୁକ୍ତ ଯୁବତୀଙ୍କୁ ହେପାଜତକୁ ନେଇ ତଦନ୍ତ ଜାରି ରଖିଛି। କିରଣଙ୍କ ପରିବାରକୁ ସୂଚନା ଦିଆଯାଇଛି। ସେମାନେ ପହଞ୍ଚିବା ପରେ ପରବର୍ତ୍ତୀ ଆଇନଗତ ପ୍ରକ୍ରିୟା ଶେଷ ହେବ।
