ନୂଆଦିଲ୍ଲୀ,୧୨ ।୨: କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖର୍ଗେ ଶନିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ଖୁବ୍ ବର୍ଷିଛନ୍ତି । ଶାସନ କ୍ଷମତାକୁ ଆସିବା ପରେ ମୋଦି ଉଦ୍ଦ୍ୟୋଗପତି ଗୌତମ ଅଦାନୀଙ୍କୁ ସାହାଯ୍ୟ କରିବା, ଉଚିତ ପ୍ରସଙ୍ଗକୁ ନ ଉଠାଇବା ଭଳି କାମ କରି ଲୋକତନ୍ତ୍ରକୁ ଶେଷ କରିଦେଇଥିବା ଅଭିଯୋଗ ଆଣିଛନ୍ତି ଖର୍ଗେ । ଝାଡ଼ଖଣ୍ଡର ସାହେବଗଞ୍ଜ ଜିଲାରେ ଏକ ରାଲିକୁ ସମ୍ବୋଧନ କରିବା ସମୟରେ ସେ ଏହା କହିଛନ୍ତି । ଖର୍ଗେ କହିଛନ୍ତି, ୨୦୧୯ରେ ଅଦାନୀଙ୍କ ସମ୍ପତ୍ତି ୧ ଲକ୍ଷ କୋଟି ଥିଲା ହେଲେ ଅଢେଇ ବର୍ଷ ଭିତରେ ତାଙ୍କ ସମ୍ପତ୍ତି ୧୩ ଲକ୍ଷ କୋଟି ହୋଇଗଲା । ଏ ହେଉଛନ୍ତି ସେହି ଆଦାନୀ ଯାହାଙ୍କ ବିମାନରେ ମୋଦି ଶପଥ ନେବାକୁ ଯାଇଥିଲେ । ଏମିତି କେଉଁ ଯାଦୁକି ଛଡି ମିଳିଲା ଯେ ଆଦାନୀଙ୍କ ସମ୍ପତ୍ତି ଏତେ ବଢିଗଲା । ଏହା ଏଇଥିପାଇଁ ହେଲା କାରଣ ମୋଦି ଜନତାଙ୍କ ପଇସା ନେଇ ନିଜ ବନ୍ଧୁଙ୍କୁ ଫଣ୍ଡିଂ କଲେ ।
କଂଗ୍ରେସ ଅଧ୍ୟକ୍ଷ ଆହୁରି ମଧ୍ୟ କହିଛନ୍ତି, ମୁଁ ମୋଦିଙ୍କୁ ଅନୁରୋଧ କରୁଛି ଦେଶର ଗରିବ, କୃଷକ ଓ ଶ୍ରମିକଙ୍କୁ ଏହି କଳା ଶିଖାନ୍ତୁ । ତା’ହେଲେ ଏତେ ପରିଶ୍ରମ କରିବାକୁ ପଡିବ ନାହିଁ । ଆପଣ ତାଙ୍କ ସମ୍ପତ୍ତି ୧୩ ଲକ୍ଷ କୋଟି କରିବାରେ ସାହାଯ୍ୟ କଲେ ଏମାନଙ୍କ ସମ୍ପତ୍ତି ୧୩ ଲକ୍ଷ କରିବାରେ ସାହଯ୍ୟ କରନ୍ତୁ ।
