ନୂଆଦିଲ୍ଲୀ,୧୩।୬ : ଆଗାମୀ ଦିନରେ ଟିଭି,ଲ୍ୟାପଟପ, ଫୋନ ଉତ୍ପାଦନ କରୁଥିବା କମ୍ପାନୀଗୁଡିକ ଏସବୁର ମୂଲ୍ୟ ବୃଦ୍ଧି ଘୋଷଣା କରିପାରନ୍ତି। ଏଗୁଡ଼ିକରେ ବ୍ୟବହୃତ ଗୁରୁତ୍ୱପୂର୍ଣ୍ଣ ପାର୍ଟସ୍ଗୁଡ଼ିକର ମୂଲ୍ୟ ବଜାରରେ ଦ୍ରୁତ ଗତିରେ ବୃଦ୍ଧି ପାଉଛି। ଏହି କାରଣରୁ, ଏସବୁର ମୂଲ୍ୟରେ ବୃଦ୍ଧି ହୋଇପାରେ। ବାସ୍ତବରେ, ସ୍ମାର୍ଟ ଟିଭି, ମୋବାଇଲ ଫୋନ ଏବଂ ଲାପଟପରେ ଓପନ ସେଲଗୁଡ଼ିକ ବ୍ୟବହୃତ ହୁଏ । ବିଶ୍ୱ ବଜାରରେ ଏହାର ମୂଲ୍ୟ ବୃଦ୍ଧି ଯୋଗୁ ଟେଲିଭିଜନ ନିର୍ମାତାମାନେ ମଧ୍ୟ ସେମାନଙ୍କର ନୂତନ ସ୍ମାର୍ଟ ଟିଭି ସେଟ ମୂଲ୍ୟ ବୃଦ୍ଧି କରୁଛନ୍ତି। ବଡ଼ ପରଦା ଟିଭିର ମୂଲ୍ୟରେ ଏହାର ସବୁଠାରୁ ବଡ ପ୍ରଭାବ ଦେଖିବାକୁ ମିଳୁଛି। ଟିଭିରେ ଓପନ ସେଲ ଏକ ପ୍ରମୁଖ ଉପାଦାନ ଏବଂ ଟେଲିଭିଜନର ମୋଟ ମୂଲ୍ୟରେ ଏହାର ଅଂଶ ୬୦ରୁ ୬୫ ପ୍ରତିଶତ ଅଟେ। ଏହାର ମୂଲ୍ୟ ହାରାହାରି ୧୫ ପ୍ରତିଶତ ବୃଦ୍ଧି ପାଇଛି। ଏହାର ମୂଲ୍ୟରେ ବୃଦ୍ଧି ଯୋଗୁ ଲାପଟପ ଏବଂ ସ୍ମାର୍ଟଫୋନର ମୂଲ୍ୟ ମଧ୍ୟ ବଢ଼ିପାରେ । କାରଣ ଏହା ମୋବାଇଲ ଫୋନରେ ମଧ୍ୟ ବ୍ୟବହୃତ ହୁଏ, କିନ୍ତୁ ସେଠାରେ ଏହାର ମୂଲ୍ୟ ଟିଭି ତୁଳନାରେ କମ ଅଟେ ।
ଇଲେକ୍ଟ୍ରୋନିକ ଇଣ୍ଡଷ୍ଟ୍ରିଜ ଆସୋସିଏଶନ ଅଫ ଇଣ୍ଡିଆ ସହିତ ଜଡିତ ଅଧିକାରୀମାନେ କହିଛନ୍ତି ୨୦୨୨ ମସିହାରେ ଓପନ ସେଲର ମୂଲ୍ୟ କମ ଥିଲା। କିନ୍ତୁ ୨୦୨୩ ର ଆରମ୍ଭରୁ, ଏହା ମହଙ୍ଗା ହେବାରେ ଲାଗିଛି। ଜାନୁଆରୀରୁ ଜୁନ ପର୍ଯ୍ୟନ୍ତ ଏହାର ମୂଲ୍ୟ ୧୫ ରୁ ୧୭ ପ୍ରତିଶତ ବୃଦ୍ଧି ପାଇଛି। ୩୨-ଇଞ୍ଚର ଟିଭିରେ ବ୍ୟବହୃତ ଓପନ ସେଲର ପ୍ୟାନେଲ ପାଇଁ ପ୍ରାୟ ୨୭ ଡଲାର ଖର୍ଚ୍ଚ ହୋଇଥାଏ। ତେବେ ମୂଲ୍ୟରେ ହାରାହାରି ବୃଦ୍ଧି ୧୫ ପ୍ରତିଶତ ସୀମା ମଧ୍ୟରେ ରହିବ। ଦୁନିଆର ଅଧିକାଂଶ ଓପନ ସେଲ ପ୍ୟାନେଲଗୁଡିକ ୪ ରୁ ୫ ଚାଇନାର କମ୍ପାନୀ ଦ୍ୱାରା ନିର୍ମିତ। ଏଭଳି ପରିସ୍ଥିତିରେ ଭାରତ ସମେତ ବିଶ୍ୱର ବିଭିନ୍ନ ଦେଶରେ ଏହାର ମୂଲ୍ୟ ବୃଦ୍ଧିର ପ୍ରଭାବ ଦୃଶ୍ୟମାନ ହେଉଛି।
ଦେଶର ଅନେକ ପ୍ରତିଷ୍ଠିତ କମ୍ପାନୀ ଟିଭିର ମୂଲ୍ୟ ବୃଦ୍ଧି କରିବାକୁ ଯାଉଛନ୍ତି। ଟିଭି, ସ୍ମାର୍ଟ ଫୋନ ଏବଂ ଲାପଟପ ବାଣିଜ୍ୟ କରୁଥିବା ବ୍ୟବସାୟୀମାନେ କହିଛନ୍ତି ଓପନ ସେଲ ପ୍ୟାନେଲଗୁଡିକର ମୂଲ୍ୟ କ୍ରମାଗତ ଭାବରେ ବୃଦ୍ଧି ପାଉଛି ଏବଂ ବର୍ତ୍ତମାନ ପର୍ଯ୍ୟନ୍ତ ଏହାର ମୂଲ୍ୟ ୨୫ ରୁ ୩୦ ପ୍ରତିଶତ ବୃଦ୍ଧି ପାଇଛି। ଏହା ବ୍ୟତୀତ ଯୋଗାଣର ଅଭାବ ମଧ୍ୟ ରହିଛି। ସେଥିପାଇଁ ଟିଭି, ସ୍ମାର୍ଟ ଫୋନ ଏବଂ ଲାପଟପ ଉତ୍ପାଦନ କରୁଥିବା କମ୍ପାନୀଗୁଡିକ ସେମାନଙ୍କର ମୂଲ୍ୟ ବୃଦ୍ଧି କରିବାକୁ ଯାଉଛନ୍ତି । ଅନେକ ଅଗ୍ରଣୀ ବ୍ରାଣ୍ଡର ଟେଲିଭିଜନ ମଧ୍ୟ ୧୦ ପ୍ରତିଶତ ପର୍ଯ୍ୟନ୍ତ ମହଙ୍ଗା ହୋଇଛି। ଚଳିତ ବର୍ଷର ବଜେଟ ଉପସ୍ଥାପନ କରୁଥିବାବେଳେ ସରକାର ଟିଭି ପ୍ୟାନେଲର କିଛି ଓପନ ସେଲ ଅଂଶ ଉପରେ ମୌଳିକ ଆମଦାନୀ ଶୁଳ୍କକୁ ୫ ପ୍ରତିଶତରୁ ୨.୫ ପ୍ରତିଶତକୁ ହ୍ରାସ କରିବାକୁ ଘୋଷଣା କରିଥିଲେ।
