ନୂଆଦିଲ୍ଲୀ,୧୬।୨: ପୂର୍ବତନ ଟିମ ଇଣ୍ଡିଆ କ୍ରିକେଟର ଯୁବରାଜ ସିଂଙ୍କ ମା’ ଶବନମ ସିଂଙ୍କ ଘରେ ଚୋରି ହୋଇଛି। ଯଦିଓ ଏହି ମାମଲା ୬ମାସ ପୁରୁଣା, କିନ୍ତୁ ଶବନମ ସିଂ ବର୍ତ୍ତମାନ ପୋଲିସ ନିକଟକୁ ଯାଇ ମାମଲା ରୁଜୁ କରିଛନ୍ତି ବା ଏଫଆଇଆର ଦେଇଛନ୍ତି। କୁହାଯାଉଛି ଯେ କେବଳ ହରିୟାଣାର ପଞ୍ଚକୁଲାସ୍ଥିତ ଶବନମ ସିଂଙ୍କ ଘରେ କାମ କରୁଥିବା ଲୋକମାନେ ଏହି ଚୋରି କରିଥିବା ସନ୍ଦେହ କରାଯାଉଛି। ତେବେ ଏପର୍ଯ୍ୟନ୍ତ ଏହି ମାମଲାରେ କାହାକୁ ଗିରଫ କରାଯାଇ ନାହିଁ।
ପୂର୍ବତନ ଭାରତୀୟ ଦଳର ଅଲରାଉଣ୍ଡର ଯୁବରାଜ ସିଂଙ୍କ ମା’ ଶବନମ ସିଂ ଏମଡିସି ପୋଲିସ ଷ୍ଟେଶନରେ ଚୋରି ଅଭିଯୋଗ ଆଣିଛନ୍ତି। ସେ କହିଛନ୍ତି ଯେ ସେପ୍ଟେମ୍ବର ୨୦୨୩ ରେ ତାଙ୍କ ଘର -୧୮ ରେ ଚୋରି ହୋଇଥିଲା। ଏ ବିଷୟରେ ବିସ୍ତୃତ ସୂଚନା ଦେଇ ସେ କହିଛନ୍ତି ଯେ ଘରେ ଦୁଇଜଣ କେୟାର ଟେକର ଥିଲେ ଏବଂ ସେମାନେ ହିଁ ଏହି ଚୋରି କରିଥିଲେ। ଘରର ଆଲମାରୀରୁ ସୁନା ଅଳଙ୍କାର ଏବଂ ୭୫ ହଜାର ଟଙ୍କା ନଗଦ ଚୋରି ହୋଇଥିଲା। ଶବନମ ଦେଇଥିବା ସୂଚନା ଅନୁଯାୟୀ ଅଭିଯୁକ୍ତ ଭାବେ ଲଲିତା ଦେବୀ ଏବଂ ଶୈଲେନ୍ଦ୍ର ଦାସ ବୋଲି ଚିହ୍ନଟ କରାଯାଇଛି ଏବଂ ଉଭୟଙ୍କ ବିରୋଧରେ ଏଫଆଇଆର୍ ରୁଜୁ କରାଯାଇଛି। ବର୍ତ୍ତମାନ ଏମଡିସି ପୋଲିସ ଷ୍ଟେଶନ ଚୋରି ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ପୋଲିସ ଷ୍ଟେଶନରେ ପଞ୍ଜୀକୃତ ହୋଇଥିବା ଏଫଆଇଆର ଅନୁଯାୟୀ ମୋଟ ୧ ଲକ୍ଷ ୭୫ ହଜାର ଟଙ୍କା ଚୋରି ହୋଇଛି।
