ଦିଲ୍ଲୀ,୨୧ା୫: ଦିଲ୍ଲୀରୁ ବେଙ୍ଗାଲୁରୁ ଯାଉଥିବା ଏୟାରଇଣ୍ଡିଆର ଏକ ବିମାନ ଅବତରଣ ସମୟରେ ଦୁର୍ଘଟଣାର ସମ୍ମୁଖୀନ ହୋଇଛି। ବେଙ୍ଗାଲୁରୁ ବିମାନବନ୍ଦରରେ ଅବତରଣ କରିବା ସମୟରେ ବିମାନ AI ୨୬୫୧ର ପଛ ଭାଗ ହଠାତ୍ ରନ୍ଓ୍ବେରେ ମାଡ଼ ହୋଇଥିଲା। ମାତ୍ର ପାଇଲଟ ପରିସ୍ଥିତିକୁ ନିୟନ୍ତ୍ରଣ କରିବାରେ ସଫଳ ହୋଇଥିଲେ ଏବଂ ସମସ୍ତ ଯାତ୍ରୀଙ୍କୁ ସୁରକ୍ଷିତ ଅବତରଣ କରାଇଥିଲେ। ସମସ୍ତ ଯାତ୍ରୀ ଏବଂ କ୍ରୁ ସଦସ୍ୟ ସୁରକ୍ଷିତ ଅଛନ୍ତି। ଏହି ଏୟାର ଇଣ୍ଡିଆବିମାନରେ ୧୭୯ ଜଣ ଯାତ୍ରୀ ଥିଲେ।
ଏହି ଅତ୍ୟଧିକ ଲୋଡ ବିମାନର ପାଇଲଟ ଅବତରଣ ସମୟରେ ଅନ୍ୟ ଏକ ବିମାନ ଆଗକୁ ଉଡ଼ିବା ଯୋଗୁ ୱେକ୍ ଟର୍ବୁଲେନ୍ସ ଅନୁଭବ କରିଥିଲେ, ଯାହା ଫଳରେ ନିୟନ୍ତ୍ରଣ ହରାଇ ବିମାନର ପଛଭାଗ ରନଓ୍ବେରେ ଧକ୍କା ଦେଇଥିଲା। ବିମାନକୁ ଅବତରଣ କରାଯାଇଥିଲା।
ଏହି କାରଣରୁ ବେଙ୍ଗାଲୁରୁରୁ ଦିଲ୍ଲୀ ଫେରିବାକୁ ଥିବା ବିମାନ AI ୨୬୫୨କୁ ବାତିଲ କରାଯାଇଛି। ଯାତ୍ରୀମାନଙ୍କ ପାଇଁ ବିକଳ୍ପ ବ୍ୟବସ୍ଥା କରାଯିବ ବୋଲି ବିମାନ କମ୍ପାନୀ କହିଛି। ବେଙ୍ଗାଲୁରୁ ବିମାନବନ୍ଦରରେ ଏୟାର ଇଣ୍ଡିଆର ଗ୍ରାଉଣ୍ଡ ଟିମ୍ ଯାତ୍ରୀମାନଙ୍କୁ ସମସ୍ତ ଆବଶ୍ୟକୀୟ ସହାୟତା ପ୍ରଦାନ କରୁଛି।
