ଭଞ୍ଜନଗର,୨୧ା୫(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ନିର୍ବାଚନମଣ୍ଡଳୀରେ କଂଗ୍ରେସର ସବୁ ନେତା ଏକାଠି ହୋଇ ପାରୁନାହାନ୍ତି ଗୋଟିଏ ମଞ୍ଚରେ। ଇତିମଧ୍ୟରେ ଭଞ୍ଜନଗର ବ୍ଲକର ପୂର୍ବତନ ଅଧ୍ୟକ୍ଷ ତଥା ଜଣାଶୁଣା ନେତା ବି ଦଣ୍ଡପାଣି ପାତ୍ରଙ୍କୁ ଗଞ୍ଜାମ ଜିଲା ପଶ୍ଚିମ ସଂଗଠନର ସଭାପତି ଦାୟିତ୍ୱ ଦିଆଯାଇଛି। ତାଙ୍କରି ଅଧୀନରେ ଆସୁଥିବା ନିର୍ବାଚନ ମଣ୍ଡଳୀଗୁଡ଼ିକରେ ଦଳର ଶକ୍ତି ବୃଦ୍ଧି ପାଇଁ ସେ ଚେଷ୍ଟା ଚଳାଇଛନ୍ତି। ଆଗକୁ ପୌର ଏବଂ ପଞ୍ଚାୟତ ନିର୍ବାଚନ। ଉକ୍ତ ନିର୍ବାଚନରେ ଫଳାଫଳ ଜଣାପଡ଼ିବ ଦଣ୍ଡପାଣିଙ୍କ ପ୍ରଭାବ। ଗତ ରାଜ୍ୟ ସଭା ନିର୍ବାଚନ ସମୟରେ ଜିଲାର ଏକ ମାତ୍ର କଂଗ୍ରେସର ସାନଖେମୁଣ୍ଡି ବିଧାୟକ ତଥା ଜିଲା ସଭାପତି ରମେଶ ଜେନା କ୍ରସ୍ ଭୋଟିଂ କରିବା ଅଭିଯୋଗରେ ଦଳରୁ ନିଲମ୍ବିତ ହୋଇଥିଲେ। ଫଳରେ ଜିଲାରେ ଦଳୀୟ ସଂଗଠନ ବିପଦରେ ପଡ଼ିଥିଲା। ଏହାପରେ ଦଣ୍ଡପାଣିଙ୍କୁ ଜିଲା ସଭାପତି ଦାୟିତ୍ୱ ମିଳିଥିଲା। ଇତିମଧ୍ୟରେ ଦଣ୍ଡପାଣି ଭଞ୍ଜନଗର ଠାକୁରାଣୀ ଯାତ୍ରାରେ ଦେବୀଙ୍କ ଦର୍ଶନ କରିବାକୁ ଯାଇଥିଲେ ତାଙ୍କ ସମର୍ଥକଙ୍କୁ ଧରି। ସେହିଭଳି କୁଲୁ ଭୂୟାଁ ତାଙ୍କ ସମର୍ଥକଙ୍କୁ ଧରି ଦେବୀଙ୍କୁ ଦର୍ଶନ କରିବାକୁ ଯାଇଥିଲେ। ଏଥିସହ ଗତ ସପ୍ତାହରେ ବିଧାୟକ ରମେଶ ଜେନା ସାନକୋଦଣ୍ଡା ଗ୍ରାମର ଏକ ଉତ୍ସବକୁ ଆସିଥିଲେ। ଏହା ପୂର୍ବରୁ ରମେଶଙ୍କୁ ତାଙ୍କ ସମର୍ଥକ ତଥା କଂଗ୍ରେସ ନେତା କୁଲୁ ଭୂୟାଁ, ଟୁଟୁ ପ୍ରଧାନ, ମଣ୍ଟୁ ପ୍ରଧାନ ପ୍ରମୁଖ ବଡକୋଦଣ୍ଡା ଛକରୁ ଏକ ଶୋଭାଯାତ୍ରାରେ ସାନକୋଦଣ୍ଡା ପାଛୋଟି ନେଇଥିଲେ।
ଅନ୍ୟପଟେ ପୂର୍ବତନ ପିସିସି କର୍ମକର୍ତ୍ତା ଦେବୀ ବିଷୋୟୀ, ସଞ୍ଜୟ ତ୍ରିପାଠୀ, ବିଦ୍ୟାଧର ପ୍ରଧାନ, ଗତ ନିର୍ବାଚନର ବିଧାୟକ ପ୍ରାର୍ଥୀ ପ୍ରଶାନ୍ତ ବିଷୋୟୀ, ବାପୁନା ରାଉତ, ଜବାହରଲାଲ ସାହୁଙ୍କ ସମେତ ଆଉ କିଛି ନେତାଙ୍କ ମଧ୍ୟ ଭଞ୍ଜନଗର ନିର୍ବାଚନମଣ୍ଡଳୀରେ ପ୍ରଭାବ ଅଛି। କିନ୍ତୁ ସବୁ ନେତା ଗୋଟିଏ ମଞ୍ଚରେ ଏକାଠି ହୋଇପାରୁନାହାନ୍ତି। କଥା ପଡ଼ିଲେ କହୁଛନ୍ତି ଆମେ ସବୁ ରାହୁଲ ଗାନ୍ଧୀଙ୍କ ସମର୍ଥକ। ଆଗକୁ ତ୍ରୀସ୍ତରୀୟ ପଞ୍ଚାୟତ ଏବଂ ପୌର ନିର୍ବାଚନ ହେବ। ଏହାପୂର୍ବରୁ ଭଞ୍ଜନଗର ଭାଜପା ବିଧାୟକ ପ୍ରଦ୍ୟୁମ୍ନ କୁମାର ନାୟକ ନିର୍ବାଚନ ପାଇଁ ପ୍ରସ୍ତୁତ ହୋଇ କାର୍ଯ୍ୟକ୍ରମ ହାତକୁ ନେଉଛନ୍ତି। ଅନ୍ୟପଟେ ପୂର୍ବତନ ମନ୍ତ୍ରୀ ତଥା ବିଜେଡି ରାଜ୍ୟ ଉପସଭାପତି ବିକ୍ରମ କେଶରୀ ଆରୁଖ ଗତ ସାଧାରଣ ନିର୍ବାଚନରେ ପରାଜିତ ହେବା ପରଠୁ ନୀରବ ଅଛନ୍ତି। ତେଣୁ ବିଜେଡିର ନେତା ଓ କର୍ମୀମାନେ ନିଜ ଭବିଷ୍ୟତ ନେଇ ଦ୍ୱନ୍ଦ୍ୱରେ ଅଛନ୍ତି। କଂଗ୍ରେସରେ ନେତାଙ୍କ ମଧ୍ୟରେ ଏକାଠି ଅଭାବ ରହିଛି। ଶାସକ ଦଳ ବର୍ତ୍ତମାନ ସୁବିଧାଜନକ ସ୍ଥିତିରେ ଥିବା ବେଳେ ବିରୋଧୀ ଦଳଗୁଡ଼ିକ ଆଗାମୀ ନିର୍ବାଚନକୁ କିଭଳି ମୁକାବିଲା କରୁଛନ୍ତି ତାହା ଦେଖିବାକୁ ବାକି ରହିଲା।
